ស្ថានភាពក្នុងពន្ធនាគារ និងរបៀបឃុំឃាំងនៅក្នុងពន្ធនាគារធ្វើឲ្យតំណាងរាស្ត្រគណបក្សសង្គ្រោះជាតិមានការព្រួយបារម្ភអំពីសុវត្ថិភាពរបស់សហការីរបស់ខ្លួន រួមទាំងតំណាងរាស្ត្រ ដែលនៅមានអភ័យឯកសិទ្ធផង ហើយដែលត្រូវឃុំឃាំងក្នុងបន្ទប់ជាមួយអ្នកទោសផ្សេងទៀតដែលរួមមានអ្នកជាប់ទោសពីបទឧក្រិដ្ឋកម្ម។
លោកសុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិ បានសម្តែងការព្រួយបារម្ភនេះបានប្រាប់ VOA ក្រោយពីលោក និងលោកអេង ឆៃអាង ហើយនឹងមន្ត្រីផ្សេងទៀត បានទៅពន្ធនាគារព្រៃសសួរសុខទុក្ខលោកអ៊ុំ សំអាន តំណាងរាស្ត្រ ដែលជាប់ឃុំឃាំងទាំងនៅមានអភ័យឯកសិទ្ធសភានៅឡើយនោះ។
«គេដាក់គាត់នៅក្នុងបន្ទប់ជាមួយអ្នកទោសគ្រប់ប្រភេទណា៎ អ្នកទោសសម្លាប់គេ អ្នកទោសអីច្រើនណាស់!»។
លោកសុន ឆ័យ ដែលបានការអនុញ្ញាតចូលសួរសុខទុក្ខលោកអ៊ុំ សំអានកាលពីព្រឹកថ្ងៃអង្គារ បានបន្ថែមថា លោកអ៊ុំ សំអាន និងអ្នកទោសក្នុងបន្ទប់ជាមួយលោកមិនអាចស្តាប់វិទ្យុបានទេ។ លោកបន្តថា ពេលលោកអ៊ុំ សំអានចេញពីបន្ទប់ឃុំឃាំងមានឆ្មាំពន្ធនាគារតាមគាត់ជានិច្ច។
«ពេលគេអនុញ្ញាតឲ្យចេញទៅក្រៅអីហ្នឹង គាត់មិនអាចនឹងនិយាយជាមួយអ្នកទោសដទៃទៀតបានទេ។ គេមានមន្ត្រីពន្ធនាគារមួយត្រូវតែតាមគាត់ជាប់ ហើយពេលគាត់សួរនាំអ្នកផ្សេងអី គេហាមគាត់»។
ទោះជាយ៉ាងណាក្តី លោកនុត សវនា អ្នកនាំពាក្យអគ្គនាយកដ្ឋានគ្រប់គ្រងពន្ធនាគារនៃក្រសួងមហាផ្ទៃ និងជាអគ្គនាយករងនៃអគ្គនាយកដ្ឋាននេះ បានប្រាប់ VOA នៅថ្ងៃពុធនេះថា លោកអ៊ុំ សំអានមិនមែនជាអ្នកទោសនយោបាយនៅក្នុងពន្ធនាគារទេ ព្រោះធ្វើនយោបាយនៅប្រទេសកម្ពុជាមិនមានទោសទេ។
«កុំគិតថា កុំបែងចែកថា អ្នកនយោបាយឬមិនអ្នកនយោបាយ។ យើងខ្ញុំគ្រាន់តែជាការងារជំនាញក្នុងការឃុំទេ។ ហើយអ្វីដែលលើកឡើងថា ដាក់គាត់ជាមួយអ្នកទោសឧក្រិដ្ឋនោះ អាហ្នឹងខ្ញុំអត់យល់ ព្រោះបទល្មើសគាត់ហ្នឹងគឺបទល្មើសឧក្រិដ្ឋហើយទេតើ»។
លោកនិយាយថា គណបក្សសង្គ្រោះជាតិមិនចាំបាច់បារម្ភអំពីសុវត្ថិភាពរបស់លោកអ៊ុំ សំអាន និងអ្នកទោសផ្សេងទៀតមកពីគណបក្សប្រឆាំងនោះទេ។
