ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ទោះបី​មាន​ការដោះលែង​សកម្មជន​ក៏ដោយ​ វៀតណាម​នៅ​បន្តការគាប​សង្កត់​លើ​អ្នក​រិះ​គន់​និង​អ្នក​ប្រឆាំង​


លោក​ Nguyen Van Dai ​មេធាវី​ខាង​សិទ្ធិ​មនុស្ស ពេល​ជំនុំ​ជំរះ​កាត់​សេចក្ដី​នៅ​តុលាការ​ឧទ្ធរណ៍​​នៃតុលាការ​កំពូល​ប្រជាជន​វៀតណាម​នៅ​ទីក្រុង​ហាណូយ​​ ពេល​ដែល​មេធាវី​សិទ្ធិ​មនុស្ស​លោក​ Le Thi Cong Nhan ​អង្គុយ​ស្ដាប់​នៅ​ខាង​ក្រោយ​។​
លោក​ Nguyen Van Dai ​មេធាវី​ខាង​សិទ្ធិ​មនុស្ស ពេល​ជំនុំ​ជំរះ​កាត់​សេចក្ដី​នៅ​តុលាការ​ឧទ្ធរណ៍​​នៃតុលាការ​កំពូល​ប្រជាជន​វៀតណាម​នៅ​ទីក្រុង​ហាណូយ​​ ពេល​ដែល​មេធាវី​សិទ្ធិ​មនុស្ស​លោក​ Le Thi Cong Nhan ​អង្គុយ​ស្ដាប់​នៅ​ខាង​ក្រោយ​។​

ពួក​អ្នក​វិភាគ​និយាយ​ថា​ នៅខណៈពេល​ដែល​វៀតណាម​ដោះលែង​សកម្មជននិយម​លទ្ធិ​ប្រជាធិបតេយ្យ​នាំមុខ​ម្នាក់​ ពួក​អាជ្ញាធរ​វៀត​ណាម​បាន​នៅ​បន្ត​ការរឹត​បន្តឹង​លើ​ការប្រឆាំង​នយោបាយ​ក្នុង​រយៈពេល​ប៉ុន្មាន​ឆ្នាំថ្មីៗ​នេះ។

នៅ​ខែ​នេះ​ វៀតណាម​បាន​ដោះលែង​មេធាវី​សិទ្ធិ​មនុស្ស​ដ៏​ល្បី​ល្បាញ​ម្នាក់​ចេញ​ពី​គុក​ ក៏ប៉ុន្តែ​ពួក​អ្នក​វិភាគនិយាយ​ថា​ពួក​អាជ្ញាធរ​វៀតណាម​កំពុង​បន្ត​ការ​ត្រួតត្រា​ដ៏​តឹងរឹង​ទៅលើ​ពួក​អ្នក​ប្រឆាំង​នយោបាយ​ហើយ​នឹង​សកម្មជន​និយម​លទ្ធិ​ប្រជាធិបតេយ្យ ។

លោក ​ង្វៀន វ៉ាន់ដាយ(Nguyen​ Van​ Dai) ​មេធាវី​អាយុ​៤២​ឆ្នាំ​ បាន​ត្រូវ​ដោះលែង​កាល​ពី​ថ្ងៃ​ទី​៦​ខែ​មីនា បន្ទាប់ពី​ជាប់​គុក​រយៈពេល​៤​ឆ្នាំ​ហើយ​លោក​នឹង​ស្ថិត​នៅ​ក្រោមការ​ឃុំឃាំង​ក្នុង​ផ្ទះ​រយៈពេល​៤​ឆ្នាំ​ទៀត។ លោក​បាន​ត្រូវ​កាត់ទោស​ក្នុង​ឆ្នាំ​២០០៧​ចំពោះ​ការចុះផ្សាយ​ក្នុង​គេហទំព័រ​ដែល​គាំទ្រ​ឱ្យ​មាន​រដ្ឋ​មាន​គណបក្ស​ច្រើន។

លោក ​ខាល ថៃយ័រ (Carl Thayer) ​ជា​សាស្ត្រាចារ្យ​ចូលនិវត្តន៍​នៅ​សកល​វិទ្យាល័យ New ​South​ Wales ​ក្នុង​ប្រទេស​អូស្រ្តាលី​ បាន​ប្រាប់ ​VOA ​សំឡេង​សហរដ្ឋ​អាមេរិក​ថា​ពួក​អាជ្ញាធរ​វៀតណាម​ បាន​ដោះលែង​លោក ង្វៀន វ៉ាន់ដាយ​ទៅ​តាម​ពេល​កំណត់ ​ក៏ប៉ុន្តែ​ពួកគេ​នឹង​មិន​ស្ទាក់ស្ទើរ​ចាប់​មេធាវី​សិទ្ធិ​មនុស្ស​នោះ​ម្តង​ទៀត​ទេ​ប្រសិនបើ​លោក​បន្ត​ការតវ៉ា​របស់​លោក​នោះ។

