រដ្ឋាភិបាលចិនកំពុងធ្វើឱ្យក្រុមអង្គការក្រៅរដ្ឋាភិបាលក្នុងស្រុកនិងបរទេសពិបាកធ្វើការកាន់តែខ្លាំងឡើងនៅក្នុងប្រទេសចិន។ ប៉ុន្តែអង្គប្រជុំកំពូលស្រ្តីសាកលដែលកំពុងធ្វើនៅក្រុងប៉េកាំង ហើយនឹងបានចាប់ផ្តើមបញ្ចេញអ្វីដែលគេហៅថា កម្មវិធីការដឹកនាំរបស់អង្គការក្រៅរដ្ឋាភិបាល ឬ”NGOs LEAD” នោះ បាននិយាយថា ក្រុមគេសំខាន់ណាស់សម្រាប់ពង្រឹងអំណាចសេដ្ឋកិច្ចរបស់ស្រ្តី។
Peter Simpson រាយការណ៍រឿងនេះសម្រាប់ VOA ពីទីក្រុងប៉េកាំង។ អ្នកស្រី នៅ សារីម ប្រែសម្រួលអត្ថបទនេះជូនលោកអ្នក។
ក្រុមស្ត្រីជាមេដឹកនាំពាណិជ្ជកម្មនឹងក្រុមស្រ្តីមានបណ្តាស័ក្តិពីទូទាំងពិភពលោកបានស្តាប់យ៉ាងយកចិត្តទុកដាក់កម្មវិធីថ្មីមួយ ដែលលោកស្រី Irene Natividad ប្រធានអង្គប្រជុំកំពូលស្រ្តីសាកលបានបញ្ចេញអង្គការសម្រាប់បង្ហាត់ក្រុមមេដឹកនាំអង្គការក្រៅរដ្ឋាភិបាល។
លោកស្រីថ្លែងថា អង្គការក្រៅរដ្ឋាភិបាលជាអាយុជីវិតសម្រាប់អំណាចសេដ្ឋកិច្ចស្រ្តីនៅគ្រប់ទិសទី ដែលមានរួមទាំងប្រទេសចិនផងដែរ ប្រទេសដែលធ្វើជាអ្នកទទួលភ្ញៀវខួប២០ឆ្នាំរបស់អង្គប្រជុំកំពូលនេះ។
តែក្នុងប៉ុន្មានខែថ្មីៗនេះ ប្រទេសចិនបានដាក់កម្រិតធ្ងន់ៗច្រើនលើក្រុមអង្គការក្រៅរដ្ឋាភិបាលក្នុងស្រុកនិងបរទេស ហើយប្រទេសចិនត្រូវគេចោទថា បានធ្វើទុក្ខទៅលើមេដឹកនាំអង្គការក្រៅរដ្ឋាភិបាលច្រើនរូប ដែលមានទាំងលោក វាន់យ៉ងហៃ សកម្មជនល្បីឈ្មោះម្នាក់ខាងរោគអេដស៍ផងដែរ ដែលបានរត់ចេញពីប្រទេសចិនចូលមកស.រ.អ. កាលពីដើមខែនេះ។
ក្រុមអ្នកសង្កេតការណ៍នឹងអ្នករិះគន់និយាយថា រដ្ឋាភិបាលក្រុងប៉េកាំងខ្លាចឥទ្ធិពលកាន់តែមានខ្លាំងឡើងរបស់សង្គមស៊ីវិល ដែលមានអង្គការក្រៅរដ្ឋាភិបាលជាអ្នកតំណាងនោះ ម្ល៉ោះហើយរដ្ឋាភិបាលចិនកំពុងបង្ក្រាបលើក្រុមនោះ។
លោកស្រី ណាទីវិដាដ ថ្លែងថា លោកស្រីបារម្មណ៍ពីការដែលកើតឡើងទាំងនោះ ហើយសង្ឃឹមថាប្រទេសចិននឹងប្រឹងធ្វើឱ្យបានចម្រើនលើអ្វីដែលលោកស្រីហៅថា ជាវិស្ស័យមួយសំខាន់ណាស់ក្នុងសង្គម។
