ភ្ជាប់​ទៅ​គេហទំព័រ​ទាក់ទង

តុលាការ​បង្គាប់​ឱ្យ​សភា​កាត់​ប្រាក់​ខែ​លោក​ស្រី មូរ សុខហួរ​សង​លោក​ហ៊ុន​ សែន


វ៉ាស៊ីនតោន៖ អ្នកតំណាង​រាស្រ្តគណ​បក្ស​សម​ រង្ស៊ី គឺ​លោកស្រី​មួរ សុខហួរ​ ប្រហែលជា​ជៀស​មិនរួចពី​ការត្រូវបង់ប្រាក់ទៅ​ឱ្យលោកហ៊ុន សែន​ ​នាយក​រដ្ឋមន្រ្តី​កម្ពុជា​ទេក្នុងរឿង​បរិហារ​កេរ្តិ៍​ បន្ទាប់ពី តុលាការចេញ​ដីការ​បង្ខំឱ្យសភាជាតិ​កាត់ប្រាក់​ខែលោកស្រី។

តុលាការ​ក្រុង​ភ្នំពេញ​បាន​ចេញដីការ​សម្រេច​ឱ្យ​រឹបអូស​ប្រាក់ខែ​លោកស្រី​មូរ សុខហូរ ពី​សភាជាតិ​កម្ពុជាក្នុង​រឿង​ក្តីបរិហារកេរ្តិ៍ជាមួយ​លោក​នាយក​រដ្ឋ​មន្រ្តី​ហ៊ុន សែន​ ​ហើយហាម​ឃាត់មិនឱ្យលោក​ស្រីរារាំង​ការអនុវត្តនេះឡើយ។

នៅ​ក្នុងដីការសម្រេចចុះ​ថ្ងៃ​ទី​២០​ ខែ​កក្កដា​នេះ​ ​ហើយវី​អូ​អេ​សំឡេងសហ​រដ្ឋ​អាមេរិកទទួល​បាន​មួយច្បាប់​ ​ ​លោកចៅក្រម​ជា សុខ​ហៀង​បានសម្រេចស្នើ​ឱ្យសភា​ជាតិកាត់ប្រាក់ចំនួន​ ៤.២០៤.៤៩៩​រៀល​ក្នុងមួយ​ខែៗ​ ពី​ប្រាក់​បៀវត្ស​និង​ប្រាក់ឧបត្ថម្ភ​នានារបស់លោក​ស្រី​មូរ សុខ​ហូរ​ រហូត​ដល់គ្រប់ចំនួន​៨.០០០.០០០រៀលជា​ការ​បង់ជម្ងឺ​ចិត្តដល់លោកហ៊ុន សែន។

ដីការសម្រេច​នោះបានបញ្ជាក់​ថា​ ​លោក​ស្រី​មូរ សុខហួរ​ “មិន​ត្រូវ​រារាំង ​ចាត់ចែង​ឬហាម​ឃាត់​មន្រ្តី ​ទទួល​បន្ទុកបើក​ប្រាក់បៀ​វត្សនៅ​នាយកដ្ឋាន​ហិរញ្ញវត្ថុ​នៃ​សភាចំពោះសិទ្ធិ​លើ​បំណុល​ដែលត្រូវ​រឹបអូស​នេះ​ទេ”។

លោក​ស្រី​មូរ សុខហួរ​បាន​ចាត់​ទុក​ថា​ ​នេះជា​ឧទាហរណ៍​ជាក់​ស្តែង​នៃអសមត្ថភាពរបស់​ប្រព័ន្ធ​តុលាការក្នុងការ​ស្វែង​រក​យុត្តិធម៌​ ​ហើយស្នើ​ឱ្យប្រជាពល​រដ្ឋ​ទាំង​អស់ត្រូវ​ក្រោក​ឡើងដើម្បី​ទាមទារឱ្យមានការកែ​ទម្រង់ប្រព័ន្ធ​យុត្តិធម៌៖

