ភ្ជាប់​ទៅ​គេហទំព័រ​ទាក់ទង

សហគមន៍​នៅ​​ខេត្ត​រតនៈគិរី​ត្រូវ​ការ​ត្រី​ជា​ជាង​ភ្លើង​អគ្គិសនី


សហគមន៍​ជនជាតិ​ដើម​ភាគតិច​នៅ​ក្នុង​ខេត្ត​រតនៈគិរី​បាន​អះអាង​ថា ពួកគេ​ត្រូវ​ការ​ត្រី​ជា​ជាង​ភ្លើង​អគ្គិសនី។ ​ក្រុម​អ្នក​ភូមិ​ដែល​បាន​រង​ផល​ប៉ះពាល់​យ៉ាង​ធ្ងន់ធ្ងរ​ពី​ទំនប់​វារី​អគ្គិសនី​នៅ​ក្នុង​ប្រទេស​វៀតណាម​កន្លង​មក​នោះ​ បាន​ស្នើ​ឱ្យ​រដ្ឋា​ភិបាល​កម្ពុជា​ពិចារណា​លើ​ជម្រើស​ផ្សេងៗ​ទៀត​ដើម្បី​ទាញ​យក​ថាម​ពល​អគ្គិសនី​ក្រៅ​ពី​ការ​សាងសង់​ទំនប់​បន្ថែម​កាត់​ទន្លេ​ដែល​ពួកគេ​ពឹង​អាស្រ័យ​ទៅ​លើ​នោះ។

លោក ​ពេជ្រ ​សំណាង ​រាយការណ៍​ពិស្តារ​អំពី​រឿង​នេះ​ពី​ខេត្តរតនៈ​គីរី​ជូន​ដូច​ត​ទៅ៖

ក្រុម​អ្នក​ភូមិ​ជនជាតិ​ដើម​ភាគតិច​ដែល​រស់​នៅ​តាម​ដង​ទន្លេ​សេសាន​ និង​ស្រែ​ពក​ក្នុង​ខេត្ត​រតនៈគីរី​បាន​អំពាវនាវ​ដល់​រដ្ឋា​ភិបាល​កម្ពុជា​ឱ្យ​បញ្ឈប់​គម្រោង​អភិវឌ្ឍន៍​ទំបន់​វារី​អគ្គិសនី​នៅ​លើ​ដង​ទន្លេ​ទាំង​នេះ​បន្ថែម​ទៀត​ដើម្បី​បញ្ជៀស​ផល​ប៉ះ​ពាល់​អវិជ្ជមាន​កាន់តែ​ធ្ងន់ធ្ងរ​មក​លើ​សហគមន៍​ជនជាតិ​ដើម​ភាគតិច​របស់​ខ្លួន។

ថ្លែង​នៅ​ក្នុង​វិធី​រំឭក​ខួប​បណ្តាញ​ទន្លេ​បី​គឺ​ទន្លេ​សេសាន ​ស្រែ​ពក​និង​សេកុង​ក្នុង​ភូមិ២​ ឃុំ​ស្រែ​អង្ក្រង​ ស្រុក​កូនមុំ​កាល​ពី​សប្តាហ៍​មុន ​ លោក​មាស សាមិត​ តំណាង​សហគមន៍​ជនជាតិ​ដើម​ភាគតិច​នៅ​តាម​បណ្តោយ​ទន្លេ​ស្រែ​ពក​នេះ​បាន​មាន​ប្រសាសន៍​ថា​ ​ទំនប់​ដែល​សាង​សង់​រួច​ហើយ​នៅ​ខ្សែទឹក​ខាង​លើ​ក្នុង​ប្រទេស​វៀតណាម​នោះ​បាន​ប៉ះពាល់​យ៉ាង​ខ្លាំង​ដល់​ជីវភាព​រស់នៅ​របស់​អ្នកភូមិ​របស់​លោក​រួច​ស្រេច​ទៅ​ហើយ។

