ភ្ជាប់​ទៅ​គេហទំព័រ​ទាក់ទង

សភា​ចិន​ផ្តោត​លើ​ការ​កែ​លម្អ​ជីវភាព​ជន​ក្រីក្រ


ស្ត្រី​ចិន​ចំណាស់​ម្នាក់​ពិនិត្យ​បញ្ជី​តម្លៃ​ម្ហូប​អាហារដែល​គាត់​បាន​ទិញ​ពី​ហាង​លក់​ទំនិញ​មួយ​នៅ​ក្នុង​ទី​ក្រុង​ប៉េកាំង កាល​ពី​ថ្ងៃ​ទី​២៧​ខែ​កុម្ភៈ​​ ឆ្នាំ ២០១១។

ប្រតិភូ​ប្រមាណ​បី​ពាន់​នាក់​មក​ពី​ទូទាំង​ប្រទេស​ចិន​កំពុង​ឋិត​ក្នុង​ក្រុង​ប៉េកាំង​ដើម្បី​ចូលរួម​ក្នុង​សមាជ​ជាតិ​របស់​ប្រជាជន​ប្រចាំ​ឆ្នាំ​នៃ​ប្រទេស​ចិន។ គេ​រំពឹង​ថា អាទិភាព​មួយ​ក្នុង​បណ្តា​អាទិភាព​ជាន់ខ្ពស់​របស់​ពួក​ប្រតិភូ​ទាំងនេះ​គឺ​ការកែលម្អ​ជីវភាព​ក្រុម​ជន​ក្រីក្រ​ដែល​ជា​ផ្នែក​មួយ​នៃ​កិច្ច​ខិតខំ​ប្រឹងប្រែង​ដើម្បី​បញ្ចៀស​កុំ​ឱ្យ​មាន​ចលាចល។

នៅ​ពេល​ដែល​ប្រទេស​ចិន​ប្រុងប្រៀប​បើក​ការប្រជុំ​សមាជ​ជាតិ​របស់​ប្រជាជន​នៅ​ថ្ងៃ​សៅរ៍​ រដ្ឋាភិបាល​បាន​និយាយ​ថា​ការ​ថែរក្សា​ឱ្យ​មាន​ស្ថិរភាព​សង្គម​ជា​កង្វល់​ខ្លាំង​បំផុត​របស់​ពួកគេ។

នៅ​ក្នុង​ការ​សំណេះ​សំណាល​គ្នា​កាល​ពី​ពេលថ្មីៗ​នេះ​តាម​បណ្តាញ​ Internet​ ជាមួយ​ប្រជាជន​ចិន​ លោក​នាយករដ្ឋមន្ត្រី​ Wen​ Jiabao​ បាន​មាន​ប្រសាសន៍ថា ​វិធី​មួយ​ដែល​រដ្ឋាភិបាល​សង្ឃឹម​ថា​នឹង​បញ្ចៀស​កុំ​ឱ្យ​មាន​បញ្ហា​សង្គម​ គឺ​ជួយ​ក្រុម​អ្នក​ក្រីក្រ។

លោក​ Wen​ មាន​ប្រសាសន៍​ថា​បញ្ហា​នៃ​ការ​បង្កើន​កម្រឹត​ជីវភាព​របស់​ប្រជាជននឹង​ទៅ​ជា​ចំណុចចាប់ផ្តើម​នៃ​បទបញ្ជា​ទាំងអស់​ក្នុង​ផែនការ​ប្រាំ​ឆ្នាំ​ថ្មី​របស់ប្រទេស​ពី​ឆ្នាំ​២០១១​ដល់​ឆ្នាំ​២០១៥។

