សហព្រះរាជអាជ្ញាជាតិនិងអន្តរជាតិនៅតែមានការខ្វែងគំនិតគ្នារឿងចោទប្រកាន់ជនសង្ស័យជាអតីតកម្មាភិបាលខ្មែរក្រហមម្នាក់គឺ លោក អោ អាន ក្នុងសំណុំរឿង០០៤ វគ្គ២ ដែលនាំឲ្យមានការចង្អុលបង្ហាញឲ្យឃើញពីដំណើរការនីតិវិធីដែលឈានដល់ថា តុលាការត្រូវចោទប្រកាន់និងកាត់ទោស ឬ ទម្លាក់បទចោទនិងបញ្ចប់រឿងក្តី តាមលំនាំដែលរដ្ឋាភិបាលមិនចង់មានការកាត់ទោសបន្ថែម។
នៅក្នុងសេចក្តីប្រកាសព័ត៌មានរួមនៅថ្ងៃនេះ សហព្រះរាជអាជ្ញាជាតិ បានអះអាងថា លោក អោ អាន មិនស្ថិតក្នុងយុត្តាធិការរបស់សាលាក្តីខ្មែរក្រហមដែលចូលរួមដោយអ.ស.ប. ទេ ដោយយោងលើហេតុផលថា លោក អោ អាន មិនមែនជាមេដឹកនាំជាន់ខ្ពស់បំផុតនិងជាអ្នកទទួលខុសត្រូវខ្ពស់បំផុត។
តែសហព្រះរាជអាជ្ញាអន្តរជាតិវិញបានបញ្ជាក់ថា លោក អោ អាន ស្ថិតនៅក្នុងយុត្តាធិការរបស់តុលាការ ដោយបានបង្ហាញពីការពាក់ព័ន្ធនឹងឧក្រិដ្ឋកម្មនានាក្នុងតំបន់និងទីឃុំឃាំងជាច្រើនដែលស្ថិតក្រោមការដឹកនាំរបស់លោក អោ អាន ក្នុងតំបន់មជ្ឈិម ជាពិសេសក្នុងខេត្តកំពង់ចាម។
សហព្រះរាជអាជ្ញាជាតិ និងអន្តរជាតិ បានដាក់ដីកាសន្និដ្ឋានស្ថាពររៀងៗខ្លួន កាលពីសប្តាហ៍ថ្មីៗនេះជូនដល់សហចៅក្រមស៊ើបអង្កេត។ មេធាវីរបស់លោកអោ អាននឹងមានឱកាសឆ្លើយតបទៅនឹងដីកាសន្និដ្ឋាននេះ ហើយបន្ទាប់មកវាអាស្រ័យលើសហចៅក្រមស៊ើបអង្កេតដែលនឹងសម្រេចថាតើ លោក អោ អានស្ថិតនៅក្រោមយុត្តាធិការរបស់សាលាក្តី ឬ យ៉ាងណា។
លោក អោ អាន ដែលមិនត្រូវគេដឹងថាតើនឹងក្លាយជាជនជាប់ចោទ ឬ ក៏ជាជនដែលត្រូវរួចពីការចោទប្រកាន់នោះ គឺជាអតីតអនុគណៈតំបន់មជ្ឈិមសម័យខ្មែរក្រហម។ លោកប្រឈមនឹងការចោទប្រកាន់ជាច្រើនរួមមានអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ មនុស្សឃាត ការសម្លាប់រង្គាល ទាសភាព ការធ្វើទារុណកម្ម និងការធ្វើទុក្ខបុកម្នេញផ្សេងៗទៀត។ តែក្នុងកិច្ចសម្ភាសន៍ជាមួយ VOA ថ្មីៗ លោកបានបដិសេធថាមិនជាប់ពាក់ព័ន្ធនឹងការចោទប្រកាន់ទេ៕
