សមាជិកក្រុមប្រឹក្សារដ្ឋ និងជាមន្ត្រីកំពូលទទួលបន្ទុកកិច្ចការការពារប្រទេសចិន នឹងមកបំពេញទស្សនកិច្ចរយៈពេល៥ថ្ងៃ នៅកម្ពុជា នៅពាក់កណ្តាលខែមិថុនានេះ ដើម្បីបង្កើនកិច្ចសហប្រតិបត្តិការយោធារវាងប្រទេសទាំងពីរ។ នេះបើយោងតាមសេចក្តីប្រកាសរបស់ក្រសួងការពារជាតិដែលបានចេញផ្សាយជាសាធារណៈនៅថ្ងៃព្រហស្បតិ៍។
ការមកបំពេញទស្សនកិច្ចនៅកម្ពុជារបស់នាយឧត្តមសេនីយ៍ វៃ ហ្វេនហេ (Wei Fenghe) សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារប្រទេសនៃសាធារណរដ្ឋប្រជាមានិតចិន ធ្វើឡើងតបតាមការអញ្ជើញរបស់លោក ទៀ បាញ់ រដ្ឋមន្ត្រីក្រសួងការពារជាតិកម្ពុជា។ លោក Wei Fenghe ដែលនឹងបំពេញទស្សនកិច្ចនៅកម្ពុជាចាប់ពីថ្ងៃទី១៦ដល់ថ្ងៃទី២០ ខែមិថុនា ក៏គ្រោងនឹងជួបសម្តែងការគួរសមចំពោះលោកនាយករដ្ឋមន្ត្រី ហ៊ុន សែន នៅរាជធានីភ្នំពេញផងដែរ។
លិខិតរបស់អគ្គនាយកដ្ឋានយោធសេវារបស់ក្រសួងការពារជាតិ ចុះថ្ងៃទី១៤ ខែមិថុនា ឆ្នាំ២០១៨ បានសរសេរក្នុងដើមថា៖
«គណៈប្រតិភូក្រសួងការពារប្រទេសចិនដឹកនាំដោយឯកឧត្តមនាយឧត្តមសេនីយ៍ Wei Fenghe នឹងចូលជួបពិភាក្សាការងារជាមួយសម្តេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។ នៅក្នុងជំនួបពិភាក្សានេះក៏មានរៀបចំពិធីចុះហត្ថលេខាកិច្ចសហប្រតិបត្តិការរវាងក្រសួងការពារប្រទេសទាំងពីរ កម្ពុជា-ចិន ក្រោមអធិបតីភាពសមេ្តចពិជ័យសេនា ទៀ បាញ់ និងឯកឧត្តម នាយឧត្តមសេនីយ៍ Wei Fenghe នៅអគារមិត្តភាពទីស្តីការគណៈរដ្ឋមន្ត្រី»។
លោក Wei Fenghe រដ្ឋមន្ត្រីការពារប្រទេសចិន ក៏នឹងចូលរួមក្នុងពិធីបើកសម្ពោធពិព័រណ៍យោធារួមគ្នាកម្ពុជា-ចិន ក្រោមអធិបតីភាពរដ្ឋមន្ត្រីក្រសួងការពារជាតិ នៃប្រទេសទាំងពីរ នៅមជ្ឈមណ្ឌលពាណិជ្ជកម្មពិព័រណ៌កោះពេជ្ររាជធានីភ្នំពេញផងដែរ។
នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិមានប្រសាសន៍ប្រាប់ VOA នៅថ្ងៃព្រហស្បតិ៍នេះថា ដំណើរទស្សនកិច្ចរបស់លោក Wei Fenghe នឹងផ្តោតជាសំខាន់លើការពង្រឹងបន្ថែមទៀតនៃកិច្ចសហប្រតិបត្តិការយោធាចិននិងកម្ពុជា។ លោកមិនផ្តល់ការអធិប្បាយទេ នៅពេលត្រូវបានសួរថា តើភាគីចិនអាចនឹងពាំនាំជំនួយយោធាមកជូនកម្ពុជា ឬយ៉ាងណា។
