ដោយនៅសល់ពេលតែ២ខែទៀតប៉ុណ្ណោះ សម្រាប់អាណត្តិប្រធានាធិបតីលោក Joe Biden សហរដ្ឋអាមេរិក កំពុងបង្កើនល្បឿនជួយអ៊ុយក្រែន ផ្នែកហិរញ្ញវត្ថុ យោធានិងការទូត ដើម្បីឲ្យអ៊ុយក្រែនអាចការពារខ្លួនទប់ទល់នឹងការឈ្លានពានរបស់រុស្ស៊ីបាន។
នៅក្នុងកិច្ចប្រជុំកំពូលរបស់ក្រុមប្រទេស G20 ដែលលោក Biden និងមេដឹកនាំប្រទេសដែលមានសេដ្ឋកិច្ចជឿនលឿនជាងគេទាំង២០ក្នុងពិភពលោកចូលរួម ក្នុងទីក្រុង Rio de Janeiro ប្រទេសប្រេស៊ីល មន្ត្រីអាមេរិកកំពុងជំរុញឲ្យមានការប្រើភាសា«ខ្លាំងបំផុតតាមអាចធ្វើទៅបាន»ទាក់ទងនឹងអ៊ុយក្រែន។ នេះបើយោងទីប្រឹក្សារងផ្នែកសន្តិសុខជាតិអាមេរិកលោក Jon Finer ដែលបានប្រាប់ VOA ក្នុងសន្និសីទមួយកាលពីថ្ងៃចន្ទ។
អ្នកការទូតបស្ចិមប្រទេស បានបន្តជំរុញឲ្យមានការរិះគន់ខ្លាំងជាងមុនលើប្រទេសរុស្ស៊ី ក្រោយពីមានការវាយប្រហារតាមអាកាសកាលពីចុងសប្ដាហ៍ ដែលជាវាយប្រហារធំបំផុតរបស់រុស្ស៊ីលើទឹកដីអ៊ុយក្រែនក្នុងពេលប៉ុន្មានខែកន្លងមក។
ពួកគេក៏បានព្រមានផងដែរថាកិច្ចខិតខំប្រឹងប្រែងធ្វើសង្គ្រាមកាន់តែខ្លាំងឡើងរបស់រុស្ស៊ី អាច បង្កជាអស្ថិរភាពហួសពីតំបន់អឺរ៉ុប។ នៅដើមខែនេះ សហរដ្ឋអាមេរិកនិងអ៊ុយក្រែន បានប្រកាសថាកូរ៉េខាងជើង បានបញ្ជូនទាហានជាង១ម៉ឺននាក់ ទៅជួយរុស្ស៊ីដណ្ដើមយកដែនដីដែលអ៊ុយក្រែនក្ដោបក្ដាប់បាននៅតំបន់ Kursk របស់រុស្ស៊ី។
ប៉ុន្តែសេចក្ដីថ្លែងការណ៍ចុងក្រោយរបស់ក្រុមអ្នកដឹកនាំ មិនបានបញ្ចូលភាសាដែលសហរដ្ឋអាមេរិកបានជំរុញនោះទេ។ សេចក្ដីថ្លែងការណ៍នេះគូសបញ្ជាក់ពីទុក្ខវេទនារបស់ប្រជាជននិងឥទ្ធិពលអវិជ្ជមាននៃសង្គ្រាមក្នុងប្រទេសអ៊ុយក្រែនចំពោះសេដ្ឋកិច្ចសកលលោក ដោយមិនបានថ្កោលទោសប្រទេសរុស្ស៊ីទេ។ ទាក់ទងនឹងតំបន់ហ្កាហ្សាវិញ សេចក្ដីថ្លែងការណ៍អំពាវនាវឲ្យមានបទឈប់បាញ់នៅទីនោះ និងនៅលីបង់ និងប្ដេជ្ញាចំពោះដំណោះស្រាយរវាងរដ្ឋពីរ ដោយមិនបាននិយាយអំពីសិទ្ធិការពារខ្លួនរបស់អ៊ីស្រាអែលទេ។
លោក Finer ទទួលស្គាល់ថា ការទទួលបានសេចក្តីសម្រេចប្រកបដោយឯកច្ឆន្ទទៅលើជម្លោះសាកលគឺជារឿងដែលពិបាកធ្វើទៅបាន ដោយសារតែភាពចម្រុះគ្នានៃក្រុមប្រទេស G20។ ក្រៅពីក្រុមប្រទេស G7 ដែលភាគច្រើនមានគំនិតដូចគ្នា ក្រុមប្រទេស G20 ក៏មានរុស្ស៊ី ចិននិងប្រទេសមួយចំនួនទៀតនៅអឌ្ឍគោលខាងត្បូងនៅក្នុងនោះដែរ។
លោក Finer ថ្លែងថា៖«យើងចាំមើលថាតើវានឹងទៅជាយ៉ាងណា»។
សូម្បីតែតាំងពីកិច្ចប្រជុំរបស់ក្រុមប្រទេស G20 នៅកោះបាលី ប្រទេសឥណ្ឌូណេស៊ីកាលពីឆ្នាំ២០២២ ដែលរៀបចំឡើងតែប៉ុន្មានខែក្រោយមក បន្ទាប់ពីការឈ្លានពានរបស់រុស្ស៊ីលើអ៊ុយក្រែនមក ក្រុមប្រទេសទាំងនេះ បានប្រឈមនឹងបញ្ហាជាច្រើនក្នុងការរកដំណោះស្រាយឆ្លើយតបចំពោះជម្លោះនេះ៕
វេទិកាបញ្ចេញមតិ