តម្លៃប្រេងសកលបានឡើងកប់ពពកនៅប៉ុន្មានថ្ងៃថ្មីៗនេះ ដែលជាការឆ្លើយតបទៅនឹងអសិ្ថរភាពនយោបាយនៅតំបន់មជ្ឈឹមបូព៌ា និងអាហ្វ្រិកខាងជើង។ សេដ្ឋវិទូមួយចំនួននៅទ្វីបអាស៊ីបារម្ភថា តម្លៃប្រេងនឹងធ្វើឲ្យអតិផរណាតម្លៃម្ហូបអាហារកាន់តែមានសភាពធ្ងន់ធ្ងរ។
សេដ្ឋកិច្ចអាស៊ីដែលពឹងផ្អែកលើការនាំចេញ និងការនាំចូលប្រេងនឹងប្រឈមទល់នឹងអតិផរណាខ្ពស់ជាងមុន ខណៈដែលតម្លៃប្រេងសកលឡើងដល់១០០ដុល្លារក្នុងមួយបារ៉ែល។
លោកអាយនុល ហាសាន (Aynul Hasan) គឺជាសេដ្ឋវិទូជាន់ខ្ពស់ម្នាក់នៅគណៈកម្មការសង្គម និងសេដ្ឋកិច្ចរបស់អង្គការសហប្រជាជាតិផ្នែកកិច្ចការអាស៊ីប៉ាស៊ីហ្វ៊ិក។ លោកមានប្រសាសន៍ថា តម្លៃប្រេង នាពេលនេះ អាស្រ័យលើភាពចលាចលផ្នែកនយោបាយនៅតំបន់មជ្ឈឹមបូព៌ា។ លោកបន្តថា៖
«តម្លៃប្រេងខ្ពស់គឺអាស្រ័យថា តើបញ្ហានឹងត្រូវដោះស្រាយបានរហ័សប៉ុណ្ណា? ច្បាស់ណាស់ថា នៅក្នុងស្ថានភាពមិនជាក់លាក់នេះនឹងមានការបង្អាក់ក្នុងរយៈពេលខ្លីមួយ។ ប្រទេសមួយចំនួនមានស្តុកប្រេងបម្រុងដែលអាចបន្តបានរយៈពេលពីរបីសប្តាហ៍។ ប៉ុន្តែបើសិនជាបញ្ហានឹងបន្តយូរជាងនេះ ពេលនោះពិតជាមានផលប៉ះពាល់។ សង្ឃឹមថា វានឹងមិនមានរឿងដូច្នេះទៅចុះ»។
លោកហាសានមានប្រសាសន៍ថា តម្លៃប្រេងអាចនឹងបង្កើនតម្លៃម្ហូបអាហារយ៉ាងលឿន ដែលបណ្តាលមកពីដំណាំឲ្យផលមិនល្អនៅក្នុងតំបន់ជាច្រើន និងតម្រូវការកើនឡើងនៅក្នុងប្រទេសជាច្រើន។
ធនាគារពិភពលោកបានព្រមានថា តម្លៃម្ហូបអាហារឡើងខ្ពស់ ដែលបង្កគ្រោះថា្នក់នេះ ទំនងជានឹងបន្តឡើងថ្លៃទៀត។ តម្លៃខ្ពស់អាហារឡើងថ្លៃកំពុងមានផលប៉ះពាល់ដល់មនុស្សក្រីក្ររាប់លាននាក់នៅអាស៊ីស្រេចទៅហើយ។ សេដ្ឋវិទូទាំងឡាយនៃធនាគារពិភពលោក និងគណៈកម្មការសង្គម និងសេដ្ឋកិច្ចរបស់អង្គការសហប្រជាជាតិផ្នែកកិច្ចការអាស៊ីប៉ាស៊ីហ្វិក ព្យាករណ៍ថា មានមនុស្សច្រើនថែមទៀតនឹងធ្លាក់ខ្លួនក្រ ដោយសារតែតម្លៃម្ហូបអាហារឡើងខ្ពស់នៅក្នុងឆ្នាំខាងមុខ។
