មេដឹកនាំនៃប្រទេសជប៉ុន ចិននិងកូរ៉េខាងត្បូងបានបញ្ចប់សន្និសីទកំពូលរយៈពេលពីរថ្ងៃក្នុងរដ្ឋធានីតូក្យូកាលពីថ្ងៃអាទិត្យដោយបានព្រមព្រៀងធ្វើកិច្ចសហប្រតិបត្តិការស្តីពីបញ្ហាមួយចំនួនក្នុងតំបន់ រួមមានសុវត្ថិភាពនុយគ្លែអ៊ែរនិងពាណិជ្ជកម្មផង។សន្និសីទកំពូលកើតមានឡើងទើបតែពីរខែបន្ទាប់ពីការរំញ្ជួយផែនដីនិងរលកយក្សស៊ូណាមី (Tsunami) ដ៏ធំមួយដែលបានបំផ្លាញផ្នែកដ៏ធំមួយនៃប្រទេសជប៉ុន។
សន្និសីទកំពូលនេះជាការជួបប្រជុំលើកដំបូងនៃមេដឹកនាំបីប្រទេសចាប់តាំងពីគ្រោះមហន្តរាយក្នុងខែមីនាមក។ នាយករដ្ឋមន្រ្តីជប៉ុនណាវតូខាន (Naoto Kan) ដែលជាម្ចាស់ផ្ទះរៀបចំសន្និសីទនោះ បានសន្យាចែករំលែកព័ត៌មានលម្អិតពីវិបត្តិនុយគ្លែអ៊ែរ ដៃឈី (Daiichi) ក្នុងទីក្រុងហ៊្វូគូស៊ីម៉ា (Fukushima) ជាមួយប្រទេសជិតខាងទាំងពីរនេះ។
ចិននិងកូរ៉េខាងត្បូងកាលពីពេលមុនបានរិះគន់ជប៉ុនចំពោះការបញ្ចេញទឹកមានជាតិវិទ្យុសកម្មរាប់ពាន់តោនចូលទៅក្នុងមហាសមុទ្រប៉ាស៊ីហ្វិកដោយមិនបានប្រាប់ប្រទេសទាំងនោះជាមុន។ លោកខាន បានសម្តែងនូវការសោកស្តាយចំពោះការមិនបានប្រាប់ឲ្យដឹងក្នុងអម្លុងពេលសន្និសិទកំពូលនោះ។
លោក វ៉ិនចាបាវ (Wen Jiabao) នាយករដ្ឋមន្រ្តីចិននិងប្រធានាធិបតីកូរ៉េខាងត្បូងលីម្យុងបាក់ (Lee Myung Bak) បានចាប់ផ្តើមទស្សនកិច្ចនៅក្នុងប្រទេសជប៉ុនកាលពីថ្ងៃសៅរ៍ដើម្បីជួបជាមួយអ្នកនៅរស់រានមានជីវិតនៅក្នុងតំបន់មានមហន្តរាយហើយនឹងគោរពវិញាណក្ខន្ធដល់មនុស្ស២ម៉ឺន៤ពាន់នាក់ដែលបានសម្លាប់ឬបាត់ខ្លួន។
ប្រទេសទាំងពីរស្ថិតក្នុងបណ្តាប្រទេសដំបូងគេដែលស្នើសុំជួយប្រទេសជប៉ុនភ្លាមៗបន្ទាប់ពីការរញ្ជួយផែនដីមានកម្លាំង៩.0 ។
លើបញ្ហាពាណិជ្ជកម្មលោកនាយករដ្ឋមន្រ្តីជប៉ុន ណាវតូខានបានប្រាប់ពួកអ្នកយកព័ត៌មានថាមេដឹកនាំទាំងអស់បានព្រមព្រៀងគ្នាបង្កើនការប្រុងប្រៀបសម្រាប់កិច្ចព្រមព្រៀងពាណិជ្ជកម្មសេរីត្រីភាគី។
«លោក ខានមានប្រសាសន៍ថាកិច្ចព្រមព្រៀងនោះនឹងជួយលើកស្ទួយពាណិជ្ជកម្មរវាងប្រទេសទាំងបីហើយនឹងជួយទ្វីបអាស៊ីទាំងមូល»។
ទោះបីមានការទាក់ទងពាណិជ្ជកម្មក៏ដោយបញ្ហាប្រវត្តិសាស្រ្តជាពិសេសការធ្វើអាណានិគមរបស់ជប៉ុនក្នុងផ្នែកភាគច្រើនរបស់អាស៊ីក្នុងពាក់កណ្តាលទីមួយនៃសតវត្សរ៍ទី២០នៅតែជារឿងរសើប។