“ច្បាស់ហើយថា ក្នុងនាមជា​ប្រជា​ពលរដ្ឋ​ស្លូត​ត្រង់ ​តុលាការ​នេះគឺជាតុលាការមួយ​ដែល​យើងពុំ​អាច​ទទួល​បានដើម្បី​រកយុត្តិធម៌​បានទេ។ ការ​បង្ខិត​បង្ខំ​របៀប​នេះ​គឺ​ជា​ការ​បង្ខិត​បង្ខំ​មួយ​ដែលយើងឃើញ​ថា​ ​ជា​ឧបករណ៍​ន​យោ​បាយ ​ហើយចៅក្រមមិន​អាចប្រើ​ប្រាស់​សតិ​សម្ប​ជញ្ញៈ​របស់​ខ្លួន​ក្នុងការកាត់សេចក្តី​ឱ្យខ្ញុំក្នុងនាមជា​អ្ន​ក​នយោ​បាយទេ។​ ដូច្នេះចំពោះខ្ញុំវិញ​ ​ខ្ញុំ​យល់​ឃើញ​ថា​ ​យើងត្រូវតែពុះ​ពារក្នុង​នាមយើងជាប្រជា​ពលរដ្ឋខ្មែរដែលចង់ឱ្យ​មានការ​កែ​ទម្រង់​ក្នុងប្រព័ន្ធតុលាការ។ យើងត្រូវតែហ៊ានក្រោក​ឈរ​ឡើង​ ហើយទំលុះនូវអ្វីដែលជាការស្ងៀម​ស្ងាត់​របស់​យើង ​ទើប​មានការកែ​ទម្រង់ប្រព័ន្ធតុលាការ ​ក៏​ដូច​ជាកែទម្រង់​ប្រព័ន្ធដទៃទៀតដែរ”។

គណបក្ស​សម រង្ស៊ីបានថ្កោល​ទោស​ចំណាត់ការតាម​របៀប​បង្ខំ​នេះ​ ដោយចាត់ទុក​ថា​ តុលាការខ្មែ​រនៅតែបម្រើ​តាមតែក្រុមអ្នក​មានអំណាច។ លោក​យឹម សុវណ្ណ អ្នកតំណាង​រាស្រ្ត និងជាអ្នក​នាំពាក្យ​ គណបក្សសម រង្ស៊ី ​បានបញ្ជាក់​ថា៖

“ជា​រឿង​ចំណាត់ការមួយ​ដែលអយុត្តិធម៌​បំផុត។ អយុ​ត្តិ​ធម៌​នៅតែអយុត្តិ​ធម៌​ ​ព្រោះ​ថា​ ​លោក​ជំទាវ​មូរ សុខហួរតស៊ូ​នេះ​មិន​មែនតស៊ូរឿង​ប្រាក់ខែឬ​រឿងអ្វីមួយ​ផ្សេង​សម្រាប់ខ្លួនគាត់ទេ​ គឺ​ជាការបង្ហាញ​ប្រាប់​មតិ​សាធារណៈ ​ជាតិនិងអន្តរ​ជាតិ​ថា​ ​ប្រព័ន្ធ​តុលាការនេះជា​ប្រព័ន្ធ​តុលាការ​ឧបករណ៍​នយោបាយ​របស់គណបក្ស​ប្រជាជន។​ នៅពេល​ដែល​គណ​បក្ស​ប្រជា​ជនបញ្ជា​ឱ្យ​ធ្វើ​អ្វីគឺគេធ្វើ​ហ្នឹងរួម​ទាំង​ការ​រំលោភសិទ្ធិ​មនុស្ស​ កាន់កាប់ដី​ធ្លីរបស់ប្រជា​ពលរដ្ឋ។​ នៅ​ក្នុង​ប្រទេស​កម្ពុជា​ ​អ្នក​មាន​លុយ​ ​អ្នក​មានអំណាចឈ្នះ​ក្តី​ជារៀង​រហូត​ ​ចំណែកអ្នក​ក្រ​ ​ប្រជា​ពលរដ្ឋ​ក្រីក្រគឺចាញ់​ក្តី”។

ដី​ការសម្រេចនេះមិនបញ្ជាក់​ថា ​នឹងចាប់ផ្តើម​កាត់ប្រាក់ខែនេះចាប់ពីពេលណា​ទេ។​ ហើយ​វីអូអេ​មិនអាចទាក់ទងលោកជាម យៀប​ ប្រធានគណៈកម្មការ​ហិរញ្ញ​វ​ត្ថុ​សភា​ជាតិដើម្បី​បញ្ជាក់​បាន​ឡើយ។

ចំណាត់ការនេះធ្វើ​ឡើ​ង​បន្ទាប់ពី​លោក​ស្រី​មូរ សុខហួរ​ទទួល​បរា​ជ័យជា​បន្ត​បន្ទាប់ក្នុងការតវ៉ា​ប្រឆាំងទល់នឹង​ការ​សម្រេចរបស់​តុលាការរាជធានីភ្នំពេញ​ ចេញកាលពីថ្ងៃ​ទី០៤​ ខែ​សីហា​ ឆ្នាំ​២០០៩​ ដែល​តម្រូវ​ឱ្យលោកស្រីបង់ប្រាក់​សំណង​ទៅ​លោក​ហ៊ុន​ សែន ​និងការ​ដែលលោក​ស្រីប្រកាន់​ជំហរ​ប្រកែក​មិនព្រម​បង់​ប្រាក់​ បើទោះបី​ជាមាន​ការ​គំរាមថា​ ​អាចនឹង​ត្រូវ​ជាប់ពន្ធ​នាគារ​ក៏ដោយ៕

XS
SM
MD
LG