ហុងកុង៖ ក្រុមហ៊ុនចិនសម្បូរប្រាក់ កំពុងតែស្វែងរកទីផ្សារ និងជំនាញបច្ចេកទេសថ្មីៗសម្រាប់ពាណិជ្ជកម្មរបស់ខ្លួន។ ការស្ទាបស្ទង់មតិថ្មីមួយទៅលើក្រុមហ៊ុនចិន បង្ហាញថា ក្រុមហ៊ុនចិនជាច្រើនមានផែនការទិញយកទ្រព្យសម្បត្តិនៅបរទេសនៅក្នុងរយៈពេលបីឆ្នាំខាងមុខនេះ។
ធនាគារគ្រប់គ្រងដោយរដ្ឋធំជាងគេបង្អស់មួយរបស់ចិន គឺធនាគារឧស្សាហកម្ម និងពាណិជ្ជកម្មចិន នាពេលថ្មីៗនេះ បានប្រកាសថា ខ្លួនទិញបានក្រុមហ៊ុនមូលធនប័ត្ររបស់សហរដ្ឋអាមេរិកក្នុងតម្លៃមួយដុល្លារ។ ការលក់ Prime Dealer Services ដែលជាសាខាតូចមួយរបស់ក្រុមហ៊ុនមូលធនប័ត្រ Fortis Securities តម្រូវឲ្យធនាគារឧស្សាកម្ម និងពាណិជ្ជកម្មចិន ICBC ទទួលខុសត្រូវបំណុលទាំងអស់របស់ក្រុមហ៊ុននេះ។ ធនាគារ ICBC ឲ្យដឹងថា ខ្លួនកំពុងស្វែងរកទិញទ្រព្យសម្បត្តិនៅក្នុងតំបន់អាស៊ីអាគ្នេយ៍។
កាលពីខែមុន សាជីវកម្មប្រេងក្នុងសមុទ្ររបស់ចិន ដែលគ្រប់គ្រងដោយរដ្ឋ បានទិញយក១ភាគ៣នៃតំបន់ឧស្ម័នធម្មជាតិនៅក្នុងរដ្ឋតិចសាស។ នេះគ្រាន់តែជាចំនួនកើនឡើងបន្តិចបន្តួចនៃការទិញយកទ្រព្យសម្បត្តិនៅទូទាំងពិភពលោករបស់ចិន។ កាលពីឆ្នាំទៅ ក្រុមហ៊ុនចិនបានបោះទុនវិនិយោគចំនូន៤៣ពាន់លានដុល្លារអាមេរិក លើការច្របាច់បញ្ចូលក្រុមហ៊ុន និងទិញយកក្រុមហ៊ុនបរទេស។
លោក ចឺរ៉ឺមី ហ្វ៊ានលី (Jeremy Fearnley) ប្រធានផ្នែកការច្របាច់បញ្ចូល និងទិញនៅក្រុមហ៊ុនផ្តល់ប្រឹក្សាមួយ ហៅកាត់ជាភាសាអង់គ្លេសថា KPMG ដែលមានមូលដ្ឋាននៅក្នុងទីក្រុងហុងកុង មានប្រសាសន៍ថា ក្រុមហ៊ុនចិន ទាំងក្រុមហ៊ុនដែលគ្រប់គ្រងដោយរដ្ឋ និងក្រុមហ៊ុនឯកជន កំពុងស្វែងរកការទិញយកទ្រព្យសម្បត្តិនៅបរទេស។
ក្រុមហ៊ុន KPMG បានធ្វើការស្ទាបស្ទង់មតិ នាយកប្រតិបត្តិក្រុមហ៊ុនចិនជាង១៥០ ស្តីអំពីមានផែនការវិនិយោគបរទេសរបស់គេក្នុងកំឡុងពេលបីឆ្នាំខាងមុខ។ លោក ហ្វ៊ានលីថ្លែងថា៖
«៨៥ភាគរយនៃអ្នកដែលយើងបានជួបសម្ភាស កំពុងស្វែងរកឱកាសច្របាច់បញ្ចូល និងទិញយកក្រុមហ៊ុនបរទេស។ គេពិតជាមានផែនការនេះនៅក្នុងរបៀបវារៈរបស់ពួកគេ»។
ក្រុមហ៊ុនភាគច្រើន ដែលត្រូវបានធ្វើការស្ទាបស្ទង់មតិ ហើយដែលមានចំណូលតិចជាង១៥០លានដុល្លារ ឲ្យដឹងថា គេកំពុងសម្លឹងមើលការវិនិយោគនៅក្នុងទ្វីបអាស៊ី ខណៈដែលប្រហែលពាក់កណ្តាលនៃអ្នកដែលត្រូវបានធ្វើការស្ទាបស្ទង់មតិនេះ និងដែលមានប្រាក់ចំណូលច្រើនជាងនេះ មានផែនការទិញយកទ្រព្យសម្បត្តិនៅក្នុងទ្វីបអាមេរិកខាងជើង អឺរ៉ុប និងអាស៊ីផងដែរ។ លោក ហ្វ៊ានលី បន្តថា៖
