គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃសុក្រនេះ បានអំពាវនាវឲ្យប្រជាពលរដ្ឋខ្មែរទាំងអស់ទៅពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១៨ ដែលនឹងប្រព្រឹត្តទៅចាប់ពីថ្ងៃទី១ ដល់ថ្ងៃទី១៨ ខែតុលា ឆ្នាំ២០១៨នេះ នៅតាមសាលាឃុំ-សង្កាត់ និងនៅតាមភូមិមួយចំនួន ទូទាំងប្រទេស។
ក្នុងសេចក្ដីអំពាវនាវរបស់ គ.ជ.ប ចេញនៅថ្ងៃទី២៨ ខែកញ្ញា ឆ្នាំ២០១៨នេះ បញ្ជាក់ថា ប្រជាពលរដ្ឋខ្មែរដែលមានឈ្មោះក្នុងបញ្ជីបោះឆ្នោត ឆ្នាំ២០១៧ ត្រូវទៅពិនិត្យមើលឈ្មោះរបស់ខ្លួនដែលបិទផ្សាយនៅតាមសាលាឃុំ-សង្កាត់ ដើម្បីឲ្យប្រាកដថា ខ្លួនមានឈ្មោះ និងទិន្នន័យត្រឹមត្រូវក្នុងបញ្ជីបោះឆ្នោត។ ក្នុងករណីឈ្មោះ ឬទិន្នន័យរបស់ខ្លួនពុំត្រឹមត្រូវ ត្រូវស្នើសុំទៅក្រុមចុះឈ្មោះបោះឆ្នោត ដើម្បីកែតម្រូវឲ្យបានត្រឹមត្រូវ ទៅតាមឯកសារសំអាងច្បាស់លាស់។
សេចក្តីអំពាវនាវដដែលនោះបញ្ជាក់ក្នុងន័យដើមថា៖«ចំពោះប្រជាពលរដ្ឋខ្មែរដែលមានសិទ្ធិបោះឆ្នោត ហើយមិនទាន់ចុះឈ្មោះបោះឆ្នោតពីមុនមក ប្រជាពលរដ្ឋខ្មែរដែលទើបគ្រប់អាយុ១៨ឆ្នាំ គិតត្រឹមថ្ងៃទី៣១ ខែធ្នូ ឆ្នាំ២០១៨ គឺអ្នកដែលកើតមុន ឬកើតត្រឹមថ្ងៃទី០១ ខែមករា ឆ្នាំ២០០១ និងប្រជាពលរដ្ឋខ្មែរដែលបានផ្លាស់លំនៅឋាន ឬទីសំណាក់ចូលក្នុងឃុំ សង្កាត់ថ្មី សូមអញ្ជើញទៅចុះឈ្មោះបោះឆ្នោត តាមកម្មវិធីរបស់ក្រុមចុះឈ្មោះបោះឆ្នោតនៅតាមឃុំ សង្កាត់ដែលបងប្អូនកំពុងរស់នៅ»។
ប្រជាពលរដ្ឋដែលបានចុះឈ្មោះបោះឆ្នោតក្នុងឆ្នាំ២០១៨ សរុបចំនួន ៨.៣៨០.២១៧នាក់។ ក្នុងនោះអ្នកដែលបានទៅបោះឆ្នោតជ្រើសតាំងតំណាងរាស្ត្រនីតិកាលទី៦នេះ មានចំនួន ៦.៨៨៥.៧២៩នាក់ ស្មើនឹង ៨២,១៧% នៃចំនួនអ្នកដែលបានចុះឈ្មោះសរុប។
លោក ហង្ស ពុទ្ធា អ្នកនាំពាក្យ គ.ជ.ប ប្រាប់ VOA នារសៀលថ្ងៃសុក្រនេះថា ការអំពាវនាវឲ្យប្រជាពលរដ្ឋទៅពិនិត្យ និងចុះឈ្មោះបោះឆ្នោត គឺតែងធ្វើឡើងជារៀងរាល់ឆ្នាំ ដើម្បីធានាថា ប្រជាពលរដ្ឋមានសិទ្ធិគ្រប់គ្រាន់ក្នុងការទៅបោះឆ្នោត។
លោកបញ្ជាក់ថា៖ «ដើម្បីធានាការថា គ.ជ.ប មានបញ្ជីបោះឆ្នោតមួយដែលការពារបាននូវសិទ្ធិបោះឆ្នោតរបស់ប្រជាពលរដ្ឋ ហើយការបោះឆ្នោតគឺទាមទារបញ្ជីឈ្មោះអ្នកបោះឆ្នោតយ៉ាងនេះហើយ បានការបោះឆ្នោតធានាបានត្រឹមត្រូវ។ ជារៀងរាល់ឆ្នាំទោះបីជាឆ្នាំបោះឆ្នោត ឬមិនបោះឆ្នោត គឺត្រូវតែធ្វើបច្ចុប្បន្នភាពបញ្ជីនេះហើយ។ អញ្ចឹងការធ្វើបច្ចុប្បន្នភាពទាំងនេះហើយហៅថាការពិនិត្យបញ្ជី និងចុះឈ្មោះបោះឆ្នោត»។
កម្ពុជាទើបរៀបចំការបោះឆ្នោតជ្រើសតាំងតំណាងរាស្រ្តអាណត្តិទី៦ កាលពីថ្ងៃទី២៩ ខែកក្កដា ឆ្នាំ២០១៨ ដោយមិនមានការចូលរួមពីគណបក្សសង្គ្រោះជាតិ ដែលជាគណបក្សប្រឆាំងដ៏ធំ និងមានអ្នកគាំទ្រជាង៤០ភាគរយនៅទូទាំងប្រទេសកាលពីការបោះឆ្នោតឆ្នាំ២០១៧កន្លងទៅ។ អវត្តមានគណបក្សប្រឆាំងនេះគឺដោយសារតុលាការកំពូលរំលាយគណបក្សនេះចោលទៅតាមបណ្តឹងរបស់ក្រសួងមហាផ្ទៃដោយចោទថា គណបក្សនេះបានឃុបខិតជាមួយបរទេស រៀបចំគម្រោងផ្តួលរំលំរដ្ឋាភិបាលដែលដឹកនាំដោយលោកនាយករដ្ឋមន្រ្តី ហ៊ុន សែន។
ក្រោយការរំលាយគណបក្សសង្គ្រោះជាតិ និងការហាមឃាត់ថ្នាក់ដឹកនាំជាន់ខ្ពស់គណបក្សនេះចំនួន១១៨នាក់មិនឲ្យធ្វើនយោបាយ គេឃើញគណបក្សកាន់អំណាចរបស់លោកនាយករដ្ឋមន្រ្តី ហ៊ុន សែន ដែលដឹកនាំប្រទេសជាង៣០ឆ្នាំមកហើយនោះ ឈ្នះការបោះឆ្នោតដែលរៀបចំដោយ គ.ជ.ប ដែលជាស្ថាប័នលែងមានសមាជិកមកពីគណបក្សប្រឆាំងនោះ យ៉ាងភ្លូកទឹកភ្លូកដី និងកំពុងបន្តការដឹកនាំប្រទេសដោយឯកបក្ស៕