លោក​ថៃយ័រ​មាន​ប្រសាសន៍​បន្ត​ទៀត​ថា​វៀតណាម​ក្នុងរយៈពេល​ប៉ុន្មាន​ឆ្នាំ​ថ្មី​ៗនេះ​ បាន​បង្ក្រាប​ចលនានិយម​លទ្ធិ​ប្រជាធិបតេយ្យ​យ៉ាង​ធំ​ លោក​បាន​កត់​សម្គាល់​ទៀត​ថា​ពួក​មេដឹកនាំ​វៀតណាម​មុន​ពេល​សមាជ​គណបក្ស​កុម្មុយនិស្ត​ខែ​មករា​ បាន​អំពាវ​នាវ​ឲ្យ​ចាត់​វិធានការ​ប្រឆាំង​ជនជាតិ​វៀតណាម​ដែល​បង្កើត​គណបក្ស​នយោបាយ​និង​ក្រុម​ប្រឆាំង។

លោក​ ថៃយ័រ​ មាន​ប្រសាសន៍​បន្ត​ទៀត​ថា​ការពិភាក្សា​បដិវត្តន៍​ណា​មួយ​ក្នុង​ប្រទេស​វៀតណាម​ មិន​មាន​ភាព​ជាប់លាប់​ទេ។

«ចលនា​និយម​លទ្ធិ​ប្រជាធិបតេយ្យ​បាន​ត្រូវ​គេ​កាត់ផ្តាច់​និង​មិន​មាន​មេដឹកនាំ ហើយ​ខ្ញុំ​គិតថា​បណ្តាញ​ដែល​បាន​ផុសចេញ​ពី​ឆ្នាំ​២០០៦​ដល់​ឆ្នាំ​២០០៨​បាន​ត្រូវ​ចាត់វិធានការ​បំបាត់​ចោល​ដ៏​មាន​ប្រសិទ្ធភាព​នៅពេល​នោះ»។

លោក ​ថៃយ័រ​ មាន​ប្រសាសន៍​បន្ត​ទៀត​ថា​ដើម្បី​ធ្វើ​ឲ្យ​មហិច្ឆតា​ខាង​នយោបាយ​របស់​ខ្លួន​ជឿន​លឿន​ទៅមុខ ​វៀតណាម​បន្ធូរ​ការគាបសង្កត់​មួយរយៈពេល​ទៅ​លើ​ពួក​សកម្មជន​សិទ្ធិ​មនុស្ស​នៅ​ក្នុង​ការចូលរួម​នៃ​ដំណើរ​បំពេញ​ទស្សនកិច្ច​ផ្លូវ​រដ្ឋ​កម្រិត​ខ្ពស់ ឬ​ធ្វើទៅតាម​សំណើ​រដ្ឋាភិបាល​បរទេស​ ជាពិសេស​សហរដ្ឋ​អា​មេ​រិក។

លោក​ ហ្វីល រ៉ូប៊ឺតសុន (Phil ​Robertson) ​អនុប្រធាន​ទទួល​បន្ទុក​តំបន់​អាស៊ី​របស់​អង្គការ​សិទ្ធិ​មនុស្ស​ Human​ Rights ​Watch​ មាន​ប្រសាសន៍​ថា ​វៀតណាម​យូរ​ៗម្តង​បាន​បន្ធូរ​បន្ថយ​ការបង្ក្រាប​ខាង​នយោបាយ​ក្នុង​ស្រុក​ដើម្បី​ផ្គាប់ផ្គុន​អែបអប​ខាង​ការទូត​នៅ​សន្និសីទ​ពហុភាគី​និង​ការចរចា​ពាណិជ្ជកម្ម​ ក៏ប៉ុន្តែ​ជានិច្ច​កាល​ព្យាយាម​រក្សា​នយោបាយ​ដែល​ធ្វើ​ឲ្យ​ប្រាកដ​ប្រជា​ថា​មិន​មាន​ចលនា​ប្រឆាំង​ដ៏​ធំ​កើនឡើង​នៅ​ក្នុង​សង្គម​វៀតណាម។

លោក​មាន​ប្រសាសន៍​បន្ត​ទៀត​ថា​ វៀតណាម​ បាន​ពង្រីក​ការឈ្លប​មើល​លើប្រព័ន្ធ​អ៊ីនធឺណិត​ដោយ​ភ័យខ្លាច​ពួក​អ្នកសសេរ​ blog ​និង​ពួក​អ្នកប្រឆាំង​ដែល​កំពុង​ឆ្លើយតប​ដល់​ការងើប​បះបោរ​ជា​សាធារណៈ​នៅ​ពាស​ពេញ​តំបន់​អា​ហ្វ្រិក​ខាង​ជើង។