«យើងមើលឃើញថា មនុស្សកំពុងសម្លឹងមើលទៅអាមេរិក និងអឺរ៉ុប។ ពួកគេពិតជាចង់ទិញយកបច្ចេកវិជ្ជាព័ត៌មាន ម៉ាកយីហោ និងបច្ចេកវិជ្ជា ដែលជាទ្រព្យសម្បត្តិ ដែលពួកគេអាចប្រើប្រាស់ដើម្បីបង្កើនពាណិជ្ជកម្មរបស់គេទៅមួយកម្រិតទៀត។ ឥឡូវនេះ ប្រហែលជាត្រូវនាំចេញបន្ថែមទៀតទៅកាន់ទីផ្សាបរទេស។ ជម្រើសមួយផ្សេងទៀតគឺថា គេអាចលក់ផលិតផលទាំងនោះបានកាន់តែច្រើន ដោយប្រើផ្លាកយីហោអន្តរជាតិល្បីៗ ឬប្រើបច្ចេកវិជ្ជាខ្ពស់ ដើម្បីផ្តល់ជាប្រយោជន៍ដល់ទីផ្សារក្នុងស្រុក ឬដល់ប្រទេសចិន»។
ឧទាហរណ៍ ក្រុមហ៊ុនផលិតរថយន្តរបស់ចិន Geely បានបញ្ចប់ការទិញយកភាគហ៊ុនរបស់ក្រុមហ៊ុន Ford Motors នៅក្នុងក្រុមហ៊ុនផលិតរថយន្តរបស់ស៊ុយអែដ ឈ្មោះ Volvo នៅក្នុងខែសីហានេះ។ ក្រុមហ៊ុន Volvo មានផែនការបើករោងចក្រថ្មីៗនៅក្នុងប្រទេសចិន ហើយលក់ឡានដែលផលិតនៅប្រទេសចិន ក្នុងទ្វីបអឺរ៉ុប។
ក្រុមហ៊ុនចិនក៏បានវិនិយោគយ៉ាងច្រើននៅទ្វីបអាហ្រ្វិក និងអាមេរិកឡាទិនដែរ ជាពិសេសលើការរុករករ៉ែ ប្រេង និងឧស័្មន ដែលជាផ្នែកមួយនៃយុទ្ធសាស្រ្តរបស់ប្រទេសនេះ ក្នុងការធានាឲ្យបាននូវការផ្គត់ផ្គង់វត្ថុធាតុដើម សម្រាប់សេដ្ឋកិច្ច ដែលកំពុងតែកើនឡើងយ៉ាងលឿនរបស់ខ្លួន។
ទោះជាយ៉ាងនេះក្តី កាលពីអតីតកាល ការវិនិយោគរបស់ចិននៅក្នុងឧស្សាហកម្មជាយុទ្ធសាស្រ្តរបស់សហរដ្ឋអាមេរិក ទទួលបរាជ័យដោយសារតែកង្វល់ផ្នែកសន្តិសុខ។ នៅក្នុងឆ្នាំ២០០៥ ក្រុមហ៊ុនប្រេងរបស់ចិន CNOOC ដែលជាក្រុមហ៊ុនតែមួយ ដែលបានទិញយកតំបន់ឧស័្មននៅក្នុងរដ្ឋតិចសាស ទិញយកក្រុមហ៊ុនប្រេងរបស់អាមេរិក Unocal មិនបាន។ ក្រុមហ៊ុនAnshan Iron and Steel ដែលចូលហ៊ុនជាមួយក្រុមហ៊ុន Steel Development Co. ដើម្បីកសាងរោងចក្រផលិតដែកបន្ទះនៅក្នុងរដ្ឋម៉ីស៊ីស៊ីពី បានប្រឈមទៅនឹងការជំទាស់ពីអ្នកតាក់តែងច្បាប់របស់អាមេរិកមួយចំនួន។
ការស្ទាបស្ទង់មតិរបស់ក្រុមហ៊ុន KPMG បង្ហាញថា ភាពគ្មានបទពិសោធន៍ក្នុងការធ្វើទំនាក់ទំនង ភាពខុសគ្នាផ្នែកវប្បធម៌ ភាពគ្មានបទពិសោធន៍ក្នុងដំណើរការនៃការធ្វើសេចក្តីសម្រេចចិត្តរបស់ក្រុមហ៊ុនចិន ជួនកាលអាចធ្វើឲ្យរាំងស្ទះដល់លទ្ធភាពរបស់ពួកគេក្នុងការសម្រេចការរកស៊ី។ ភាគច្រើន ចង់បានការគ្រប់គ្រងរបស់ចិនលើក្រុមហ៊ុនគោលដៅ ទោះបីជាអ្នកផ្សេងទៀតមានភាពប្រាកដនិយមជាង នៅពេលប្រឈមមុខទៅនឹងការដាក់កំហិតទៅលើភាពជាម្ចាស់កម្មសិទ្ធិក៏ដោយ។
នៅសប្តាហ៍នេះ លោក ចិន ជាន (Chen Jian) អនុរដ្ឋមន្រ្តីពាណិជ្ជកម្មរបស់ចិន បានជំរុញអាមេរិកឲ្យបើកឲ្យមានការវិនិយោគរបស់ចិនថែមទៀត។ ក្រសួងនេះឲ្យថា វិនិយោគរបស់ចិននៅអាមេរិក នៅក្នុងរយៈពេល៩ខែដំបូងនៃឆ្នាំនេះ បានកើនឡើងដល់ទៅ៥៣០ភាគរយ បើប្រៀបធៀបទៅនឹងឆ្នាំទៅ៕
ប្រែសម្រួលដោយ ឌី ខាំបូលី