លោកស៊ុផាវុដ សៃឈឿ សេដ្ឋវិទូម្នាក់ដែលធ្វើការនៅក្រុមហ៊ុនផាត្រា សិខ្ជួរីធី (Phatra Securities) ដែលសម្របសម្រួលផ្សារភាគហ៊ុនថៃ មានប្រសាសន៍ថា កំណើនសេដ្ឋកិច្ចអាស៊ី ដែលពឹងផ្អែកភាគច្រើនទៅលើការនាំចេញនោះ នឹងងាយរងផលប៉ះពាល់ពីតម្លៃប្រេងឡើងថ្លៃដ៏គំហុកនេះ។ លោកបន្តថា៖
«ប្រសិនបើតម្លៃប្រេងខ្ពស់គឺជាការរន្ធត់ផ្នែកផ្គត់ផ្គង់ដ៏ចម្បង ពីព្រោះតែការព្រួយបារម្ភអំពីប្រទេសលីប៊ី និងប្រទេសផលិតប្រេងដទៃទៀតមិនអាចផលិតប្រេងបាន នោះគឺជាការមិនល្អទេ ពីព្រោះប្រសិនបើមានការបន្ថយផលិតកម្មប្រេងទូទាំងសកល ហើយតម្លៃប្រេងខ្ពស់នោះ វានឹងមានផលប៉ះពាល់យ៉ាងធ្ងន់ធ្ងរដល់ប្រទេសថៃ និងតំបន់ទាំងមូល»។
ប្រទេសភាគច្រើននៅអាស៊ីនាំប្រេងចូលទាំងស្រុង។ ប្រទេសទាំងនោះរួមមានប្រទេសចិនដែលជាប្រទេសផលិតសម្ភារៈឧស្សាហកម្មដែលប្រើថាមពលច្រើន។
នៅក្នុងខែកក្កដា ឆ្នាំ២០០៧ ឧស្សាហកម្មអាកាសចរណ៍បានទទួលរងផលប៉ះពាល់យ៉ាងខ្លាំង នៅពេលដែលតម្លៃប្រេងឡើងខ្ពស់បំផុតមិនធ្លាប់មាន គឺឡើងដល់១៤៧ដុល្លារក្នុងមួយបារ៉ែល។ ការធ្លាក់ចុះយ៉ាងខ្លាំងនៃសេដ្ឋកិច្ចសកលនៅឆ្នាំ២០០៨បាននាំឲ្យមានការធ្លាក់ចុះចរាចរណ៍អ្នកធ្វើដំណើរ និងធ្វើឲ្យឧស្សាហកម្មនេះខាតបង់បន្ថែមទៀត។ តម្លៃហ៊ុនរបស់ក្រុមហ៊ុនអាកាសចរណ៍ធ្លាក់ចុះនៅប៉ុន្មានថ្ងៃចុងក្រោយនេះ ដោយសារតែអ្នកវិនិយោគខ្លាចផលចំណេញនៃវិស័យអាកាសចរណ៍អាចនឹងធ្លាក់ចុះម្តងទៀតក្នុងពេលឆាប់ៗ។
លោកស៊ុផាវុដនិយាយថា អនាគតទីផ្សារប្រេងរំពឹងថា នឹងមានភាពមិនច្បាស់លាស់រយៈពេលយ៉ាងហោចណាស់៦ខែ ទើបទីផ្សារត្រឡប់ទៅរកភាពដើមវិញ។
តម្រូវការប្រេងក្នុងពិភពលោកឡើងដល់ប្រហែល៩០លានបារ៉ែលក្នុងមួយថ្ងៃ ហើយប្រទេសលីប៊ីផ្តល់ប្រហែលមួយលានបារ៉ែល។
តម្លៃម្ហូបអាហារខ្ពស់ជាងមុន គួបផ្សំនិងស្ថានភាពសេដ្ឋកិច្ចយ៉ាប់យ៉ឺន បានធ្វើឲ្យមានការមិនសប្បាយចិត្តពីសំណាក់អ្នកប្រឆាំងតវ៉ានៅពាសពេញមជ្ឈឹមបូព៌ា។ នៅអាស៊ីបូព៌ា រដ្ឋាភិបាលជាច្រើនកំពុងតាមដានអតិផរណា ហើយបានចាត់វិធានការ ដូចជាបង្កើនអត្រាការប្រាក់ និងបន្ថយលំហូរទុនដើម្បីបន្ទាបអតិផរណា៕
ប្រែសម្រួលដោយ អ៊ឹម សុធារិទ្ធ
