បុរសជនជាតិចិនម្នាក់ដែលត្រូវបានរកឃើញថាមានផ្ទុកមេរោគកូរ៉ូណាវីរុសប្រភេទថ្មី នៅក្នុងខេត្តព្រះសីហនុត្រូវបានអនុញ្ញាតឲ្យចេញពីមន្ទីរពេទ្យ បន្ទាប់ពីទទួលបានការព្យាបាលជិតពីរសប្តាហ៍។ នេះបើយោងតាមសេចក្តីជូនដំណឹងរបស់ក្រសួងសុខាភិបាលដែលចេញផ្សាយនៅថ្ងៃច័ន្ទនេះ។
យោងតាមសេចក្តីជូនដំណឹង ការធ្វើតេស្តរកមេរោគកូរ៉ូណាវីរុសលើកទី៣ ដោយវិទ្យាស្ថានប៉ាស្ទ័រកម្ពុជាកាលពីថ្ងៃទីអាទិត្យ ទី៩ បង្ហាញថា អ្នកជំងឺជនជាតិចិន លោក ចា ជិនហួរ (Jia Jianhua) អាយុ៦០ឆ្នាំ មានលទ្ធផលតេស្តអវិជ្ជមាន និងបានជាសះស្បើយពីជំងឺរលាកសួតប្រភេទថ្មី ដែលបង្កដោយមេរោគកូរ៉ូណាវីរុសនេះ។ ក្រសួងបញ្ជាក់ថាក្រុមគ្រួសាររបស់លោកដែលមានសមាជិក៤នាក់ក៏មិនផ្ទុកវីរុសនោះទេ។
លោក លី សូវ៉ាន់ អ្នកនាំពាក្យក្រសួងសុខាភិបាលប្រាប់ VOA កាលពីរសៀលថ្ងៃច័ន្ទនេះថាតាមរយៈលទ្ធផលតេស្ត លោក ចា ជិនហួរ ត្រូវបានក្រសួងសុខាភិបាលអនុញ្ញាតឲ្យចាកចេញពីមន្ទីរពេទ្យក្នុងខេត្ត បន្ទាប់ពីការធ្វើតេស្តរកមេរោគកូរ៉ូណាវីរុសទាំង៣លើកបង្ហាញថាពួកគេមិនមានផ្ទុកវីរុសនោះទេ។
លោកមានប្រសាសន៍ថា៖ «យើងធ្វើតេស្ត Negative (អវិជ្ជមាន)ចំនួនបីដងជាប់ៗគ្នាដោយវិទ្យាស្ថានប៉ាស្ទ័រកម្ពុជា ដែលជាមន្ទីរពិសោធន៍ថ្នាក់អន្តរជាតិ»។
ទោះយ៉ាងណាអ្នកនាំពាក្យក្រសួងសុខាភិបាលរូបនេះបដិសេធមិនផ្តល់ការអត្ថាធិប្បាយទាក់ទិននឹងវិធីសាស្ត្រព្យាបាលរបស់មន្ទីរពេទ្យកម្ពុជា។
អ្នកនាំពាក្យរូបនោះបន្តថា អ្នកជំងឺជនជាតិចិនអាចធ្វើដំណើរដោយសេរីនៅក្នុងប្រទេសកម្ពុជា ប៉ុន្តែលោកមិនអាចបញ្ជាក់ថា ជនជាតិចិនរូបនោះនឹងធ្វើដំណើរទៅណាបន្តទៀតនោះទេ។
រដ្ឋមន្ត្រីក្រសួងសុខាភិបាលលោក ម៉ម ប៊ុនហេង រដ្ឋមន្ត្រីបរិស្ថានលោក សាយ សំអាល់តំណាងអង្គការសុខភាពពិភពលោកប្រចាំកម្ពុជាលោកស្រី លី អៃឡាន (Li Ailan) និងមន្ត្រីក្រសួងសុខាភិបាលមួយចំនួនបានអមដំណើរអ្នកជំងឺជនជាតិចិន ចាកចេញពីមន្ទីរពេទ្យក្នុងខេត្តព្រះសីហនុនៅព្រឹកថ្ងៃច័ន្ទនេះ។ នេះបើតាមសេចក្តីជូនដំណឹងរបស់ក្រសួងសុខាភិបាល។
យ៉ាងណាក៏ដោយ លោក លី សូវ៉ាន់ អ្នកនាំពាក្យក្រសួងសុខាភិបាលដដែល បន្ថែមថា ក្រសួងសុខាភិបាលនៅតែបន្តតាមដានថាតើមានករណីឆ្លងវីរុសនេះនៅកម្ពុជាឬយ៉ាងណា។
លោកថ្លែងថា៖ «បាទ ប៉ុន្តែលទ្ធភាពនៃការកើតមាននៅបន្តទៀត យើងមិនត្រូវធ្វេសប្រហែសទេ ត្រូវបន្តតាមរកឲ្យអស់លទ្ធភាពបាទ»។
អ្នកជំងឺជនជាតិចិន លោក ចា ជិនហួរ និងគ្រួសារដែលមានសមាជិក៤នាក់ ត្រូវបានអាជ្ញាធរកម្ពុជាដាក់នៅឲ្យដាច់ដោយឡែកនៅមន្ទីរពេទ្យក្នុងខេត្តព្រះសីហនុ កាលពីថ្ងៃទី២៧ ខែមករា ឆ្នាំ២០២០ បន្ទាប់ពីរកឃើញថាមានផ្ទុកមេរោគកូរ៉ូណាវីរុស ក្នុងពេលដែលលោកធ្វើដំណើរពីទីក្រុងវូហាននៃប្រទេសចិនមកកម្ពុជា។
គួរបញ្ជាក់ថា គិតត្រឹមរសៀលថ្ងៃច័ន្ទនេះមានមនុស្សជាង៩០០នាក់ នៅក្នុងប្រទេសចិនបានស្លាប់ដោយសារមេរោគកូរ៉ូណាវីរុសថ្មីនេះ។ មនុស្សជាង៤ម៉ឺននាក់ទៀតបានឆ្លងវីរុសដែលផ្ទុះនៅទីក្រុងវូហាននៃខេត្តហ៊ុយបេ ប្រទេសចិន និងបានរីករាលដាលដល់ទៅជិត៣០ប្រទេស។ ក្នុងពេលដែលចំនួនមនុស្សស្លាប់បន្តកើនឡើង មនុស្សជាង៣២០០នាក់បានជាសះស្បើយពីជំងឺនេះ៕