«ទស្សនកិច្ចមិត្តភាពរវាងក្រសួងការពារជាតិទាំងពីរនឹងពង្រឹងកិច្ចសហប្រតិបត្តិការរវាងកងទ័ពកម្ពុជា និងចិនហ្នឹង អាហ្នឹងជាបញ្ហាសំខាន់ហើយបាទ»។
នាយឧត្តមសេនីយ៍ ឈុំ សុជាតិ បានបញ្ជាក់បន្ថែមថា រដ្ឋមន្ត្រីក្រសួងការពារជាតិនៃប្រទេសទាំងពីរ នឹងជួបពិភាក្សាគ្នានៅទីស្តីការក្រសួងការពារជាតិកម្ពុជានាថ្ងៃទី១៨ ខែមិថុនា ហើយនឹងមានការចុះពិធីសារស្តីពីការពង្រឹងកិច្ចសហប្រតិបត្តិការយោធាកម្ពុជា-ចិន។
កងទ័ពកម្ពុជាបានបង្កើនសហប្រតិបត្តិការយោធាជាមួយកងទ័ពចិន បន្ទាប់ពីប្រទេសកម្ពុជាបានលុបចោលការធ្វើលំហាត់យោធាសំខាន់ៗមួយចំនួនជាបន្តបន្ទាប់ជាមួយសហរដ្ឋអាមេរិក កាលពីឆ្នាំ២០១៧។
នាពេលកន្លងមក អ្នកជំនាញកិច្ចការអន្តរជាតិយល់ឃើញថា គណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន កំពុងតែព្យាយាមឃ្លាតឆ្ងាយពីមហាអំណាចសហរដ្ឋអាមេរិក និងបង្កើនការពឹងផ្អែកកាន់តែច្រើនឡើងថែមទៀតលើប្រទេសចិន។ ការណ៍នេះបានបញ្ជាក់ឲ្យឃើញថា «ជោគវាសនារបស់កម្ពុជាគឺស្ថិតលើប្រទេសចិន»។
កាលពីខែមិនា កងទ័ពកម្ពុជា និងចិនបានធ្វើលំហាត់ហ្វឹកហ្វឺនរួមមួយឈ្មោះថា «នាគមាស២០១៨»ជាលើកពីរ ដែលអមដោយការប្រើប្រាស់អាវុធយុទ្ធភ័ណ្ឌទំនើបៗ ក្នុងគោលដៅវាយបង្ក្រាបភេរវកម្ម និងការអន្តរាគមន៍ផ្ដល់ជំនួយមនុស្សធម៌ក្នុងគ្រាមានអាសន្នគ្រោះធម្មជាតិនានា។ លំហាត់ហ្វឹកហ្វឺននោះបានធ្វើឡើង ដោយមានរាប់បញ្ចូលការបាញ់គ្រាប់ពិត តូច ធំនានា សរុបប្រមាណ១៨.០០០គ្រាប់ រួមមានការបាញ់គ្រាប់រ៉ុក្កែតពីឧទ្ថម្ភាគចក្រ និងការវាយប្រហារដោយរថពាសដែកថែមទៀតផង។
កាលពីចុងឆ្នាំ២០១៦ សមយុទ្ធយោធារួមគ្នាធំមួយរវាងកម្ពុជា និងចិនត្រូវបានធ្វើឡើងជាលើកដំបូងបង្អស់។ ក្រោយការធ្វើសមយុទ្ធនាពេលនោះ ប្រទេសចិនបានផ្តល់ជំនួយឥតសំណងជាង១៥០លានដុល្លារ សម្រាប់ការសាងសង់ពហុកីឡាដ្ឋានថ្មីមួយស្ថិតលើផ្ទៃដីទំហំ៨៥ហិកតា។
ការបង្កើតចំណងមិត្តភាពរវាងយោធាកម្ពុជា-ចិនធ្វើឡើងមិនប៉ុន្មានខែក្រោយពេលរដ្ឋាភិបាលកម្ពុជាផ្អាកការលំហាត់យោធាមួយចំនួនជាមួយសហរដ្ឋអាមេរិក។ អ្នកវិភាគធ្លាប់និយាយថា គោលជំហរអព្យាក្រឹត្យរបស់កម្ពុជាក្នុងទំនាក់ទំនងការបរទេសនឹងនាំឲ្យមានចម្ងល់ ប្រសិនបើប្រទេសនេះពឹងផ្អែកជ្រុលលើប្រទេសចិនតែមួយនោះ៕
