ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សួន​ប្រជាធិប​តេយ្យ​បង្កើត​ឡើង​ខុស​គោលដៅ ​និង​បង្គ្រប់​កិច្ច


កម្មករ​ធ្វើ​បាតុកម្ម​ប្រឆាំង​ការ​រំលោភ​សិទ្ធិ​ការងារ។
កម្មករ​ធ្វើ​បាតុកម្ម​ប្រឆាំង​ការ​រំលោភ​សិទ្ធិ​ការងារ។

ភ្នំពេញ៖ មន្រ្តី​គណបក្ស​ប្រឆាំង​និង​អង្គការ​សង្គម​ស៊ីវិលបាន​និយាយ​ថា​ ​សួន​ប្រជាធិប​តេយ្យ​ដែល​សាលា​ក្រុង​ភ្នំពេញ​គ្រោង​នឹង​ដាក់​សម្ពោធ​ឲ្យ​ប្រើបា្រស់​នៅ​ថ្ងៃ​ព្រហស្បតិ៍​ខាង​មុខ​នេះ​ ​នឹង​មិន​ធ្វើ​ឲ្យ​សេរីភាព​បញ្ចេញ​មតិ​នៅ​កម្ពុជា​បាន​ប្រសើរ​ឡើង​ទេ​ ​ផ្ទុយ​ទៅ​វិញ​វា​នឹង​ធ្វើ​ឲ្យ​ការ​សំដែង​មតិ​កាន់​តែ​ធ្លាក់​ចុះ។​ សួន​ប្រជាធិប​តេយ្យ​នេះ​អនុញ្ញាត​ឲ្យ​ការ​ជួប​ប្រជុំ​ដើម្បី​សំដែង​មតិ​ផ្សេងៗ​ត្រឹម​តែ​២០០​នាក់​ប៉ុណ្ណោះ។

មន្រ្តី​គណបក្ស​ប្រឆាំង​និង​មន្រ្តី​អង្គការ​សង្គម​ស៊ីវិល​ ​នៅ​ថ្ងៃ​អង្គារ​នេះ​ ​បាន​ធ្វើ​ការ​រិះគន់​ចំៗ​ ចំពោះ​សួន​ប្រជាធិប​តេយ្យ​ដែល​សាលា​ក្រុង​ភ្នំពេញ​គ្រោង​នឹង​ដាក់​សម្ពោធ​ឲ្យ​ប្រើ​ប្រាស់​ជា​ផ្លូវ​ការ​នៅ​ថ្ងៃ​ព្រហស្បតិ៍​ខាង​មុខ​នេះ។ ​ពួក​គាត់​និយាយ​ថា​ សួន​នេះ​នឹង​មិន​ធ្វើ​ឲ្យ​ការ​សំដែង​មតិ​មាន​លក្ខណៈ​ល្អ​ប្រសើរ​ឡើង​ទេ។

សួន​ប្រជាធិប​តេយ្យ​នេះ​មាន​ទំហំ​ជាង​១២០០​ម៉ែត្រ​ក្រឡា​ ​ដែល​មាន​ទីតាំង​នៅ​ខាង​ក្រោយ​ស្ថានទូត​សហ​រដ្ឋ​អាមេរិក​ ​ខ័ណ្ឌ​ដូនពេញ។ ​ទីតាំង​នេះ​មាន​បន្ទប់​ទឹក​ចំនួន​ប្រាំបី​ ​ក៏​ប៉ុន្តែ​បរិវេណ​បញ្ចេញ​មតិ​នេះ​គ្មាន​ដើម​ឈើ​សម្រាប់​ជ្រក​ទេ​ ​គឺ​មាន​តែ​ដើម​ឈើ​តូចៗ​ ដែល​សាលា​ក្រុង​បាន​ដាំ​នៅ​តាម​សងខាង​ផ្លូវ​តែ​ប៉ុណ្ណោះ។