នៅ​ក្នុង​ឱកាស​សម័យ​ប្រជុំ​សភា​មួយ​សប្តាហ៍​ក្នុង​ឆ្នាំ​នេះ​ អង្គការ​នីតិប្បញ្ញត្តិ​នឹង​ផ្តល់​ការ​យល់ព្រម​ចុងក្រោយ​បង្អស់​ដល់​ផែនការ​នេះ។​ ផែនការ​នេះ​កំណត់​គោលដៅ​នៃ​គណបក្ស​កុម្មុយនិស្ត​គ្រប់គ្រង​ប្រទេស​សម្រាប់​ប្រទេសជាតិ​ ហើយ​ផែនការ​នេះ​បាន​ទទួល​ការ​យល់ព្រម​រួចស្រេច​ហើយ​នៅ​ក្នុង​ការ​ប្រជុំ​មួយ​របស់​ពួក​មេដឹកនាំ​គណបក្ស​កាល​ពី​ឆ្នាំ​ទៅ​មិញ។

រដ្ឋាភិបាល​បាន​និយាយ​កាល​ពី​ឆ្នាំ​២០០៩​ថា​ ប្រជាជន​ចិន​ជិត​៣៦​លាន​នាក់​រស់នៅ​ក្រោម​ខ្សែបន្ទាត់​នៃ​ភាព​ក្រីក្រ​ដែល​មាន​ទឹកប្រាក់​ប្រមាណ​១៨០​ដុល្លារ​ក្នុងមនុស្ស​ម្នាក់​សម្រាប់​ពេល​មួ​យ​ឆ្នាំ​ ឬ​ប្រមាណ​៤៩​សេន​ក្នង​មួយ​ថ្ងៃ។​ ទឹកប្រាក់​នេះ​ស្មើ​នឹង​មួយភាគបី​នៃ​ទឹកប្រាក់​ដែល​ធនាគារ​ពិភពលោក​ប្រើប្រាស់​សម្រាប់​ខ្សែ​បន្ទាត់​នៃ​ភាព​ក្រីក្រ​របស់​គេ​ដែល​អាច​កំណត់​ថា​ជនជាតិ​ចិន​១៥០​លាន​នាក់​ក្រីក្រ​ខ្លាំង​ណាស់។

លោក​នាយករដ្ឋមន្ត្រី​ចិន​បាន​ផ្តល់​សញ្ញា​ថា​រដ្ឋាភិបាល​ក៏​គ្រោង​នឹង​ដោះស្រាយបញ្ហា​នយោបាយ​ពីរ​ដែល​អាច​នាំ​ឱ្យ​មាន​ស្ថានភាព​ធ្ងន់ធ្ងរ​បាន​គឺ​អំពើ​ពុករលួយនិង​អតិផរណា។

លោក​ Wen ​មាន​ប្រសាសន៍​ថា​ដោយសារ​អតិផរណា​មាន​ផលប៉ះពាល់​លើ​ជីវភាព​របស់​ប្រជាជន​ហើយ​អាច​មាន​ផល​ប៉ះពាល់​លើ​ស្ថិរភាព​សង្គម​ផង​ដែររដ្ឋាភិបាល​ចិន​ចាត់​ទុក​ការថែរក្សា​ស្ថិរភាព​តម្លៃ​ទំនិញ​ថា​ជា ​“បញ្ហា​ធំ” ​មួយ។

អតិផរណា​កាល​ពី​ខែ​មករា​មាន​៤,៩​ភាគរយ​ ក៏ប៉ុន្តែ​ម្ហូបអាហារ​បាន​ទ្បើង​ថ្លៃ​ជាង១០​ភាគរយ។

លោក​សាស្ត្រាចារ្យ​ Huang​ Jing ​ផ្នែក​គោល​នយោបាយ​សាធារណៈ​នៅ​ឯ​សាកល​វិទ្យាល័យ​ប្រទេស​សិង្ហបូរី​ មាន​ប្រសាសន៍​ថា​លោក​យល់​ថា​ការបង្ក្រាបអំពើ​ពុករលួយ​គួរ​តែ​ជា​អាទិភាព​មួយ​ក្នុង​បណ្តា​អាទិភាព​កំពូល​របស់​រដ្ឋាភិបាល។

ប្រែ​សម្រួល​ដោយ​ឈឹម​សុមេធ

XS
SM
MD
LG