លោកនាយករដ្ឋមន្ត្រី ហ៊ុន សែន នៅថ្ងៃច័ន្ទនេះ បានបើកកិច្ចប្រជុំគណៈរដ្ឋមន្រ្តីជាពិសេសមួយជាមួយនឹងមន្ត្រីគ្រប់ស្ថាប័ន និងអភិបាលខេត្តក្រុងទាំងអស់បន្ទាប់ពីនៅតាមខេត្តមួយចំនួនតាមដងទន្លេមេគង្គ ទន្លេបាសាក់ និងជាប់ព្រំដែនកម្ពុជាថៃកំពុងវាយលុកដោយទឹកជំនន់។
លោក ខៀវ កញ្ញារិទ្ធ អ្នកនាំពាក្យរដ្ឋាភិបាលកម្ពុជា បានប្រាប់អ្នកយកព័ត៌មាននៅឯទីស្តីការគណៈរដ្ឋមន្ត្រីបន្ទាប់ពីកិច្ចប្រជុំថា លោកនាយករដ្ឋមន្រ្តី ហ៊ុន សែន បានបញ្ជាឲ្យអភិបាលខេត្តក្រុងទាំងអស់រក្សានៅនឹងកន្លែង និងកុំចាកចេញទៅក្រៅប្រទេស ឬក៏មកចូលរួមប្រជុំនៅក្នុងទីក្រុងភ្នំពេញ ក្នុងពេលដែលកម្ពុជាកំពុងតែវាយលុកដោយទឹកជំនន់។
«អាជ្ញាធរមូលដ្ឋានសហការជាមួយកាកបាទក្រហមដើម្បីបន្តផ្តល់ជំនួយដល់ប្រជាជនហើយទន្ទឹមនឹងនេះយើងបានបញ្ជូនខេត្តទាំងដប់ដែលរងគ្រោះហ្នឹង យើងបានបញ្ជូនលុយគឺថវិកា២០០លានរៀលដើម្បីចុះទៅត្រៀម។ យើងក៏បានបញ្ជូនអង្ករទៅខេត្តមួយចំនួន»។
ទឹកជំនន់នៅកម្ពុជាបានចាប់ផ្តើមឡើងកាលពីចុងខែសីហា ហើយបានបន្តរហូតមកដល់បច្ចុប្បន្ននេះ។ លោកខៀវ កញ្ញារិទ្ធិបានបញ្ជាក់ថា ចាប់តាំងពីពេលដែលទឹកជំនន់បានកើតមានឡើង មានខេត្តក្រុងចំនួន១៤បានទទួលរងផលប៉ះពាល់ និងបានសម្លាប់មនុស្សចំនួន៦១នាក់ដែលនៅក្នុងនោះមានកុមារចំនួន៣១នាក់។ លោកបានមានប្រសាសន៍ថា យ៉ាងតិចមានប្រជាពលរដ្ឋចំនួន១៣.៤០២ គ្រួសារត្រូវបានជម្លៀសចេញមកទីតាំងសុវត្ថិភាព និងបានបំផ្លាញផ្ទះចំនួន៣៣៨ខ្នង។ ក៏ប៉ុន្តែទោះបីជាយ៉ាងណាក៏ហេដ្ឋារចនាសម្ព័ន្ធ ផ្លូវថ្នល់ និងសាលារៀន មិនទាន់មានរបាយការណ៍ផ្លូវការនៅឡើយទេ។
លោក យឹម វណ្ណដា អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយបានបដិសេធមិនធ្វើអត្ថាធិប្បាយជាមួយនឹងអ្នកយកព័ត៌មានទេ។
ចំណែកលោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយបាននិយាយថា ចំនួនតួរលេខអាចនឹងមានការប្រែប្រួល ហើយលោកសុំមិនធ្វើអត្ថាធិប្បាយលម្អិត។
«ហេតុការណ៍ ខ្ញុំបានចេញសារមួយហើយៗក្រែងលោ សម័យប្រជុំគណៈរដ្ឋមន្ត្រីហ្នឹងដើម្បីពិនិត្យមើល។ ប៉ុន្តែដល់ពេលឥឡូវថា ខុសតួលេខច្រើនណាស់ដែរ ដូច្នេះយើងត្រូវធ្វើការ Update (ធ្វើបច្ចុប្បន្នភាព) ឡើងវិញទាំងអស់នៅក្នុងតារាងរបាយការណ៍របស់យើង»។
វីអូអេខ្មែរមិនអាចទាក់ទងលោក លឹម គានហោ រដ្ឋមន្ត្រីក្រសួងធនធានទឹក និងឧត្តុនិយម ដើម្បីសុំការបំភ្លឺបានទេនៅថ្ងៃច័ន្ទនេះ។
ទីស្តីការគណៈរដ្ឋមន្រ្តីបានចេញសេចក្តីប្រកាសព័ត៌មានមួយថា លោកនាយករដ្ឋមន្ត្រី ហ៊ុន សែន បានអនុញ្ញាតឲ្យលោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដឹកនាំការប្រជុំជាមួយនឹងក្រសួងសាធារណការ និងដឹកជញ្ជូន ក្រសួងអភិវឌ្ឃន៍ជនបទ និងគណៈកម្មាធិការជាតិគ្រប់គ្រងគ្រោះមហន្តរាយដើម្បីពិនិត្យដោះស្រាយតម្រូវការ និងធ្វើការជួសជុលជាបន្ទាន់។
លោក ម៉ៅ ហាក់ អគ្គនាយករងទទួលបន្ទុកបច្ចេកទេស និងជាប្រធាននាយកដ្ឋានជលសាស្ត្រ នៃក្រសួងធនធានទឹកបាននិយាយថា ទឹកជំនន់ទន្លេមេគង្គនៅផ្នែកមេគង្គលើបានចាប់ផ្តើមស្រក ក៏ប៉ុន្តែនៅផ្នែកមេគង្គក្រោម និងទន្លេបាសាក់ទឹកអាចបន្តឡើងក្នុងរយៈពេលមួយថ្ងៃទៀត៕