សួន​ប្រជាធិប​តេយ្យ​នេះ​បាន​ធ្វើឡើង​ក្រោយ​ពី​រដ្ឋ​សភា​របស់​ប្រទេស​កម្ពុជា​បាន​អនុម័ត​ច្បាប់​ធ្វើ​បាតុកម្ម​ដោយ​សន្តិវិធី​កាល​ពី​ខែតុលា។ ​ហើយ​ការ​សំដែង​មតិ​នៅ​ក្នុង​សួន​ប្រជាធិប​តេយ្យ​នេះ​ត្រូវ​បាន​អនុញ្ញាត​ឲ្យ​មាន​អ្នក​ចូលរួម​ប្រមាណ​តែ​២០០​នាក់​ប៉ុណ្ណោះ​ ​ដោយ​ចាប់​ផ្តើម​ពី​ម៉ោង​៦​ព្រឹក​រហូត​ដល់​ម៉ោង៦​ល្ងាច។

អ្នក​រក​ស៊ី​លក់​រថយន្ត​មួយរូប​ ​ដែល​បាន​សុំ​មិន​បញ្ចេញ​ឈ្មោះ​ ហើយ​កំពុង​អង្គុយ​នៅ​ក្រោម​ ម្លប់​ដើមឈើ​មួយ​កណ្តាល​ថ្ងៃ​ត្រង់​ក្បែរ​បរិវេណ​សួន​ប្រជាធិប​តេយ្យ​នេះ​ ​បាន​និយាយ​ថា​ លោក​គាំទ្រ​ឲ្យ​មាន​បរិវេណ​សំដែង​មតិ​នេះ។​ លោក​បាន​មាន​ប្រសាសន៍​ទៀត​ថា​ ​ការ​កំណត់​ទីតាំង​ដើម្បី​សំដែង​មតិនេះគឺ​ដើម្បី ​ជៀសវាង​ការ​តវ៉ា​នៅ​តាម​ទី​សាធារណៈ​នានា​ ដែល​ធ្វើ​ឲ្យ​ប៉ះពាល់​ដល់​សណ្តាប់​ធ្នាប់​សាធារណៈ។

«កន្លែង​ណា​ដែល​មិន​ប៉ះពាល់​ប្រជាជន​ទីមួយ​ ​ទីពីរ​គឺ​កុំ​ឲ្យ​ប៉ះពាល់​ដល់​សម្បត្តិ​សាធារណៈ។​ ​កន្លែង​ណា​ទូលាយ​ ​ដែល​អាច​ឈរ​ជើង​បាន​ ​គឺ​កន្លែង​ហ្នឹងជា​កន្លែង​ត្រឹមត្រូវ​របស់​គេ​ហើយ»។

លោក​រ៉ុង ឈុន ​ប្រធាន​សមាគម​គ្រួ​បង្រៀន​ឯករាជ្យ​កម្ពុជា​ ដែល​ធ្លាប់​តែ​ដឹកនាំ​ធ្វើ​ការ​តវ៉ា​ផ្សេងៗ​ ​នៅ​តាម​ទី​សាធារណៈ​ ​បាន​មាន​ប្រសាសន៍​ថា​ ​ការ​កំណត់​ទីតាំង​ឲ្យ​ធ្វើការ​ជួប​ប្រជុំ​ បែប​នេះ​គឺធ្វើ​ឲ្យ​សេរីភាព​បញ្ចេញ​មតិ​ធ្លាក់​ចុះ។

លោក​រ៉ុង​ ​ឈុន​បាន​និយាយ​ថា​ ​បើ​ទោះបី​ជា​មាន​ទីតាំង​សួន​ប្រជាធិប​តេយ្យ​សម្រាប់​ធ្វើការ​សំដែង​មតិ​នៅ​ទីនេះ​ក៏ដោយ​ ​ក៏​លោក​នឹង​មិន​យក​កន្លែង​នេះ​ធ្វើការ​តវ៉ា​ដើម្បី​សំដែង​មតិ​ទេ។​លោក​បាន​មាន​ប្រសាសន៍​ថា​ ​លោក​នឹង​យក​ទីតាំង​តាម​ទី​សាធារណៈ​ផ្សេងៗ​ដែល​លោក​បាន​កំណត់​ ​ហើយ​លោក​គ្រាន់តែ​ជូន​ដំណឹង​ទៅ​សាលាក្រុង​តែ​ប៉ុណ្ណោះ​ ​ដើម្បី​ធ្វើ​ការ​តវ៉ា​ ​និង​ជួប​ប្រជុំ​គ្នា​ដើម្បី​សំដែង​មតិ។