«ខ្ញុំ​រំពឹង​ថា​ យើង​នឹង​ឃើញ​ការបង្ក្រាប​ដ៏​ធំ​ជាង​នេះ​ទៅលើ​សេរីភាព​នៃ​ការ​បញ្ចេញ​មតិ​ពីព្រោះ​តែ​រដ្ឋាភិបាល​វៀតណាម​បាន​ចាប់ផ្តើម​ដឹង​ខ្លួន​ថា​ក្រុម​ផ្សេង​ៗ មិន​ថា​តើ​ក្រុម​ទាំងនោះ​ជា​មនុស្ស​ដែល​ធ្វើ​យុទ្ធនាការ​អំពី​ដីធ្លី​ឬ​ពី​បញ្ហា​រ​បស់សិទ្ធិ​កម្មករ​ មនុស្ស​ដែល​ពាក់ព័ន្ធ​ជាមួយ​ក្រុម​ជនជាតិ​ភាគតិច​ក្នុង​តំបន់​ខ្ពង់រាប​កណ្តាល​ទេ​ មនុស្ស​ទាំងអស់​នេះ ​កំពុង​ចាប់ផ្តើម​ធ្វើ​ការទាក់ទង​គ្នា​កាន់​តែប្រសើរ​ឡើង​តាមរយៈ​ប្រព័ន្ធ​អ៊ីនធឺណិត។ ហើយ​ខ្ញុំ​គិត​ថា​អ្វី​ដែល​អស់លោក​អ្នក ​នឹងឃើញ​នៅពេល​នេះ​នៅពេល​ដែល​ការបង្ក្រាប ​នឹង​កើត​មាន​ឡើង​ ​ចល​នាមនុស្ស​ជា​ច្រើន​បាន​ចូល​ទៅ​ក្នុងពិភព​អ៊ីនធឺណិត​រួចទៅហើយ​ដែល​នៅពេល​ឥឡូវ​នេះ​ ពួកគេ​អាច​ទាក់ទង​គ្នា​ហើយ​បញ្ចេញ​ទស្សនៈ​របស់​ខ្លួន»។

លោក​ Robertson ​មាន​ប្រសាសន៍​ថា​ ការបន្ត​ផ្តោតការ​យកចិត្ត​ទុកដាក់​របស់​វៀតណាម​សាជា​ថ្មី​លើ​សកម្មជន​និយម​លទ្ធិ​ប្រជាធិបតេយ្យ​ ង្វៀន វ៉ាន់​ក្វេ (Nguyen​ Dan​ Que) បាន​បង្ហាញ​ថា​រដ្ឋាភិបាល​បង្កើន​ការភ័យខ្លាច​លើ​អ្នក​ប្រឆាំង​តាម​គេហទំព័រ។

លោក​បាន​ត្រូវ​ចាប់ខ្លួន​កាលពី​ថ្ងៃ​ទី​២៦​ ខែ​កុម្ភៈ ​នៅ​ថ្ងៃ​ស្របគ្នា​ដែល​លោក​បាន​និពន្ធ​ពី​ការបញ្ចេញ​គំនិត​ខ្លី​ៗរបស់​លោក​នៅ​ក្នុង​កាសែត​ Washington ​Post​ ដែល​ជា​កាសែត​សហរដ្ឋ​អាមេរិក​ ដែល​ជំទាស់​នឹង​អ្វី​ដែល​លោក​បាន​អះអាង​ថា​ជា​ការមិន​អើពើ​របស់​រដ្ឋាភិបាល​ទីក្រុង​ហាណូយ​ដល់​សិទ្ធិ​មនុស្ស​និង​ច្បាប់អន្តរជាតិ។

មួយ​សប្តាហ៍​មុន​ពេល​ការចាប់​ខ្លួន​ លោក​ ក្វេ ​ដែល​មាន​អាយុ​៦៩​ឆ្នាំ ​បាន​ចុះផ្សាយ​ក្នុង​គេហទំព័រ​ដែល​អំពាវនាវ​ឲ្យ​ពួក​យុវជន​ក្មេង​ៗជំទាស់​ប្រឆាំង​នឹង​គណបក្ស​កុម្មុយនិស្ត​វៀតណាម​ដោយ​ការ​ធ្វើបាតុកម្ម​នៅតាម​ផ្លូវ​មាន​ការសម្រប​សម្រួល​គ្នា​ ដោយ​ប្រើប្រាស់​ទូរស័ព្ទ​ចល័ត​និង​ប្រព័ន្ធ​អ៊ីនធឺណិត។

បណ្តាញ​ផ្សាយ​ព័ត៌មាន​ដែល​ត្រួតត្រា​ដោយ​រដ្ឋ​របស់​វៀតណាម​ ប្រាប់​ឲ្យ​ដឹង​ថា​លោក ​ក្វេ​ បាន​ត្រូវ​ដោះលែង​ដោយសា​បាន​បង់ប្រាក់​ធានា​កាល​ពីថ្ងៃ​ទី​២៧​ ខែ​កុម្ភៈ​បន្ទាប់​ពី​ត្រូវ​បាន​ឃុំ​ខ្លួន​រយៈពេល​មួយ​យប់​ក្នុង​បទ​ចោទប្រកាន់​ពី​ការព្យាយាម​ផ្តួល​រំលំ​រដ្ឋា​ភិបាល​វៀតណាម។

ប្រែ​សម្រួល​ដោយ​ជឹង​ ប៉ូជីន។

XS
SM
MD
LG