ទីក្រុងឡឺគែរ៖ ក្រោយពីមានបាតុកម្មដ៏ធំធេងដែលមានរយៈពេល១៤ថ្ងៃប្រឆាំងនឹងលោក លោកប្រធានាធិបតី Hosni Mubarak នៃប្រទេស Egypt នៅតែកាន់អំណាចតទៅទៀត ហើយក្រុមប្រឆាំងសង្ស័យថាកិច្ចចរចាជាមួយរដ្ឋាភិបាលលោកនឹងមិនដោះស្រាយវិបត្តិរបស់ប្រទេសទេ។
ចំនួនពួកគេមានតិចជាងពីពេលមុន ក៏ប៉ុន្តែក្រុមបាតុកររាប់ពាន់នាក់ប្រឆាំងនឹងលោកមូបារ៉ាក់ដែលបោះជំរុំនៅលើទីលាន Tahrir នៃក្រុង Le Caire និយាយថាពួកគេនឹងមិនបោះបង់ចោលការប្រយុទ្ធរបស់ពួកគេទេរហូតដល់មេដឹកនាំរូបនេះនៃប្រទេស Egypt ដែលកាន់តំណែងជិត៣០ឆ្នាំមកហើយចុះចេញពីតំណែង។
ក្រុមប្រឆាំងនិយាយថាកិច្ចចរចារបស់ពួកគេជាមួយរដ្ឋាភិបាលលោកប្រធានាធិបតីមូបារ៉ាក់កាលពីថ្ងៃអាទិត្យមិនបានទទួលលទ្ធផលជាក់ស្តែងទេ។ ពួកគេថ្លែងថាការសន្ទនាគ្នាមិនទាន់ចប់នៅទ្បើយទេ ក៏ប៉ុន្តែពួកគេរង់ចាំឱ្យពួកមេដឹកនាំប្រទេសធ្វើសម្បទាននៅមុនពួកគេបញ្ឈប់បាតុកម្ម។ ពួក Muslim Brotherhood ដែលបានត្រូវហាមប្រាមបានយល់ព្រមចូលរួមក្នុងកិច្ចចរចានេះជាលើកដំបូង។
លោកប្រធានាធិបតីមូបារ៉ាក់បានធ្វើសម្បទានកាលពីសប្តាហ៍មុនដែលមានរួមបញ្ចូលការតែងតាំងអនុប្រធានាធិបតីម្នាក់ ការប្រកាសរបស់លោកថាលោកនឹងមិនឈរឈ្មោះសម្រាប់ការបោះឆ្នោតជាថ្មីនៅឆ្នាំនេះទេ ហើយពួកមេដឹកនាំជាន់ខ្ពស់របស់គណៈបក្សលោកក៏បានលាលែងចេញពីតំណែងផងដែរ។
ក្រុមបាតុករនិងមនុស្សខ្លះក្នុងចំណោមពួកប្រឆាំងចង់ឱ្យលោកមូបារ៉ាក់ចាកចេញពីអំណាច-និងពីប្រទេស-ជាបន្ទាន់។កាលពីថ្ងៃច័ន្ទ ជនជាតិ Egypt បានងើបពីដំណេកជាមួយភាពតានតឹងមួយថ្ងៃទៀត ក៏ប៉ុន្តែសញ្ញានៃភាពធម្មតាបានវិលត្រទ្បប់មកវិញយ៉ាងយឺតៗក្នុងរដ្ឋធានី។ ធនាគារបានបើកទ្វារជាថ្មីទ្បើងវិញក្រោយពីបានបិទទ្វារជាច្រើនថ្ងៃហើយមានចរាចរណែនក្តន់នៅក្នុងវិថីនានាជាលើកដំបូងក្នុងរយៈពេលជាងមួយសប្តាហ៍ពីព្រោះប្រជារាស្ត្រវិលត្រទ្បប់ទៅធ្វើការវិញ៕
ប្រែសម្រួលដោយឈឹម សុមេធ