សេចក្តីប្រកាសរួមចុងក្រោយរបស់សន្និសីទកំពូលប្រាប់ឲ្យដឹងថាប្រទេសទាំងបីនឹងពង្រីកការផ្លាស់ប្តូរវប្បធម៌និងទេសចរណ៍ដើម្បីបង្កើនចំណងទាក់ទងមិត្តភាព។ ប្រទេសទាំងបីនេះក៏នឹងធ្វើឲ្យប្រសើរឡើងនូវថាមពលដែលអាចផលិតថែមទៀតហើយនឹងធ្វើកិច្ចសហប្រតិបត្តិការឲ្យកាន់តែជិតស្និទ្ធឡើងថែមទៀតលើសុវត្ថិភាពខាងនាវាចរហើយរុករកនិងការជួយសង្គ្រោះ។
មេដឹកនាំទាំងបីក៏បានពិភាក្សាស្ថានភាពសន្តិសុខក្នុងតំបន់អាស៊ីភាគឦសានដែរ។មេដឹកនាំទាំងបីបានបញ្ជាក់សារជាថ្មីនូវការចាប់អារម្មណ៍របស់ខ្លួនក្នុងការបន្តការចរចា៦ភាគីដែលបានជាប់គាំងស្តីពីកម្មវិធីនុយគ្លែអ៊េរដ៏ចម្រូងចម្រាស់របស់ប្រទេសកូរ៉េខាងជើង។
មេដឹកនាំទាំងបីបានធ្វើការពិភាក្សាអំពីអ្វីដែលនាយករដ្ឋមន្រ្តីចិន វ៉ិន បានហៅថាការផ្លាស់ប្តូរទស្សនៈដោយឥតលាក់លាមស្តីពីកូរ៉េខាងជើង។ លោក វ៉ិន បាននិយាយឡើងវិញពីសារៈសំខាន់នៃការបន្តការពិភាក្សាដើម្បីធ្វើឲ្យការចរចានោះចាប់ផ្តើមឡើងវិញ។
លោក ខាន លោក វ៉ិន និងលោក លីបានសម្តែងនូវសេចក្តីព្រួយកង្វល់លើការអះអាងរបស់កូរ៉េខាងជើងពីកម្មវិធីសម្រិតសម្រាំងជាតិអ៊ុយរ៉ានីញ៉ូមហើយបាននិយាយឡើងវិញនូវបំណងប្រាថ្នារបស់អស់លោកធ្វើឲ្យឧបទ្វីបកូរ៉េគ្មានអាវុធនុយគ្លេអ៊ែរ។
នៅខាងក្រៅសន្និសីទកំពូលជំនួបទ្វេភាគីក៏ត្រូវបានធ្វើឡើងដែរ។ នាយករដ្ឋមន្រ្តីចិនបានថ្លែងត្រួសៗប្រាប់នាយករដ្ឋមន្រ្តីជប៉ុនស្តីពីទស្សនកិច្ចរបស់លោក គិមជុងអ៊ិល (Kim Jong Il) កាលពីពេលថ្មីៗនេះទៅកាន់ប្រទេសចិនហើយបានយល់ព្រមបន្ធូរបន្ថយការរឹតត្បិតដែលត្រូវបានដាក់ទៅលើការនាំចូលម្ហូបអាហារបន្ទាប់ពីឧបទ្ទវហេតុនុយគ្លែអ៊ែរហ្វ៊ូគូស៊ីម៉ា។
មេដឹកនាំទាំងអស់ក៏បានចាប់ផ្តើមប្រុងប្រៀបរៀបចំដំណើរបំពេញទស្សនកិច្ចជាផ្លូវការរបស់នាយករដ្ឋមន្រ្តីជប៉ុន ខាន ទៅកាន់ប្រទេសចិននៅពេលណាមួយនៅចុងឆ្នាំនេះ។
ជំនួបរវាងជប៉ុននិងកូរ៉េខាងត្បូងមានការជឿនលឿនទៅមុខដល់ការប្រគល់ឯកសារប្រវត្តិសាស្រ្តជាង១ពាន់២រយក្បាលដែលជប៉ុនបានយកទុកចាប់តាំងពីខ្លួនបានបញ្ចប់ការត្រួតត្រាអាណានិគមប្រទេសកូរ៉េក្នុងឆ្នាំ១៩៤៥។ ប្រទេសទាំងពីរក៏បានពិភាក្សាកិច្ចខិតខំប្រឹងប្រែងស្ថាបនាឡើងវិញនៅតំបន់ដែលទទួលរងមហន្តរាយភាគឦសាននៃប្រទេសជប៉ុន។
សន្និសីទកំពូលនេះជាជំនួបប្រចាំឆ្នាំលើកទី៤រវាងប្រទេសទាំងបី។សន្និសីទកំពូលលើកទី៥នឹងធ្វើឡើងនៅក្នុងប្រទេសចិននៅឆ្នាំក្រោយ។
ប្រែសម្រួលដោយ ជឹង ប៉ូជីន