លោក​មាស សាមិត​មាន​ប្រសាសន៍​ថា ​ដូច្នេះ​គម្រោង​សាងសង់​ទំនប់​បន្ថែម​ទៀត​ក្នុង​ខេត្ត​រតនៈគីរី​នេះ​នឹង​ធ្វើ​ឱ្យ​ជីវភាព​របស់​ប្រជាជន​កាន់តែ​ធ្លាក់​ដុនដាប​ខ្លាំង​ឡើង​ជា​មិន​ខាន​ដោយសារ​ទំនប់​ទាំង​នោះ​នឹង​ធ្វើ​ឱ្យ​បាត់បង់​ត្រី​និង​ធនធាន​ផ្សេង​ទៀត​នៅ​ក្នុង​ទន្លេ​ដែល​អ្នក​ភូមិ​ពឹង​អាស្រ័យ​សម្រាប់​ទ្រទ្រង់​ជីវភាព​រស់​នៅ​របស់​ពួក​គេ។

“កាល​ណា​យើង​បង្កើត​ទំនប់​ហើយ ​ចរន្ត​ត្រី​ចេញ​ចូល​ហ្នឹង​អត់​មាន​ទេ​ គឺ​ដាក់​ទៅ​ ដាច់​ហើយ។​ កុំ​ថា​ហ្អ​ ធ្វើ​ជណ្តើរ​ឱ្យ​ត្រី​ឡើង​នោះ ​ ​ពី​ជីដូន​ជីតា​ខ្ញុំមក​អត់​ដែរ​ឮ​ថា​ ធ្វើ​ជណ្តើរ​យន្ត​ឱ្យ​ត្រី​ឡើង​ទេ។​ វា​ឡើង ​ឡើង​តាម​ធម្មជាតិ​របស់​វា។ ដល់​ឥឡូវ​ឮ​ថា ​ធ្វើ​ទំនប់​ ​ហើយ​ធ្វើ​ជណ្តើរ​យន្ត​ឱ្យ​ត្រី​ឡើង​ទៀត។​ ឱ្យ​តែ​ទឹក​ហូរ​ខ្លាំង​ លាន់​អាម៉ាស៊ីន​ហ្នឹង​ ត្រី​វា​លែង​មក​ជិត​ហើយ។​ វា​មិន​ដែល​ធ្វើ​ជណ្តើរ​ឯណា​ឱ្យ​ត្រី​ឡើង​ទេ”។

សូម​បញ្ជាក់​ថា​ ទន្លេ​សេសាន​និង​ស្រែ​ពក​គឺ​ជា​ដៃ​ដ៏​សំខាន់​របស់​ទន្លេ​មេគង្គ​ ហើយ​ប្រភព​ទឹក​ដែល​ហូរ​ចូល​ទន្លេ​ទាំង​នេះ​គឺ​ចេញ​មក​ពី​ខ្ពស់​រាប​កណ្តាល​នៃ​ប្រទេស​វៀតណាម។

នៅ​ឆ្នាំ​១៩៩៣​ ​ប្រទេស​វៀតណាម​បាន​សាងសង់​ទំនប់​យ៉ាលី​ដ៏ធំ​ដែល​មាន​កម្លាំង​ថាមពល​រហូត​ដល់​៧២០​មេហ្គាវ៉ាត់​នៅ​លើ​អាង​ទន្លេ​សេសាន​ក្នុង​ទឹក​ដី​របស់​ខ្លួន​ដែល​ស្ថិត​នៅ​ចម្ងាយ​ជាង​៨០

គីឡូម៉ែត្រ​ពី​ព្រំដែន​កម្ពុជា។

បន្ទាប់​ពី​ការ​សាងសង់​និង​ចាប់​ដំណើរ​ការ​ទំនប់​នោះ​តាំង​ពី​ឆ្នាំ​២០០២​មក​ អ្នកភូមិ​ដែល​រស់នៅ​ខ្សែ​ទឹក​ខាង​ក្រោម​នៃ​ទន្លេ​ជាពិសេស​គឺ​អ្នកភូមិ​ក្នុង​ខេត្ត​រតនៈគីរី​និង​ស្ទឹងត្រែង​បាន​ជួប​ប្រទះ​នូវ​ផល​ប៉ះពាល់​យ៉ាងខ្លាំង​ដល់​ជីវភាព​រស់នៅ​របស់​ពួកគេ។

