អនុប្រធានធនាគារកណ្តាលសហភាពអឺរ៉ុប (ECB) លោក Luis de Guindos បាននិយាយកាលពីថ្ងៃចន្ទថា ផែនការចំណាយថវិការបស់លោក Donald Trump ដែលជាប្រធានាធិបតីជាប់ឆ្នោតនៃសហរដ្ឋអាមេរិក អាចធ្វើឱ្យមានឱនភាពថវិការបស់រដ្ឋាភិបាលអាមេរិកកាន់តែខ្លាំងឡើងនិងបង្កឱ្យមានក្ដីបារម្ភនៅលើទីផ្សារ។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន AFP។
លោក de Guindos បានថ្លែងក្នុងសន្និសីទស្ដីពីធនាគារក្នុងទីក្រុង Frankfurt ប្រទេសអាល្លឺម៉ង់ថា សហរដ្ឋអាមេរិកមានអនុបាតបំណុលសាធារណៈជិតស្មើនឹង ១០០% នៃផលទុនក្នុងស្រុកសរុប (GDP) របស់ប្រទេស និងឱនភាពចំណាយជិត ៧%។
លោក de Guindos ថ្លែងថា៖ «ប្រធានាធិបតីជាប់ឆ្នោត [លោក Trump] បានសន្យាកាត់ពន្ធនិងប្រហែលជាមិនកាត់ចំណាយសាធារណៈទេ»។
លោក de Guindos បានបន្ថែមថា ផែនការចំណាយរបស់លោក Trump នឹងធ្វើឱ្យឱនភាពកើនឡើងនិង «បង្កក្តីបារម្ភនៅលើទីផ្សារ»។
តាំងពីទទួលបានជ័យជម្នះក្នុងការបោះឆ្នោតប្រធានាធិបតីនៅដើមខែនេះមក លោក Trump មិនទាន់បានប្រកាសបេក្ខជនដែលនឹងត្រូវកាន់តំណែងជារដ្ឋមន្ត្រីហិរញ្ញវត្ថុរបស់លោកនៅឡើយទេ។
ប៉ុន្តែ ប្រធានាធិបតីជាប់ឆ្នោតរូបនេះបានតែងតាំងលោក Elon Musk ដែលជាអ្នកមានជាងគេបំផុតនៅលើពិភពលោក និងអ្នកជំនួញលោក Vivek Ramaswamy ឱ្យដឹកនាំក្រសួងប្រសិទ្ធផលរដ្ឋាភិបាលដែលទើបបង្កើតថ្មី។ រដ្ឋបាលថ្មីរបស់លោក Trump បានស្នើអ្នកទាំងពីរឱ្យកាត់ផ្តាច់ការិយាធិបតេយ្យជ្រុលហួសហេតុនិង «ការចំណាយខ្ជះខ្ជាយ» ខណៈលោក Musk បានសន្យាកាត់ចំណាយចំនួន ២ លានលានដុល្លារចេញពីថវិការដ្ឋាភិបាលសហព័ន្ធ៕
ធនាគារកណ្តាលសហភាពអឺរ៉ុបថាផែនការថវិការបស់លោក Trump អាចធ្វើឱ្យទីផ្សារតានតឹង
វេទិកាបញ្ចេញមតិ