ទីភ្នាក់ងារសារព័ត៌មាន Xinhua របស់ចិនបានរាយការណ៍កាលពីថ្ងៃអាទិត្យដោយយោងលើកិច្ចសម្ភាសជាមួយនឹងរដ្ឋមន្ត្រីហិរញ្ញវត្ថុថ្មីរបស់ចិនលោក Lan Foan ថា ប្រទេសចិននឹងបង្កើនល្បឿននៃការចេញនិងប្រើប្រាស់សញ្ញាបណ្ណ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
ក្រសួងហិរញ្ញវត្ថុចិននឹងជំរុញជាប្រក្រតីឱ្យមានដំណោះស្រាយនៃហានិភ័យបំណុលរបស់រដ្ឋបាលមូលដ្ឋាន និងបង្កើនកិច្ចប្រឹងប្រែងដើម្បីប្រើប្រាស់ឱ្យបានប្រសើរជាងមុននូវតួនាទីរបស់សញ្ញាបណ្ណពិសេសដើម្បីលើកស្ទួយសេដ្ឋកិច្ច។ នេះបើយោងតាមទីភ្នាក់ងារសារព័ត៌មាន Xinhua ដែលយោងលើការបញ្ជាក់របស់លោក Lan។
លោក Lan ដែលបានកត់សម្គាល់អំពី«ស្ថានភាពក្នុងប្រទេសនិងអន្តរជាតិដ៏ស្មុគស្មាញ» បាននិយាយថា៖ «ក្រសួងហិរញ្ញវត្ថុ [ចិន] នឹងបន្តអនុវត្តគោលនយោបាយហិរញ្ញវត្ថុសកម្មជាមុន ផ្ដោតលើការបង្កើនប្រសិទ្ធផល និងធ្វើឱ្យការអនុវត្តគោលនយោបាយហិរញ្ញវត្ថុមានប្រសិទ្ធភាពប្រសើរជាងមុន»។
លោក Lan បានបន្ថែមថា កូតាបំណុលថ្មីមួយចំនួនរបស់រដ្ឋបាលមូលដ្ឋានសម្រាប់ឆ្នាំ ២០២៤ ត្រូវបានចេញជាមុនដើម្បីធានាឱ្យបានសមហេតុផលនូវតម្រូវការហិរញ្ញវត្ថុមូលដ្ឋាន។
លោក Lan គឺជាអ្នកជំនាញបច្ចេកទេសដ៏មានឥទ្ធិពលអាយុ ៦១ ឆ្នាំ ដែលមានបទពិសោធរដ្ឋាភិបាលថ្នាក់ជាតិតិចតួច។ ប្រព័ន្ធផ្សព្វផ្សាយរដ្ឋបានរាយការណ៍កាលពីខែមុនថា លោកត្រូវបានតែងតាំងជារដ្ឋមន្ត្រីហិរញ្ញវត្ថុចិន នៅចំពេលដែលរដ្ឋាភិបាលបង្កើនការជំរុញសកម្មភាពហិរញ្ញវត្ថុឱ្យបានក្លៀវក្លាដើម្បីធ្វើឱ្យសេដ្ឋកិច្ចរបស់ប្រទេស ដែលជាសេដ្ឋកិច្ចធំជាងគេបំផុតទីពីរនៅលើពិភពលោក មានភាពរស់រវើកឡើងវិញ។
អង្គភាពសភាកំពូលរបស់ចិនកាលពីខែមុនបានអនុម័តការចេញសញ្ញាបណ្ណរដ្ឋាភិបាលចំនួន ១៣៧ ពាន់លានដុល្លារនៅក្នុងត្រីមាសទី ៤ ដើម្បីផ្ដល់ថវិកាដល់ការកសាងឡើងវិញនូវតំបន់នានាដែលរងគ្រោះដោយសារទឹកជំនន់។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយរដ្ឋរបស់ចិន។
សេដ្ឋកិច្ចចិនបានរីកចម្រើនលឿនជាងអ្វីដែលអ្នកវិភាគបានព្យាករណ៍ទុកនៅក្នុងត្រីមាសទី ៣ ដោយធ្វើឱ្យរដ្ឋាភិបាលមានឱកាសប្រសើរជាងមុននៅក្នុងការសម្រេចបាននូវគោលដៅរីកចម្រើនពេញមួយឆ្នាំរបស់ខ្លួនចំនួនប្រហែល ៥%។
ប៉ុន្តែ បញ្ហាប្រឈមនៅតែមានដោយសារតែវិបត្តិអលចនទ្រព្យមានលក្ខណៈកាន់តែយ៉ាប់យ៉ឺនឡើងហើយក្រុមហ៊ុនឯកជនមានភាពស្ទាក់ស្ទើរក្នុងការចំណាយដោយសារមិនសូវមានទំនុកចិត្ត៕
រដ្ឋមន្ត្រីហិរញ្ញវត្ថុចិនថា ចិននឹងបង្កើនការចេញសញ្ញាបណ្ណរដ្ឋាភិបាល
- Reuters
ទីក្រុងប៉េកាំង —
