ដំណឹងអំពីវិធានការថ្មីនេះមានឡើងនៅមុនសន្និសីទការងារហិរញ្ញវត្ថុពីរថ្ងៃរបស់ប្រទេសចិនមានការចូលរួមដោយលោកប្រធានាធិបតី Xi Jinping ដែលបានសន្យាថានឹងបង្កើតយន្តការមានរយៈពេលយូរមួយដើម្បីដោះស្រាយបញ្ហាបំណុលរបស់អាជ្ញាធរក្នុងមូលដ្ឋាននិងបានផ្តល់សញ្ញាថានឹងបង្កើនការខ្ចីប្រាក់របស់រដ្ឋាភិបាលកណ្តាលផងដែរ។
បើតាមទីភ្នាក់ងារសារព័ត៌មាន Reuters ថាបំណុលរបស់រដ្ឋាភិបាលមូលដ្ឋាននៃប្រទេសចិនបានឡើងដល់៩២លានលាន yuan គឺ១២,៥៨លានលានដុល្លារ ស្មើនឹង៧៦%នៃទិន្នផលសេដ្ឋកិច្ចរបស់ប្រទេសក្នុងឆ្នាំ២០២២។ តួលេខនេះកើនឡើងពី៦២,២%ក្នុងឆ្នាំ២០១៩។
ពួកអ្នកចូលរួមក្នុងការប្រជុំនេះ ដែលបានចប់កាលពីថ្ងៃអង្គារទី៣១តុលា មានរួមលោក Li Qiang, Zhao Leji, Wang Huning, Cai Qi, Ding Xuexiang, និង Li Xi ដែលជាសមាជិកនៃគណៈកម្មាធិការមជ្ឈឹមគណបក្សកុម្មុយនិស្តចិន។
ពួកគេក៏បានសន្យាថានឹង«កែតម្រូវប្រព័ន្ធប្រាក់បំណុលរបស់រដ្ឋាភិបាលមជ្ឈឹមនិងរដ្ឋាភិបាលក្នុងមូលដ្ឋាន»និងផ្តល់ប្រាក់កាសថែមទៀតសម្រាប់នវានុវត្តន៍ ការផលិតខាងបច្ចេកវិទ្យាខ្ពស់ បច្ចេកវិទ្យាបៃតងនិងក្រុមហ៊ុនពីខ្នាតតូចទៅខ្នាតមធ្យម។
ក្នុងឆ្នាំ២០២២ ផលិតផលសរុបក្នុងស្រុកនៃខេត្ត Jiangsu នៅជិតក្រុង Shanghai មានប្រមាណ១២,២៩លានលាន yuan ឬ១,៦៨លានលានដុល្លារនៅពេលខេត្តនេះជំពាក់បំណុល២,០៦៩លានលាន yuan ឬ២៨២,៨ពាន់លានដុល្លារ។
នៅពេលមានកំណើនបំណុលបែបនេះ រដ្ឋាភិបាលខេត្ត Jiangsu បានចាប់ផ្តើមកម្មវិធីមួយនៅដើមខែតុលាដើម្បីលើកទឹកចិត្តកម្មករសហគ្រាសរដ្ឋ២សែននាក់ជារៀងរាល់ឆ្នាំរហូតដល់ឆ្នាំ២០២៥ឱ្យចាប់ផ្តើមធុរកិច្ចផ្ទាល់ខ្លួន ជាពិសេសកម្មករដែលចង់ប្រកាបអាជីវកម្មដោយសុំច្បាប់ឈប់មិនយកប្រាក់បៀវត្ស។
កម្មវិធីនេះមានគោលដៅជាពិសេសគាំទ្រពួកអ្នកស្រាវជ្រាវវិទ្យាសាស្ត្រ មានរួមពួកបុគ្គលិកប្រចាំអាជីពនិងក្រុមបុគ្គលិកបច្ចេកទេសមកពីសាកលវិទ្យាល័យ វិទ្យាស្ថានស្រាវជ្រាវវិទ្យាសាស្ត្រនិងសហគ្រាសរដ្ឋឯទៀតៗ ឱ្យចាប់ផ្តើមធុរកិច្ច។
ពួកគេត្រូវបានលើកទឹកចិត្តឱ្យចែកចាយលទ្ធផលនៃការស្រាវជ្រាវខាងវិទ្យាសាស្ត្រនិងខាងបច្ចេកវិទ្យារបស់ពួកគេទៅឱ្យក្រុមអ្នកធ្វើការមិនពេញម៉ោងឬមានការងារបណ្តោះអាសន្នតាមមូលដ្ឋាននៃការសុំច្បាប់ឈប់មិនយកប្រាក់ខែពីស្ថាប័នពួកគេ។
ខេត្ត Jiangsu នឹងថែរក្សាទំនាក់ទំនងការងាររបស់ពួកគេចំនួនបីឆ្នាំនិងបន្តបង់ប្រាក់ឱ្យការធានារ៉ាប់រងខាងសង្គមកិច្ចរបស់ពួកសហគ្រិននិងបង់ប្រាក់សោធននិវត្តន៍នៅកន្លែងធ្វើការដើមរបស់ពួកគេ។
លោកស្រី Fang Tsung-yen ជាអ្នកស្រាវជ្រាវជំនួយនៅវិទ្យាស្ថានការពារជាតិនិងការស្រាវជ្រាវខាងសន្តិសុខនៅក្រុងតៃប៉ិ។ លោកស្រីបាននិយាយថាប្រទេសចិនមិនអាចប្រែក្រឡះការថមថយសេដ្ឋកិច្ចក្នុងពេលឆាប់ៗនេះបានទេ។ ដូច្នេះ រដ្ឋាភិបាលក្នុងមូលដ្ឋានត្រូវតែកាត់បន្ថយបន្ទុកហិរញ្ញវត្ថុក្នុងសេចក្តីសង្ឃឹមថានឹងធ្វើឱ្យមានភាពសំបូររុងរឿងខាងសេដ្ឋកិច្ច។
លោកស្រី Fang បានថ្លែងថារដ្ឋាភិបាលក្នុងមូលដ្ឋានមិនអាចបង្ខំមនុស្សឱ្យឈប់ធ្វើការងារបានទេ ដូច្នេះរដ្ឋាភិបាលរកវិធីបន្ថយប្រាក់បៀវត្សក្រុមអ្នកធ្វើការងារ៕