«បើ​ជំហរ​របស់​យើង​គឺ​យើង​នឹង​ធ្វើអ្វី​ទៅតាម​អ្វី​យើង​គ្រោងទុក​ ​ហើយ​យើង​ចង់​សំដែង​នៅ​មុខ​ស្ថាប័ន​ពាក់​ព័ន្ធ។ ​យើង​អត់​អាច​ទៅ​សំដែង​នៅ​ក្នុង​សួន​សេរីភាព​ ដែល​ដាច់​ស្រយាល​ឆ្ងាយ​ពី​ស្ថាប័ន​ជាតិ​កំពូល​ទេ»។

លោក​យឹម សុវណ្ណ ​អ្នក​តំណាងរាស្រ្ត​ និង​ជា​អ្នក​នាំពាក្យ​គណបក្ស​ប្រឆាំង​ ​បាន​និយាយ​ថា​ ​ទីតាំង​ដែល​សាលាក្រុង​បាន​កំណត់​នោះ​ គឺ​នៅ​ឆ្ងាយ​ពី​ស្ថាប័ន​ជាតិ​សំខាន់ៗ​ ​ដូច្នេះ​ការ​តវ៉ា​ ​ដើម្បី​សំដែង​មតិ​មិន​បាន​ទទួល​លទ្ធផល​ជា​វិជ្ជមានទៅ​តាម​បំណង​ប្រាថ្នា​របស់​អ្នក​តវ៉ា​ទេ។

«បើ​ដាក់​ឆ្ងាយ​ពី​កន្លែង​ហ្នឹង​ ​សួរ​ថា​តើ​ស្ថាប័ន​ទាំងអស់​ហ្នឹង​បាន​ដឹង​ឮ​ដែរ​ឬ​ទេ? ​ដូច្នេះ​ខ្ញុំ​យល់​ឃើញ​ថា​ ​គួរ​តែ​រក​ទី​កន្លែង​ណា ​ដែល​គៀក​នឹង​ស្ថាប័ន​ដែល​ធ្វើ​សេចក្តី​សម្រេច​សំខាន់ៗ​ ដើម្បី​ឲ្យ​គាត់​បាន​ស្វែង​យល់​ពី​គោល​បំណង​របស់​ប្រជា​ពលរដ្ឋ​យើង​ ​ហើយ​យល់​អំពី​បញ្ហា​ ដើម្បី​ចូល​រួម​ចំណែក​នៅ​ក្នុង​ការ​ដោះស្រាយ»។

លោក​ធន សារ៉ាយ ​ប្រធាន​សមាគម​សិទ្ធិ​មនុស្ស​ADHOCបាន​មាន​ប្រសាសន៍​ថា​ ​ការ​សំដែង​មតិ​គឺ​ដើម្បី​ដាក់​សម្ពាធ​ឲ្យ​អ្នក​ទទួល​ខុស​ត្រូវ​ចេញ​មុខ​ដោះ​ស្រាយ។

លោក​បាន​មាន​ប្រសាសន៍​ទៀត​ថា​ ​ប្រសិន​បើ​យើង​កំណត់​ទីតាំង​សម្រាប់​សំដែង​មតិ​ ​វា​ហាក់​បីដូច​ជា​ការ​តវ៉ា​នេះ​មិន​មាន​លទ្ធផល​ជា​វិជ្ជមាន​ទេ៕

XS
SM
MD
LG