“អង្គការក្រៅរដ្ឋាភិបាលជាមធ្យោបាយសំខាន់សម្រាប់ធ្វើកិច្ចការ ដែលរដ្ឋាភិបាលនឹងក្រុមវិស្ស័យឯកជនធ្វើមិនកើត ពីព្រោះមកពីអង្គការក្រៅរដ្ឋាភិបាលធ្វើកិច្ចការចូលទៅដល់អ្នកនៅស្រទាប់ក្រោម។ ហើយជាការចាំបាច់ណាស់សម្រាប់ក្រុមគេធ្វើការក្នុងស្ថានភាពមួយគ្មានការបន្តឹង ដូច្នេះខ្ញុំសង្ឃឹមថា ច្បាប់ថ្មីអាចត្រូវពិនិត្យមើលឡើងវិញ”។
មានច្បាប់ច្រើនដែលដាក់ការបន្តឹងលើអំណោយទៅក្រុមអង្គការក្រៅរដ្ឋាភិបាលក្នុងស្រុក។ ច្បាប់ទាំងនោះនឹងចូលជាធរមាននៅខែមិនា ហើយអង្គការចិនជាច្រើននិយាយថា ផ្នែកប្រាក់កាសរបស់គេត្រូវរឹតបន្តឹង រហូតដល់គេត្រូវបិទអង្គការរបស់គេ ហើយជាលទ្ធផល មនុស្សច្រើនលាននៅប្រទេសចិនត្រូវរងទុក្ខ។ អង្គការទាំងនោះនិយាយថា មានច្បាប់ថ្មីខាងពន្ធដារ ហើយនឹងមានច្បាប់បន្តឹងខ្លះទៀតដែលរចនាឡើងសម្រាប់ឱ្យអង្គការទាំងនោះមានការរអាក់រអួលក្នុងការងារ។
លោកNicholas Bequelin ពីអង្គការHuman Rights Watch ការពារសិទ្ធិមនុស្សនៅកោះហុងកុង បានសរសើរលោកស្រី ណាទីវិដាដ ដែលបានលើករឿងនេះមកនិយាយ។
“យើងកំពុងនៅក្នុងស្ថានភាពមួយអាក្រក់ណាស់សម្រាប់ក្រុមអង្គការក្រៅរដ្ឋាភិបាលនៅប្រទេសចិនក្នុងពេលនេះ ហើយរឿងទាំងនេះប្រហែលជារដ្ឋាភិបាលចិនបារម្មណ៍ពីការដែលអង្គការក្រៅរដ្ឋាភិបាលបានដាក់កិច្ចការរបស់រដ្ឋាភិបាលចិន នៅក្រោមការតាមពិនិត្យមើលដិតដល់មួយ ហើយនៅទីបំផុតនឹងនាំឱ្យរដ្ឋាភិបាលចិនជួបនឹងការគាបសង្កត់ឱ្យទទួលខុសត្រូវ ជាកិច្ចការដែលរដ្ឋាភិបាលចិន មិនព្រមធ្វើ។ ហើយគ្មានការសង្ស័យទេថា ប្រជាពលរដ្ឋចិននឹងបន្តរុញឱ្យមានអង្គការច្រើនថែមទៀតសម្រាប់ដែលតំណាងផលប្រយោជន៍របស់គេ ហើយនឹងដោះស្រាយបញ្ហាសង្គមកិច្ច ដែលគេមើលឃើញនោះ”។
លោកស្រី ណាទីវី ដាដ ជាជនជាតិអាមេរិកាំង បានជម្រាបក្រុមប្រតិភូថា អង្គការក្រៅរដ្ឋាភិបាលរបស់លោកស្រី Lead Program នេះនឹងចាប់ផ្តើមបង្ហាត់ស្រ្តីជាមេដឹកនាំជំនួញនៅឆ្នាំក្រោយ។ លោកស្រីថ្លែងទៀតថា អង្គការនេះនឹងជួយក្រុមអង្គការក្រៅរដ្ឋាភិបាលនៅទូទាំងពិភពលោកដែលធ្វើការក្នុងលក្ខណលំបាកឱ្យបានបន្តការងារមានសារៈសំខាន់របស់ខ្លួនទៅទៀត៕