ភ្ជាប់​ទៅ​គេហទំព័រ​ទាក់ទង

បាតុករ​អេហ្ស៊ីប​ជួប​បញ្ហា​ក្នុង​ការ​រក្សា​កម្លាំង​បាតុកម្ម


បាតុករ​អេហ្ស៊ីប​ប្រឆាំង​នឹង​រដ្ឋាភិបាល​​ម្នាក់​ អាន​កាសែត​ក្រោយពី​ភ្ញាក់​ពី​ដេក​នៅ​លើ​ទីលាន​​តារៀរ។​

ទីក្រុងឡឺគែរ៖ ភាព​ទាល់​ច្រក​ក្នុង​ប្រទេស​អេហ្ស៊ីប (Egypt) នៅ​តែ​មាន​តទៅ​ទៀត​ ដោយ​មាន​ក្រុម​បាតុករ​ប្រឆាំង​នឹង​រដ្ឋាភិបាល​បាន​បោះ​ជំរុំ​នៅ​ក្នុង​ទីលាន​ តាហ៍រីរ៍ (Tahrir) នៃ​ទីក្រុងឡឺគែរ នៅ​ពេល​ដែល​ផ្នែក​ឯទៀតៗ​នៃ​ក្រុង​នេះ​វិលត្រទ្បប់​ទៅ​កាន់ស​ភាពធម្មតា​វិញ។

កាល​ពី​ថ្ងៃអង្គារ​ ក្រុម​បាតុករ​បាន​និយាយ​ថា ពួកគេ​ប្រុងប្រៀប​រួច​ជា​ស្រេច​ហើយ​សម្រាប់​ការ​ប្រយុទ្ធ​ថ្មី​មួយ​ដើម្បី​ទាក់ទាញ​មនុស្ស​ថែម​ទៀត​ឱ្យ​មក​កាន់​ទីលាន​ តាហ៍រីរ៍ ដើម្បី​ចូល​រួម​ក្នុង​ការ​អំពាវនាវ​ឱ្យ​មាន​ការ​បណ្តេញ​លោក​ប្រធានាធិបតី​ ហូស្នី មូបារ៉ាក ឱ្យ​ចេញ​ពី​តំណែង។ បុរស​នេះ​បាន​និយាយ​នៅ​ពេល​គាត់​ចាក​ចេញ​ពី​ទីលាន តាហ៍រៀរ។ ​គាត់​បាន​ថ្លែង​ប្រាប់​វីអូអេ​ថា គាត់​ហត់នឿយ​នឹង​បាតុកម្ម​ ដែល​នៅ​ពេលនេះ​ចូល​ដល់​ថ្ងៃ​ទី​១៥​ហើយ។

បុរស​នេះ​និយាយ​ថា​ ជា​ការពិត​ គាត់​ចង់​ឱ្យ​ជីវភាព​វិលត្រទ្បប់​មក​កាន់​សភាព​ធម្មតា​វិញ ហើយ​គាត់​ថ្លែង​ថា គាត់​មិន​ដឹង​ទេ​ថា​តើ ​នៅ​ពេលណា​ទើប​ចលាចល​នេះ​នឹង​ចប់។​ គាត់​ពោល​ថា ស្ថានការណ៍​នេះ​ទំនង​ជា​នឹង​មាន​ត​ទៅ​ទៀត​ក្នុង​រយៈពេល​យូរ។

អ្នក​ខ្លះ​និយាយ​ថា រដ្ឋាភិបាល​មាន​ជោគជ័យ ​យ៉ាង​ហោច​ណាស់​នៅ​ពេល​នេះ ដើម្បី​ពន្យា​ពេល​ដោយបាន​ធ្វើ​សម្បទាន​បន្ថែម ​ហើយ​សម្បទាន​ថ្មីៗបំផុត​មាន​រួមបញ្ចូល​ការតម្លើង​ប្រាក់បៀវត្ស និង​ប្រាក់ចូលនិវត្តន៍​សម្រាប់​ក្រុម​បុគ្គលិក​ផ្នែក​សាធារណៈ។

លោក​ប្រធានាធិបតី​មូបារ៉ាក់​បាន​មាន​ប្រសាសន៍​រួចស្រេចហើយ​ថា លោក​នឹង​ចាក​ចេញ​ ដោយ​លោក​មិន​ស្វះស្វែង​ឱ្យ​ជាប់ឆ្នោត​ជាថ្មី​ក្នុង​ខែ​កញ្ញា​ទេ ហើយ​អ្នក​ខ្លះ​ក្នុង​ក្រុម​ប្រឆាំង​បាន​យល់ស្រប​ជាមួយ​លោក​ថា អន្តរកាល​គួរ​តែ​ធ្វើ​ជា​លំដាប់ និង​ដោយ​សន្តិវិធី។

ក្រុម​បាតុករ​ថ្លែង​ថា ពួកគេ​នឹង​មិន​បោះបង់​ការប្រយុទ្ធ​របស់​ពួក​គេ​ដើម្បី​ឱ្យ​លោក​មូបារ៉ាក់​ចាក​ចេញ​ពី​តំណែង​ក្នុង​ពេល​ឆាប់ៗនេះ។

ធនាគារ​បាន​បើក​ទ្វារ​ជាថ្មី​ក្នុង​សប្តាហ៍​នេះ ហើយ​មនុស្ស​ច្រើន​នាក់​បាន​វិល​ត្រទ្បប់​ទៅ​ធ្វើ​ការ​វិញ​ជា​លើក​ដំបូង​ក្នុង​រយៈពេល​ជាង​មួយ​សប្តាហ៍​មក​ហើយ។

ប្រែសម្រួល​ដោយ ​ឈឹម​ សុមេធ

XS
SM
MD
LG