«កុំបារម្ភ យើងមានមន្ត្រីជំនាញ មន្ត្រីសន្តិសុខនៅការពារហើយ ពីព្រោះយើងខ្ញុំបារម្ភជាងគាត់ទៅទៀត ពីព្រោះមានបញ្ហាអីទៅ យើងខ្ញុំទទួលខុសត្រូវធ្ងន់ណាស់អំពីសុវត្ថិភាព និងសន្តិសុខរបស់គាត់»។
លោកអគ្គនាយករងនៃនាយកដ្ឋានគ្រប់គ្រងពន្ធនាគារក៏បានឲ្យដឹងដែរថា ករណីរបស់លោកអ៊ុំ សំអានមិនទាន់កាត់ទោស ដូច្នេះសេរីភាពរបស់លោកនៅមានកំហិត ព្រោះវាអាចប៉ះពាល់ដល់ដំណើរការកាត់ទោសសំណុំរឿងរបស់លោក។
លោកសុន ឆ័យបានឲ្យដឹងផងដែរថា លោកអ៊ុំ សំអានត្រូវឃុំឃាំងក្នុងបន្ទប់ទំហំ៣ម៉ែត្រគុណនឹង៤ម៉ែត្រដែលមានអ្នកទោស២៤នាក់ដែលក្នុងនោះមានបង្គន់ផងដែរ។
ម៉្យាងវិញទៀត លោកសំ សុគង់ មេធាវីតំណាងឲ្យសកម្មជននិងតំណាងរាស្ត្រគណបក្សសង្គ្រោះជាតិដែលជាប់ឃុំឃាំង បានឲ្យដឹងថា លោកកឹម សុខា លោកយ៉ែម បុញ្ញារិទ្ធ និងមន្ត្រីផ្សេងទៀត មិនបានចូលសួរសុខទុក្ខសមាជិកគណបក្សសង្គ្រោះជាតិ១៥នាក់ផ្សេងទៀត ដែលរួមមានលោកហុង សុខហួរ សមាជិកព្រឹទ្ធសភា និងលោកមាជ សុវណ្ណារ៉ានោះទេ ព្រោះអគ្គនាយកដ្ឋានពន្ធនាគារមិនឆ្លើយតបនឹងសំណើ។ លោកសំ សុគង់បានសរសេរលិខិតសុំការអនុញ្ញាតនេះកាលពីថ្ងៃទី១៩ខែមេសា។ សកម្មជនទាំងនេះត្រូវតុលាការក្រុងភ្នំពេញកាត់ទោសឲ្យជាប់ពន្ធនាគារពី៧ឆ្នាំទៅ២០ឆ្នាំ ប៉ុន្តែពួកគេបានប្តឹងឧទ្ធរណ៍។
«មានការរឹតត្បិតចំពោះតំណាងរាស្ត្រក្នុងការជួបជនជាប់ចោទទាំងនោះដែលជាប់ក្នុងពន្ធនាគារហ្នឹង»។
ទោះជាយ៉ាងណាក្តី លោកនុត សវនា អគ្គនាយករងនៃអគ្គនាយកដ្ឋានពន្ធនាគារ បានឲ្យដឹងថា ការចេញចូលសួរសុខទុក្ខអ្នកទោសដែលមិនទាន់កាត់ទោសជាស្ថាពរអាចប៉ះពាល់ដល់នីតិវិធីក្នុងការកាត់សេចក្តី។
«អ្នកដែលមិនទាន់កាត់ទោស យើងអនុញ្ញាតឲ្យតែសាច់ឈាមជិតដិតទេ ដូចជាម្តាយឪពុកកូនអីហ្នឹង ប្រពន្ធអីហ្នឹងណា៎។ ហើយគាត់ឋិតនៅក្រោមនីតិវិធីតុលាការ ហើយឲ្យអ្នកផ្សេងចូលទៅឆ្វេកឆ្វាចអញ្ចឹង ធ្វើម៉េច? បើមេធាវីគាត់ទៅ គាត់មានបណ្ណមានអី អាហ្នឹងយើងអនុញ្ញាត»។
លោកនិយាយថា សំណើសុំចូលសួរសុខទុក្ខដោយអ្នកនយោបាយតាមរយៈលិខិតមេធាវីមានអាចប៉ះពាល់ដល់នីតិវិធីតុលាការ ដូចនេះត្រូវមាននីតិវិធី និងវិធានការត្រឹមត្រូវ៕
