ភ្ជាប់​ទៅ​គេហទំព័រ​ទាក់ទង

លោក​ស្រី គ្លីនតុន​អំពាវនាវ​ឲ្យ​មាន​តម្លាភាព​ក្នុង​ទំនាក់ទំនង​ចិន​អាមេរិក


លោកស្រី​រដ្ឋមន្រ្តី​ការបរទេស​អាមេរិក​ ហ៊ីលឡារី​ គ្លីនតុន។

វ៉ាស៊ីនតោន៖ លោក​ស្រី​រដ្ឋ​មន្ដ្រី​ក្រសួង​ការ​បរទេស​ ​ស.រ.អ.​ ហ៊ីឡារីគ្លីនតុន​ (Hillary Clinton)​ មានប្រសាសន៍​ថា ​ទំនាក់​ទំនង​ចិន​អាមេរិកាំងចូល​មក​ដល់​វគ្គ​មួយ​ដ៏សំខាន់បំផុត​ ​ក្រោយ​ពី​បី​ទសវត្សរ៍​ដែល​ប្រទេស​ទាំង​ពីរ​បាន​បើក​ឲ្យ​មានទំនាក់​ទំនងគ្នា​តាម​ផ្លូវ​ការ​កាល​ពី​ឆ្នាំ​១៩៧៩​ ​ហើយ​ប៉ុន្មាន​ថ្ងៃ​ប៉ុណ្ណោះមុនទស្សន​កិច្ច​របស់​ប្រធានាធិបតី​ចិន​ ​លោក​ ​ហ៊ូ ​ជីនតាវ​ នៅ​ក្នុង​ ស.រ.អ.។

នៅ​ក្នុង​សុន្ទរកថា​ថ្លែង​កាល​ពី​សុក្រពី​ក្រសួង​ការ​បរទេស​ ​លោក​ស្រី​ក្លីនតុនបាន​អំពាវ​នាវ​សុំ​ឲ្យ​មាន​តម្លាភាព​ និងការ​ទុក​ចិត្ដគ្នា​ ​ខណៈ​ដែល​រដ្ឋាភិបាលក្រុង​វ៉ាស៊ីនតោន​ជំរុញ​ឲ្យ​មាន​ភាព​ទូលំ​ទូលាយ​ដល់ការ​ទាក់ទង​គ្នា​ជា​មួយ​ទី​ក្រុង​ប៉េកាំង។

លោក​ស្រី​គ្លីនតុន​មាន​ប្រសាសន៍​ថា​ ​ទំនាក់​ទំនង​ចិនអាមេរិកំាង​មាន​សារៈ​សំខាន់ដូច​គ្នា​នឹង​ទំ​នាក់​ទំនង​ទ្វេភាគី​នៅ​ក្នុង​ពិភព​លោក​រវាង​ប្រទេស​នានា​លើ​ពិភព​លោក​ ដែល​គេ​អាចពិពណ៌នា​ដោយ​ប្រើ​ពាក្យ​សាមញ្ញ​ ​ដូច​ជា ​ '​ប្រទេស​មិត្ដ​ ឬ​ ប្រទេស​គូ​ប្រជែង'។

«ប្រវត្ដិ​សាស្រ្ដ​បាន​ឲ្យ​ដំបូន្មាន​ថា​ ប្រទេស​ដែល​ទើប​នឹង​ឡើង​ឋានៈ​ជា​មហា​អំណាច​ថ្មី​ច្រើន​តែ​ដើរ​ឆ្ពោះ​ទៅ​រក​យុគ​នៃ​ទំនាស់​ និង​ភាពមិន​ជាក់លាក់។ ​ ​វា​ពិតហើយ​ថា​ ​ឋិត​នៅ​ម្ខាង​ម្នាក់​នៃ​មហា​សាគរ​ប៉ាស៊ីហ្វិក​ ​យើង​អាច​មើល​ឃើញ​សញ្ញា​រំជើបរំជួល​នៃ​ការ​កើន​អំណាច​នៅ​ក្នុង​ប្រទេស​ចិន ​និង​អំពី​អនាគត​នៃ​ទំនាក់​ទំនង​គ្នា​រវាងស.រ.អ. ​និង​ចិន។​ អ្នក​ខ្លះ​នៅ​ក្នុងតំបន់​ និង​អ្នក​ខ្លះ​ទៀត​នៅ​ទី​នេះ​ បាន​មើល​ឃើញ​ថា​ ​ការ​លូត​លាស់​របស់​ចិន​ជា​ការ​គំរាម​មួយ​ដែល​នឹង​នាំទៅ​ឲ្យ​មាន​ទំនាស់​ ​ដូច​ជា​សង្រ្គាម​ត្រជាក់​ ឬ​ការ​ទន់​ខ្សោយ​របស់​ស.រ.អ.។ ​មាន​អ្នក​ខ្លះ​ទៀត​នៅ​ក្នុង​ប្រទេស​ចិន​ ​មាន​ចិត្ដព្រួយ​បារម្ភ​ថា​ ​ស.រ.អ.​មាន​និន្នា​ការ​លំអៀង​ទៅ​លើ​ការ​រាំង​ខ្ទប់​ចិន​ ​មិន​ឲ្យ​មាន​ការ​លូត​លាស់ ដែល​ជា​ទស្សន​មួយ​ជំរុញ​ឲ្យ​បង្កើត​ទស្សនៈ​ជាតិ​និយម​ចិន។​ យើង​បដិសេធ​ទស្សន​ទាំង​អស់​នោះ»។