មាន​សម្បុរ​ខ្មៅ​ស្រឯម ​ហើយ​កាត់​សក់​ខ្លី​ត្រឹម​ក​ ​ អ្នក​ស្រី​ផាត់ ពាំង​ជា​កសិករ​វ័យ​៥៥​ឆ្នាំ​ក្នុង​ភូមិ​២​ ឃុំ​ស្រែ​អង្ក្រង​នៃ​ស្រុក​កូនមុំ​នេះ​ បាន​ប្រាប់​ឱ្យ​ដឹង​ថា​ ផ្ទះ​សម្បែង​និង​ដីស្រែ​ជាង​៥​ហិកតា​របស់​អ្នកស្រី​ដែល​នៅ​អែប​តាម​បណ្តោយ​ដង​ទន្លេ​នេះ​ បាន​ជន់​លិច​ដោយសារ​ទឹក​ជំនន់​ជាប់ៗ​គ្នា​នៅ​ក្នុង​រយៈ​ពេល​៣​ឆ្នាំ​ចុង​ក្រោយ​នេះ។

“បី​ឆ្នាំ​ហ្នឹង​ទឹក​លិច ​អត់បាន​ផល​ទេ។ ​ ខ្ញុំ​ខ្វះ​ខាត។ ​ឆ្នាំ​កន្លង​មក​ទឹក​អត់​ទាន់​លេច​ ខ្ញុំ​ធ្វើ​ស្រែ​ក្នុង​មួយ​រដូវ​ បាន​ជាង​១​ពាន់​ប៉ោត​ ជាង​១០​តោន ​ដល់​ទឹក​លិច​បី​ឆ្នាំ​ហ្នឹង ​គ្រាន់​តែ​ហូប​មិន​គ្រប់គ្រាន់​ផង”។

ប្រជា​ពលរដ្ឋ​ប្រមាណ​៣​ម៉ឺន​នាក់​ភាគច្រើន​ជា​ជន​ជាតិ​ដើម​ភាគតិច​ រួមមាន​ជនជាតិ​ប្រូវ ​ចារ៉ាយ​ កចក់​ កាវ៉ែត ​គ្រឺង​ លុន ​ព្នង​ ទំពួន​និង​ឡាវ​ជាដើម​ ពឹង​ផ្អែក​ទៅ​លើ​ទឹក​ទន្លេ​សេសាន​ និង​ស្រែ​ពក​នេះ​សម្រាប់​ការ​ប្រើប្រាស់​ប្រចាំ​ថ្ងៃ ​រក​ផល​នេសាទ​ ស្រោច​ស្រព​ផល​ដំណាំ​ ​ហើយ​នឹង​សម្រាប់​ចិញ្ចឹម​សត្វ​ពាហនៈ​របស់​ពួកគេ​ជាដើម ​ ​នេះ​បើ​យោង​តាម​អង្គការ​ក្រៅ​រដ្ឋា​ភិបាល​ដែល​ធ្វើ​ការងារ​ការពារ​ទន្លេ​នៅ​ក្នុង​ភូមិ​ភាគ​ឦសាន្ត​នៃ​ប្រទេស​កម្ពុជា​នេះ។

យ៉ាង​ហោច​ណាស់​ក៏​មាន​គម្រោង​សាងសង់​ទំនប់​ចំនួន​៥​ដែរ​នៅ​លើ​ទន្លេ​សេសាន​និង​ដៃ​របស់​វា​ផ្សេង​ទៀត​នៅ​ក្នុង​ទឹក​ដី​កម្ពុជា​ ដោយ​រួមទាំង​គម្រោង​សាងសង់​ទំនប់​សេសាន​ក្រោម​២​នៅ​ក្នុង​ខេត្ត​ស្ទឹងត្រែង​ដែល​មាន​កម្លាំង​ផ្តល់​ថាមពល​អគ្គិសនី​រហូត​ដល់​៤០០​មេហ្គាវ៉ាត់​ផង​ដែរ។

