នាយករដ្ឋមន្ត្រីម៉ាឡេស៊ី លោក Najib Razak បានប្តេជ្ញាថា លោកនឹងមិនចុះចាញ់ការគាបសង្កត់ឲ្យលោកចុះចេញពីតំណែង ដោយសាររឿងអាស្រូវទាក់ទងនឹងមូលនិធិវិនិយោគរបស់រដ្ឋនោះទេ។
ថ្លែងនៅថ្ងៃព្រហស្បតិ៍នេះក្នុងកិច្ចប្រជុំប្រចាំឆ្នាំរបស់គណបក្សជាតិរួបរួមម៉ាឡេ ឬ United Malays National Organization (UMNO) របស់លោកដែលកាន់អំណាចជាយូរមកហើយនោះ លោក Najib បានធានានៅចំពោះមុខប្រតិភូគណបក្សជាង២ពាន់នាក់ថា លោក មិនបានធ្វើអ្វីខុសនោះទេ។ លោក Najib បានប្រាប់ប្រតិភូទាំងនោះថា ការពិតគឺស្ថិតនៅខាងលោក ហើយថា «សច្ចធម៌នឹងឈ្នះ»។
នាយករដ្ឋមន្ត្រីម៉ាឡេស៊ីរូបនេះកំពុងរងការរិះគន់យ៉ាងខ្លាំង ចាប់តាំងពីមានការលាតត្រដាងមួយកាលពីខែកក្កដាថា រូបលោកបានទទួលប្រាក់ចំនួនប្រមាណ៧០០លានដុល្លារអាមេរិកក្នុងគណនីធនាគារផ្ទាល់ខ្លួនរបស់លោក។ ទឹកប្រាក់នោះហាក់ដូចជាបានមកពីក្រុមហ៊ុន 1Malaysia Development Berhad ((1MDB)) ដែលជាក្រុមហ៊ុនគ្រប់គ្រងដោយរដ្ឋាភិបាលម៉ាឡេស៊ី។
លោក Najib បានបដិសេធថា លោកមិនបានធ្វើអ្វីខុសទេ ដោយទទូចថា លុយនោះគឺជាអំណោយនយោបាយពីមនុស្សម្នាក់នៅមជ្ឈឹមបូព៌ា ប៉ុន្តែលោកបានប្រកែកមិនព្រមបង្ហាញអត្តសញ្ញាណរបស់ជននោះទេ។
លោក Najib បានបណ្តេញមន្ត្រីជាន់ខ្ពស់ជាច្រើនរូបចេញពីតំណែងក្នុងរដ្ឋាភិបាលរបស់លោកដោយសារមន្ត្រីទាំងនោះបានទាមទារឲ្យលោកចុះចេញពីតំណែង។ មន្ត្រីទាំងនោះ រួមទាំងអនុប្រធានគណបក្សជាតិរួបរួមម៉ាឡេ (UMNO) គឺលោកMuhyiddin Yassin ផង ដែលត្រូវបានបញ្ឈប់ពីការងារក្នុងមុខតំណែងជាឧបនាយករដ្ឋមន្ត្រី កាលពីខែសីហាកន្លងទៅនេះ៕