លោក​ស្រី​គ្លីនតុន​ថ្លែង​ថា​ ​រដ្ឋបាល​អូបាម៉ា​អនុវត្ដ​យុទ្ធសាស្រ្ដត្រីកោណ។

«យើង​នឹង​ប្រើ​វិធានការ​ធ្វើ​ការ​ចរចា​គ្នា​ដ៏ខ្លាំង​សកម្ម​នៅ​តំបន់​អាស៊ី​ ​ប៉ាស៊ីហ្វីក។, យើង​ខិត​ខំ​ស្ថាបនា​ឲ្យ​មាន​ការ​ទុក​ចិត្ដគ្នា​ដ៏​ខ្លាំង​ ​រឹង​មាំ​រវាង​ចិន​ និង​ស.រ.អ. ​ ​ហើយ​យើង​ប្ដេជ្ញា​ថា​ ​នឹង​ពង្រីក​កិច្ច​សហប្រតិបត្ដិការ​សេដ្ឋកិច្ច​ ​នយោបាយ​ ​និង​សន្ដិសុខនៅ​គ្រប់​ទី​កន្លែង​ ដែល​យើង​អាច​ធ្វើ​បាន»។

លោក​ស្រី​រដ្ឋមន្ដ្រី​គ្លីនតុន​មាន​ប្រសាសន៍​ទៀត​ថា​ ​ប្រទេស​ទាំងពីរ​ត្រូវ​ការ​រួមកម្លាំង​គ្នា​ឲ្យ​មាន​ប្រសិទ្ធិភាពឡើង​ ​ដើម្បី​ធ្វើ​ឲ្យ​សម្រេច​ដល់​កាតព្វ​កិច្ច​សកល។ ​លោក​ស្រី​មាន​ប្រសាសន៍​ទៀត​ថា​ ​កិច្ចការ​ទាំង​នេះ​ត្រូវ​ការ​ឲ្យ​មាន​ការពាក់ព័ន្ធរឹង​មាំ​ និង​ជាក់​ច្បាស់ ​ក្នុង​ការ​ដោះ​ស្រាយ​ការ​ខ្វែង​គំនិតគ្នា​ ​ដូច​ជា​ខាង​វិស័យ​មនុស្ស​ធម៌។

«ពេល​នេះ ខ្ញុំ​ដឹង​ថា​ មាន​អ្នក​ខ្លះ​នៅ​ក្នុង​ប្រទេស​ចិន​ ​មិន​ត្រឹម​តែ​នៅ​ក្នុងរដ្ឋាភិបាល​ប៉ុណ្ណោះ​ទេ ​តែ​ក្នុង​ចំណោម​ប្រជាពល​រដ្ឋ​ចិន​ជា​ទូ​ទៅ​ផងដែរ​ ​មិន​ចូល​ចិត្ដ ​ឬ​បដិសេធ​ការ​លើក​ស្ទួយ​សិទ្ធិ​មនុស្ស​របស់​យើង​ ​ហើយ​ថា​ ​នេះ​ជាការ​ជ្រែត​ជ្រែកចូល​ទៅ​ក្នុង​បូរណភាព​ប្រទេស​ចិន។ ​តែ​ ក្នុង​នាមជា​សមាជិក​អ្នកបង្កើត​អ.ស.ប.​មួយដែរ​ ​ចិន​បាន​ប្ដេជ្ញា​ថា​ នឹង​គោរព​សិទ្ធិ​របស់​ប្រជា​ពលរដ្ឋទាំង​អស់។ ​នេះ​ជា​សិទ្ធិ​សកល​ទទួល​ស្គាល់​ដោយ​សហគមន៍​អន្ដរ​ជាតិ»។

លោក​ស្រី​គ្លីនតុន​មាន​ប្រសាសន៍​ទៀត​ថា​ ​ស.រ.អ.​នឹង​ដាក់​សម្ពាធមក​លើ​ចិន​ ​នៅ​ពេល​ដែល​អាជ្ញា​ធរ​ចិន​រឹត​បន្ដឹង​មក​លើ​អ្នក​សរសេរ​បញ្ចេញមតិ​នៅ​ក្នុង​អ៊ិនធឺណិត​ ឬ ​Bloggers ​ចាប់​សកម្មជន​ដាក់​គុក​ ​ហើយ​បដិសេធ​សេរីភាព​ក្នុង​ការ​គោរព​សាសនា​ ​ហើយ​និងសិទ្ធិ​ធ្វើ​ការ​តវ៉ា​ដោយ​សន្ដិវិធី។

ប្រធានាធិបតី​របស់​ប្រទេស​ចិន​នឹង​ធ្វើដំ​ណើរ​មក​ដល់​ស.រ.អ. ​នៅថ្ងៃអង្គារ​នេះ៕

ប្រែ​សម្រួល​ដោយ​លោក​អ៊ូ ធួក

XS
SM
MD
LG