ជា​មួយ​គ្នា​នេះ​ នៅ​លើ​ដង​ទន្លេ​មេ​នៃ​អាង​ទន្លេ​មេគង្គ​ កម្ពុជា​ក៏​គ្រោង​សាងសង់​ទំនប់​វារី​អគ្គិសនី​ធំៗ​ចំនួន​២​ទៀត​ដែរ​គឺ​ទំនប់​ស្ទឹងត្រែង​ក្នុង​ខេត្ត​ស្ទឹងត្រែង ​ដែល​មាន​កម្លាំង​ថាមពល​៩៨០​មេហ្គាវ៉ាត់​និង​ទំនប់​សម្បូរ​ក្នុង​ខេត្ត​ក្រចេះ​ ដែល​មាន​កម្លាំង​ថាមពល​រហូត​ដល់​២៦០០​មេហ្គាវ៉ាត់។

ប្រសិន​បើ​មាន​ការ​សាងសង់​មែន​នោះ​ ​នោះ​ទំនប់​ទាំងពីរ​នេះ​នឹង​ធ្វើ​ឱ្យ​ប៉ះពាល់​ប្រជាជន​កម្ពុជា​ដែល​ពឹង​អាស្រ័យ​ទៅ​លើ​ការ​នេសាទ​ត្រី​ចំនួន​១​លាន​នាក់ នេះ​បើ​យោង​តាម​ពង្រាង​របាយការ​វាយ​តម្លៃ​ផល​ប៉ះពាល់​មួយ​របស់​គណៈ​កម្មការ​ទន្លេ​មេគង្គ​ដែល​បាន​ចេញ​ផ្សាយ​កាល​ពី​ពីរ​សប្តាហ៍​មុន។

មាន​គម្រោង​សាងសង់​ទំនប់​វារី​អគ្គិសនី​សរុប​ចំនួន​១២​នៅ​លើ​អាង​ទន្លេ​មេគង្គ​ផ្នែក​ខាង​ក្រោម​ក្នុង​បណ្តា​ប្រទេស​ជា​សមាជិក​នៃ​គណៈ​កម្មការ​ទន្លេ​មេគង្គ​ទាំង​បួន​ ដែល​រួមមាន​ថៃ​ ឡាវ ​កម្ពុជា​និង​វៀតណាម។

ប្រជា​សហគមន៍​ជនជាតិ​ដើម​ភាគតិច​នៅ​ក្នុង​ខេត្ត​រតនៈគីរី​បាន​លើក​ឡើង​ថា​ ពួកគេ​ដឹង​ថា​ ​គម្រោង​ សាងសង់​ទំនប់​វារី​អគ្គិសនី​នៅ​លើ​ដង​ទន្លេ​ក្នុង​ទឹកដី​កម្ពុជា​នេះ​គឺ​ដើម្បី​ឆ្លើយ​តប​ទៅ​នឹង​តម្រូវ​ការ​ថាមពល​អគ្គិសនី​នៅ​ក្នុង​ប្រទេស ​ហើយ​ពួកគេ​ត្រូវ​ការ​ត្រី​ជា​ជាង​ភ្លើង​អគ្គិសនី​សម្រាប់​ការ​រស់​នៅ​របស់​ពួក​គេ។

លោក​ ភៀវ​ ឈិន​ វ័យ​៦៥​ឆ្នាំ​ ជា​ជនជាតិ​ប្រូវ​នៅ​ភូមិ​កាលឹម​ ស្រុក​វើនសៃ​ មាន​ប្រសាសន៍​នៅ​ក្នុង​បទ​ សម្ភាសន៍​មួយ​ក្នុង​វិធី​ជួប​ជុំ​គ្នា​នោះ​ថា​ ភ្លើង​អគ្គិសនី​មិន​មែន​ជា​របស់​ចាំបាច់​ដើម្បី​ទ្រទ្រង់​ជីវភាព​រស់ នៅ​របស់​លោក​ដែល​ពឹង​អាស្រ័យ​ទៅ​លើ​ប្រភព​ធនធាន​នៃ​ទន្លេ​នោះ​ទេ។

