អ្នករិះគន់ខ្លាំងៗតាមបណ្តាញសង្គមហ្វេសប៊ុកម្នាក់ត្រូវចាប់ខ្លួននិងចោទប្រកាន់ដោយតុលាការក្រុងភ្នំពេញនៅល្ងាចថ្ងៃនេះ។ មន្ត្រីសង្គមស៊ីវិលនិងអតីតគណបក្សសង្គ្រោះជាតិបានហៅការចាប់ខ្លួននេះថាជាការបិទសិទ្ធិបញ្ចេញមតិ។
អតីតសកម្មជនគណបក្សសង្រ្គោះជាតិប្រចាំខេត្តព្រះសីហនុម្នាក់ត្រូវសាលាដំបូងរាជធានីភ្នំពេញបានចោទប្រកាន់នៅរសៀលថ្ងៃព្រហស្បតិ៍នេះពីបទ«បទញុះញង់ឲ្យមានការរើសអើង និងញុះញង់ឲ្យមានការប្រព្រឹត្តបទល្មើសជាអាទិ៍»។ នេះបើយោងទៅតាមមន្រ្តីអង្គការការពារសិទ្ធិមនុស្សនៅកម្ពុជា។
លោកម៉ៃ ហុងស្រៀង អាយុ៣៨ ត្រូវចាប់ខ្លួនកាលពីយប់ថ្ងៃអង្គារក្នុងរាជធានីភ្នំពេញ ក្រោយពីលោកបានបង្ហោះសារមួយនៅលើគណនីហ្វេសប៊ុករបស់ខ្លួនក្រោមឈ្មោះថា«ទោះស្លាប់ក៏ជាខ្មែរ»និងមានឈ្មោះជាភាសាអង់គ្លេសថា «Mai Hongsreang» កាលពីថ្ងៃទី២៨ ខែកក្កដាកន្លងទៅនេះ។ ក្នុងសារនោះ លោកម៉ៃ ហុងស្រៀង បានរៀបរាប់ក្នុងន័យចោទប្រកាន់ថា លោកនាយករដ្ឋមន្ត្រី ហ៊ុន សែន បានផ្ទេរការងារឲ្យទៅលោក ស ខេង រដ្ឋមន្ត្រីក្រសួងមហាផ្ទៃក្នុងន័យចង់«កម្ចាត់កម្លាំង»ដែលស្មោះស្ម័គ្រជាមួយលោក ស ខេង។
លោក ឆាយ គឹមឃឿន អ្នកនាំពាក្យអគ្គស្នងការនគរបាលជាតិ បានប្រាប់ VOA ថា ការចាប់ខ្លួនអតីតសកម្មជននៃអតីតបក្សសង្គ្រោះជាតិរូបនេះគឺដោយសារសកម្មជនរូបនោះបានបង្ហោះសារប្រមាថរដ្ឋាភិបាល។
«ការបង្ហោះសារប្រមាថរាជរដ្ឋាភិបាល និងបង្កការញុះញង់រហូតដល់បង្កភាពអសន្តិសុខ»។
គណបក្សសង្រ្គោះជាតិ ដែលជាអតីតគណបក្សប្រឆាំងធំជាងគេនៅកម្ពុជាក៏បានចេញសេចក្តីថ្លែងការណ៍ថ្កោលទោសការចាប់ខ្លួនអតីតសកម្មជននយោបាយរបស់ខ្លួនភ្លាមៗនៅថ្ងៃដដែលនោះដែរ។
សេចក្តីថ្លែងការណ៍នោះបានហៅការចាប់ខ្លួនលោក ម៉ៃ ហុងស្រៀង ថា«ធ្វើឡើងក្រោមហេតុផលនយោបាយ និងជាទង្វើដ៏គឃ្លើន និងរំលោភបំពានលើសិទ្ធិសេរីភាពបុគ្គលយ៉ាងធ្ងន់ធ្ងរ ព្រមទាំងរំលោភច្បាប់ និងរដ្ឋធម្មនុញ្ញនៃព្រះរាជាណាចក្រកម្ពុជា»។
លោកអំ សំអាត មន្រ្តីជាន់ខ្ពស់ផ្នែកអង្កេតនៃអង្គការការពារសិទ្ធិមនុស្សលីកាដូ មានប្រសាសន៍ថា ការចាប់ខ្លួនលោក ម៉ៃ ហុងស្រៀង បានបង្ហាញពីការរឹតត្បិតសិទ្ធិសេរីភាពបញ្ចេញមតិ។
«កន្លងមកនេះ ការចោទប្រកាន់ទាំងអស់ហ្នឹង ភាគច្រើនគឺគេយល់ឃើញថា វារឹតត្បិតសេរីភាពនៅក្នុងការបញ្ចេញមតិ ហើយមួយទៀតគឺថា ហេតុផលទាំងអស់ហ្នឹងគឺជាហេតុផលនយោបាយច្រើនជាងការអនុវត្តផ្លូវច្បាប់នៃបទល្មើស»។
លោក អំ សំអាត ក៏បានលើកទឹកចិត្តឲ្យមានការលើកកម្ពស់ការប្រើប្រាស់បណ្តាញសង្គមប្រកបដោយសីលធម៌ និងការបើកទូលាយនូវសិទ្ធិបញ្ចេញមតិយោបល់។
VOA មិនអាចទាក់ទងសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញលោក គុជ គឹមឡុង បានទេ នៅថ្ងៃព្រហស្បតិ៍នេះ ដោយសារតែទូរស័ព្ទលោករោទិ៍តែមិនមានអ្នកលើក។
យោងតាមមន្ត្រីនគរបាល លោក ម៉ៃ ហុងស្រៀង គឺជាកម្មករសំណង់ក្នុងខេត្តព្រះសីហនុ។ លោកត្រូវតាមចាប់ខ្លួនក្នុងខេត្តនោះ មុននឹងលោកគេចខ្លួនមកកាន់ទីក្រុងភ្នំពេញ ហើយត្រូវចាប់ខ្លួននៅទីនេះ។
លោកត្រូវចោទប្រកាន់តាមមាត្រា៤៩៤ មាត្រា៤៩៥និង៤៩៦នៃក្រមព្រហ្មទណ្ឌ។ ប្រសិនបើតុលាការរកឃើញថា លោកមានកំហុស លោកអាចនឹងប្រឈមមុខនឹងទោសជាប់ពន្ធនាគារពីប្រាំមួយខែដល់បីឆ្នាំ។
ក្នុងរយៈពេលថ្មីៗចុងក្រោយនេះ លោកនាយករដ្ឋមន្ត្រី ហ៊ុន សែន បានបង្ហាញប្រតិកម្មចំពោះអ្នកដែលសរសេររិះគន់ ឬក៏ប្រមាថដល់រូបលោកតាមបណ្តាញសង្គមហ្វេសប៊ុក៕
