ការទាមទារឲ្យផ្លាស់ប្ដូរទាំងស្រុងលើច្បាប់ស្តីពីការសេពគ្រឿងស្រវឹងក្នុងក្រុង Tennant Creek ដែលស្ថិតនៅប៉ែកខាងជើងប្រទេសអូស្ត្រាលី បានកើតមានឡើង បន្ទាប់ពីមានការចោទប្រកាន់ថា មានករណីរំលោភសេពសន្ថវៈលើទារកជនជាតិដើមម្នាក់អាយុ២ឆ្នាំ និងមានការធ្វើអត្តឃាតជាច្រើនទៀត។
ក្រុមវេជ្ជបណ្ឌិតបានពិភាក្សានៅក្នុងកិច្ចប្រជុំសាធារណៈមួយអំពីរបៀបដែលពួកគេអាចព្យាបាលស្ត្រីមានគភ៌ជាច្រើនដែលស្រវឹងនិងជនជាតិដើមផ្សេងទៀតដែលត្រូវបានគេវាយប្រហារឬប៉ុនប៉ងធ្វើអត្តឃាត ក្នុងពេលកំពុងស្រវឹង។ ក្រុមវេជ្ជបណ្ឌិតទាំងនោះក៏ព្យាបាលកុមារតូចៗដែលមានរោគសញ្ញាមួយចំនួនបណ្តាលមកពីគ្រឿងស្រវឹង ដែលអាចបង្កឲ្យប៉ះពាល់ដល់សុខភាពផ្លូវកាយនិងផ្នែកបញ្ញាស្មារតីនៅពេលដែលទារកកើតមក ដែលកើតឡើងដោយសារតែស្ត្រីមានគភ៌សេពគ្រឿងស្រវឹងហួសកម្រិតផងដែរ។
ក្រុង Tennant Creek មានប្រជាជនប្រមាណ៣០០០នាក់។ ប្រហែលពាក់កណ្តាលនៃចំនួនប្រជាជនសរុបគឺជាជនជាតិដើមអូស្ត្រាលី ហើយអត្រាគ្មានការងារធ្វើរបស់ពួកគេមានកម្រិតខ្ពស់ មានបញ្ហាសុខភាព និងមានសមាជិកគ្រួសារច្រើនរស់នៅក្នុងផ្ទះតែមួយ ខណៈដែលសហគមន៍នេះក៏កំពុងជួបប្រទះនឹងការបំពានគ្រឿងស្រវឹងនិងអំពើហិង្សា។ នៅទូទាំងប្រទេស អ្នកស្រុកជនជាតិដើមរបស់អូស្ត្រាលីមានប្រហែលបីភាគរយនៃចំនួនប្រជាជនសរុប ប៉ុន្តែតួលេខឧក្រិដ្ឋកម្មក្នុងចំណោមពួកគេមានភាគរយខ្ពស់ទៅវិញ។
អាជ្ញាធរនៅភាគខាងជើងអូស្ត្រាលីនិយាយថា ក្នុងរយៈពេលពីរសប្តាហ៍ចុងក្រោយនេះ ដែលមានការដាក់កំហិតទៅលើការលក់គ្រឿងស្រវឹង បានធ្វើឲ្យក្រុង Tennant Creek មានសុវត្ថិភាពជាងមុន។ ក្នុងអំឡុងពេលនោះ មានការដាក់កម្រិតទៅ លើម៉ោងដែលអាចលក់គ្រឿងស្រវឹងបាន និងបរិមាណស្រាបៀរឬស្រាដែលអតិថិជនអាចទិញបាន។
លោក Steve Edgington អភិបាលក្រុង Tennant Creek និយាយថា មានការយល់ឃើញខុសគ្នាទៅលើគំនិតនេះនៅក្នុងសហគមន៍មូលដ្ឋាន។
«ប៉ូលិសក្នុងស្រុកកំពុងតែប្រាប់ខ្ញុំថា ការដាក់កំហិតនេះមានប្រសិទ្ធភាពណាស់។ ការលក់គ្រឿងស្រវឹងតែបីម៉ោងក្នុងមួយថ្ងៃពិតជាបានកាត់បន្ថយការផ្គត់ផ្គង់និងការសេពគ្រឿងស្រវឹង។ សមាជិកសហគមន៍ផ្សេងទៀតគិតថា ការដាក់កំហិតនេះគួរតែមានលក្ខណៈទូលំទូលាយជាងនេះ ហើយអ្នកខ្លះនិយាយថា ការដែលអាចទិញស្រាបៀរមួយយួរក្នុងមួយថ្ងៃនៅតែច្រើនហួសហេតុ ហើយពួកគេចង់ឃើញការដាក់កំហិតឲ្យលើសពីនេះ។ ដូច្នេះខ្ញុំឭគំនិតខុសៗគ្នាពីអ្នកផ្សេងៗនៅក្នុងសហគមន៍នេះ»។
ទោះជាយ៉ាងណាក៏ដោយ ក៏ក្រុមវេជ្ជបណ្ឌិតព្រមានថា ដំណោះស្រាយរយៈពេលវែងដើម្បីកាត់បន្ថយអំពើហិង្សាដែលបង្កឡើងដោយគ្រឿងស្រវឹងគឺចាំបាច់ណាស់។ ក្រុមវេជ្ជបណ្ឌិតទាំងនោះក៏បានទទូចឲ្យមានការហាមឃាត់រយៈពេល៥ឆ្នាំទៅលើការសេពគ្រឿងស្រវឹង ក្នុងក្រុងដែលមានចម្ងាយ១០០០គីឡូម៉ែត្រប៉ែកខាងត្បូងទីក្រុង Darwin ដែលនឹងអាចជួយដល់អ្នកស្រុកឲ្យល្អប្រសើរឡើងវិញ។
គ្រឿងស្រវឹងត្រូវបានហាមឃាត់នៅក្នុងសហគមន៍ជនជាតិដើមជាច្រើន ដោយមានការគាំទ្រពេញទំហឹងពីមេដឹកនាំកុលសម្ព័ន្ធ។ ការរត់ពន្ធគ្រឿងស្រវឹងទៅក្នុងតំបន់ទាំងនេះដែលគេហៅថា «តំបន់ស្ងួត» អាចនឹងត្រូវរងការផាកពិន័យធ្ងន់ធ្ងរ។
ក្នុងរយៈពេលពីរសប្តាហ៍នេះ អ្នករស់នៅក្នុងក្រុង Tennant Creek ទាំងមូល ត្រូវបានដាក់កំហិតទៅលើការសេពគ្រឿងស្រវឹង៕
ប្រែសម្រួលដោយ ហុង ចិន្តា