“ភ្លើង​ហ្នឹង​យក​ធ្វើ​អី?​ យើង​ស៊ី​ឆ្អែត​ដែរ?​ ចុះ​បើ​វា​លិច​ផ្ទះ​យើង ​ប្រើ​យ៉ាង​ម៉ិច​ភ្លើង​ហ្នឹង? បើ​យើង​រស់​នៅ​ តាម​ដង​ទន្លេ ​ បើ​វា​លិច​រហូត​ ប្រើ​អី​កើត?”

អ្នក​ស្រី​ ឌី​ បូពី ​វ័យ​៥៥​ឆ្នាំ ​ជា​កសិករ​នៅ​ក្នុង​ភូមិ​២​នៃ​ស្រុក​កូនមុំ​នេះ ​មាន​ប្រសាសន៍​នៅ​ក្នុង​វិធី​ជួប​ជុំគ្នា​នេះ​ថា​ អ្វី​ដែល​អ្នក​ស្រី​ចង់​បាន​នោះ​ជីវភាព​រស់​នៅ​ធម្មតា ​ដែល​គ្មាន​ការ​គំរាម​កំហែង​ពី​ទឹក​ជំនន់​ បើ​ទោះ​ជា​គ្មាន​ភ្លើង​អគ្គិសនី​ប្រើប្រាស់​ក៏​ដោយ​ចុះ។

“ខ្ញុំ​សូម​តែ​ថា​ ​កុំ​ឱ្យ​តែ​លិច​ទេ។​ រឿង​ភ្លើង ​រឿង​អី​ធម្មតា​ទេ។ ​ចាប់​អាគុយ​ក៏​ភ្លឺ​ដែរ។​ ដុត​ចង្កៀង​ក៏ភ្លឺ​ដែរ។​ បើ​មាន​ភ្លើង​ក៏​អស់​លុយ​ដូច​តែ​គ្នា”។

ប្រទេស​កម្ពុជា​ត្រូវ​ការ​ថាមពល​អគ្គិសនី​យ៉ាង​ច្រើន​បន្ថែម​ទៀត​សម្រាប់​អភិវឌ្ឍ​សេដ្ឋកិច្ច​របស់​ខ្លួន​ ដោយសារ​បច្ចុប្បន្ន​មាន​ផ្ទះ​សម្បែង​ប្រមាណ​តែ​២០%​ប៉ុណ្ណោះ​នៅ​ទូទាំង​ប្រទេស​ដែល​មាន​ភ្លើង​អគ្គិសនី​ប្រើ​ប្រាស់​ ​ប៉ុន្តែ​ការ​ផ្គត់ផ្គង់​អគ្គិសនី​ភាគ​ច្រើន​គឺ​មាន​តែ​នៅ​ក្នុង​តំបន់​ទីក្រុង​ប៉ុណ្ណោះ​ ហើយ​ថ្លៃ​អគ្គិសនី​ទៀត​សោត​ក៏​មាន​តម្លៃ​ខ្ពស់​ផង​ដែរ​ នេះ​បើ​យោង​តាម​ធនាគារ​អភិវឌ្ឍន៍​អាស៊ី។

សព្វថ្ងៃ ​ប្រទេសកំពុង​អភិវឌ្ឍន៍​នៅ​ក្នុង​តំបន់​អាស៊ី​អគ្នេយ៍​មួយ​នេះ​ត្រូវ​ទិញ​ថាមពល​អគ្គិសនី​មក​ផ្គត់ផ្គង់​តម្រូវ​ការ​របស់​ខ្លួន​ពី​ប្រទេស​ជិត​ខាង​ រួមមាន​ថៃ​ និង​វៀតណាម​ជាដើម។

