បណ្ដុំអង្គការក្រៅរដ្ឋាភិបាលជាង១០ នៅថ្ងៃចន្ទនេះ បានហៅការបន្តឃុំខ្លួនបណ្ដោះអាសន្នអ្នកការពារសិទ្ធិមនុស្ស៤នាក់ និងអគ្គលេខាធិការរងម្នាក់នៃគណៈកម្មការរៀបចំការបោះឆ្នោត (គ.ជ.ប) ថា មិនស្របច្បាប់ជាតិ និងជាការអនុវត្តខុសពីបទដ្ឋានសិទ្ធិមនុស្សអន្តរជាតិ។ នេះបើយោងតាមការវិភាគផ្លូវច្បាប់មួយរបស់ក្រុមអង្គការសង្គមស៊ីវិលទាំងនេះ ដែលបានចេញផ្សាយនៅថ្ងៃចន្ទនេះ។
ការវិភាគរបស់ក្រុមអង្គការសង្គមដែលរួមមានមជ្ឈមណ្ឌលសិទ្ធិមនុស្សកម្ពុជា មជ្ឈមណ្ឌលអប់រំច្បាប់សម្រាប់សហគមន៍ និងអង្គការជំនួយផ្នែកច្បាប់នៃកម្ពុជាជាដើមនេះ បានរៀបរាប់ថា ការបន្តឃុំខ្លួនបុគ្គលទាំង៥រូបនេះ គឺពុំមានសម្អាងហេតុតាមផ្លូវច្បាប់គ្រប់គ្រាន់សម្រាប់ការអនុវត្តការឃុំខ្លួន ព្រមទាំងការបដិសេធសំណើសុំនៅក្រៅឃុំរបស់អ្នកទាំង៥ ក៏គ្មានសម្អាងហេតុសមស្របដែរ។
បុគ្គលទាំង៥នាក់នេះរួមមាន លោក នី សុខា លោក យី សុខសាន្ត លោក ណៃ វ៉ង់ដា និងលោកស្រី លឹម មុនី ដែលអ្នកទាំងបួន គឺជាមន្ត្រីជាន់ខ្ពស់នៃអង្គការការពារសិទ្ធិមនុស្សអាដហុក ហើយនឹងលោក នី ចរិយា ជាអតីតបុគ្គលិកអង្គការនេះដែរ ដែលបច្ចុប្បន្ន គឺជាអគ្គលេខាធិការរងម្នាក់នៃគ.ជ.ប។
អ្នកទាំង៥ ត្រូវបានឃុំខ្លួនបណ្ដោះអាសន្នរង់ចាំការជំនុំជម្រះក្នុងសំណុំរឿងក្តីទាក់ទងនឹងការចោទប្រកាន់ពាក់ព័ន្ធនាង ខុមចាន់តារ៉ាទី ហៅស្រីមុំ ដែលគេចោទថា មានរឿងអាស្រូវស្នេហាលួចលាក់ជាមួយលោក កឹម សុខា ប្រធានស្ដីទីគណបក្សសង្គ្រោះជាតិ។ ប៉ុន្តែ គណបក្សប្រឆាំងនិងអ្នកវិភាគ ចាត់ទុកសំណុំរឿងនេះថាជារឿងនយោបាយ។
ការវិភាគផ្លូវច្បាប់របស់ក្រុមអង្គការសង្គមស៊ីវិល ជុំវិញការឃុំខ្លួនអ្នកទាំង៥នេះ ធ្វើឡើងតែពីរថ្ងៃប៉ុណ្ណោះ មុនពេលតុលាការកំពូលរបស់កម្ពុជា គ្រោងនឹងបើកសវនាការ សម្រេចលើបណ្ដឹងសារទុក្ខរបស់អ្នកទាំង៥ ប្រឆាំងការឃុំខ្លួនពួកគេបណ្ដោះអាសន្ន ដែលមានរយៈពេលជាង២០០ថ្ងៃមកហើយនេះ៕