លោក​ សុន សំ ​អភិបាល​រង​ស្រុក​កូនមុំ​នៃ​ខេត្តរតនៈ​គីរី​ បាន​ថ្លែង​នៅ​ក្នុង​ពិធី​ជួប​ជុំ​របស់​អ្នក​ភូមិជន​ ជាតិ​ដើម​ភាគ​តិច​នោះ​ថា​ រដ្ឋា​ភិបាល​បាន​គិត​គូរ​យ៉ាង​ល្អិតល្អន់​អំពី​ផល​ប៉ះពាល់​នៃ​គម្រោង​សាងសង់​ទំនប់​លើ​ដង​ទន្លេ​សេសាន​ទាំង​នេះ​ហើយ។

ដូច្នេះ​លោក​មាន​ប្រសាសន៍​បន្ថែម​ថា​ ​រដ្ឋា​ភិបាល​នឹង​បន្ត​គម្រោង​នេះ​ក្រោយ​ពី​សិក្សា​ឃើញ​ថា

ផល​ចំណេញ​ដែល​បាន​ពី​គម្រោង​សាងសង់​ទំនប់​ទាំង​នេះ​មាន​ទំហំ​ធំធេង​ជាង​ផល​ប៉ះពាល់​នោះ។

“គោល​បំណង​យើង​ទាំងអស់​គ្នា​សព្វ​ថ្ងៃ​នេះ ​ ​យើង​ធ្វើ​ដើម្បី​ប្រជាជន។​ យើង​មិន​មែន​ធ្វើ​វារី​អគ្គិសនី​ ដើម្បី​សម្លាប់​ប្រជាជន​ទេ។ ​យើង​ធ្វើ​វារី​អគ្គិសនី​ដើម្បី​ការពារ​ផល​ប្រយោជន៍​ឱ្យ​ប្រជាជន។​ ទោះ​បី​ កម្ពុជា​មិន​ធ្វើ​វារី​អគ្គិសនី​ ​ក៏​បណ្តា​ប្រទេស​គេ​ធ្វើ​ដែរ​អញ្ចឹង។​ បើ​ទប់​តែ​យើង​គេ​មិន​ទប់​ ហើយ​យើង​ចាំតែ​យក​ភ្លើង​ពី​ប្រទេស​គេ​មក​ប្រើ​ក្នុង​ប្រទេស​យើង​ ​យើង​សួរ​ថា​ ​យើង​អាច​ទៅ​កាត់​បន្ថយ​ភាព​ក្រីក្រ​ជូន​ប្រជាជន​យើង​បាន​ទេ”?

ទោះ​ជា​យ៉ាង​នេះ​ក្តី ក្រុម​អ្នក​ភូមិ​ជនជាតិ​ដើម​ភាគតិច​ដែល​រង​ផល​ប៉ះពាល់​ដោយ​សារ​ទំនប់​បាន​ទទួច​ថា​ ​រដ្ឋា​ភិបាល​គួរ​តែ​ពិចារណា​ទៅ​លើ​ជម្រើស​ផ្សេង​ដើម្បី​ទាញ​យក​ថាមពល​វារី​អគ្គិសនី​នេះ​ដូច​ជា​ការ​ប្រើ​ថាមពល​ពន្លឺ​ព្រះ​អាទិត្យ​ ថាម​ពល​ខ្យល់​និង​ការ​ប្រើ​ជីវម៉ាស់​និង​ជីវឧស្ម័ន​ជា​ដើម​វិញ​ ដើម្បី​បញ្ជៀស​ផល​ប៉ះពាល់​ជា​អវិជ្ជមាន​បន្ថែម​ទៀត​ដែល​បណ្តាល​មក​ពី​ទំនប់​នោះ។

ពី​ខេត្ត​រតនៈគីរី ​ខ្ញុំ ​ពេជ្រ​ សំណាង ​VOAសំឡេង​សហ​រដ្ឋ​អាមេរិក៕

XS
SM
MD
LG