ប៉េកាំង៖ កាលពីខែវិច្ឆិកា ឆ្នាំ២០០៧ អាជ្ញាធរចិនបានឃុំឃាំងលោកស្ស៊ូ ហ្វេង (Xue Feng) ដែលមានអាយុ៤៤ឆ្នាំ ពីបទប៉ុនប៉ងទិញទិន្នន័យព័ត៌មានស្តីអំពីឧស្សាហកម្មប្រេងឥន្ធនៈរបស់ប្រទេសចិន។
លោកស្ស៊ូ ជាសញ្ជាតិអាមេរិក។ កាលពីពេលនោះ លោកធ្វើការនៅក្រុមហ៊ុនប្រឹក្សាវិស្វកម្ម និងថាមពលអាមេរិកាំង(IHS)។ ទិន្នន័យព័ត៌មានត្រូវបានចាត់ថ្នាក់ថា ជាកិច្ចការសម្ងាត់របស់រដ្ឋក្រោយពីលោកស្ស៊ូបានទិញវា។
តុលាការក្រុងប៉េកាំងបានសម្រេចថា លោកមានកំហុសចំនួនមួយឆ្នាំកន្លងមកហើយ ប៉ុន្តែការកាត់ទោសចេះតែត្រូវបានពន្យា។
កាលពីថ្ងៃច័ន្ទ លោកស្ស៊ូ ត្រូវបានកាត់ទោសឲ្យជាប់ពន្ធនាគារចំនួន៨ឆ្នាំ។ ជនជាតិចិនបីរូបផ្សេងទៀតដែលត្រូវបានរកឃើញថាមានទោសជាមួយនឹងគាត់ ក៏ត្រូវបានកាត់ទោសឲ្យជាប់ពន្ធនាគារដែរ ។ ម្នាក់ជាប់ពន្ធនាគារចំនួន៨ឆ្នាំ និងពីរនាក់ទៀតចំនួនពីរឆ្នាំកន្លះ។
លោករីឆាត បួនហ្គែន(Richard Buangan) អ្នកនាំពាក្យស្ថានទូតអាមេរិក មានប្រសាសន៍ថា រដ្ឋាភិបាលសហរដ្ឋអាមេរិកមានការព្រួយបារម្ភជាខ្លាំង។ លោកបន្តថា៖
«ស្ថានទូតស្រងាកចិត្តចំពោះការកាត់ទោសបណ្ឌិតស្ស៊ូ ហើយយើងមានការព្រួយបារម្ភអំពីសិទ្ធិរបស់លោកចំពោះដំណើរការកាត់ទោសនៅក្រោមច្បាប់នៃប្រទេសចិន»។
អ្នកជំនាញច្បាប់មួយចំនួនដែលផ្តល់ប្រឹក្សាដល់គ្រួសារលោកស្ស៊ូឲ្យដឹងថា ក្រោយពីលោកត្រូវបានឃុំខ្លួន ភ្នាក់ងារសន្តិសុខរដ្ឋបានធ្វើទារុណកម្មលោក ដោយរួមទាំងអុចលោកនឹងបារីផងដែរ។
លោកបួនហ្គែន មានប្រសាសន៍ថា ចាប់តាំងពីលោកត្រូវបានឃុំខ្លួនអស់រយៈពេលបីឆ្នាំមក មន្រ្តីសហរដ្ឋអាមេរិកបានទៅសួរសុខទុកលោកចំនួន៣០ដង ដើម្បីពិនិត្យមើលសុខមាលភាពរបស់លោក។ លោកបួនហ្គែន ឲ្យដឹងទៀតថា ឯកអគ្គរដ្ឋទូត ចន ហាន់ស្ម៊ែន (Jon Hunsman) មានការចាប់អារម្មណ៍យ៉ាងខ្លាំងចំពោះរឿងក្តីនេះ ហើយបានអញ្ជើញទៅបន្ទប់តុលាការកាលពីការកាត់ទោសនៅថ្ងៃច័ន្ទ។ លោកបួនហ្គែន ថ្លែងថា៖
«លោកឯកអគ្គរដ្ឋទូតហាន់ស្ម៊ែន មានប្រសាសន៍កាលពីដើមខែនេះថា លោកបានទៅសួរសុខទុកលោក ស្ស៊ូ ហ្វ៊ែង ជាច្រើនលើក ក្នុងរយៈពេលកន្លះឆ្នាំកន្លងមកនេះ។ បណ្ឌិតស្ស៊ូ មានភាពរឹងមាំក្នុងពេលដ៏លំបាករបស់លោក ហើយលោកឯកអគ្គរដ្ឋទូត បានមានប្រសាសន៍ទៅកាន់រូបលោក និងគ្រួសាររបស់លោក ដែលលោកសង្ឃឹមថា នឹងបានរួមរស់ជួបជុំគ្នាវិញក្នុងពេលឆាប់ៗ»។
មន្រ្តីចិនមួយចំនួន មានអំណាចដ៏ទូលំទូលាយក្នុងការកំណត់កិច្ចការសម្ងាត់របស់រដ្ឋ ដែលជាហេតុធ្វើឲ្យមានការលំបាកដល់ជនបរទេស ក៏ដូចជាប្រជាពលរដ្ឋចិន ដើម្បីដឹងថាតើពេលណាពួកគេឆ្លងចូលទៅកិច្ចការសម្ងាត់។ កិច្ចការសម្ងាត់ជារឿយៗរួមទាំងទិន្នន័យពាណិជ្ជកម្ម និងសេដ្ឋកិច្ច ដែលត្រូវបានចាត់ទុកថា ជាព័ត៌មានសាធារណៈនៅក្នុងប្រទេសភាគច្រើន ហើយជូនកាលព័ត៌មានក៏អាចត្រូវបានប្រកាសថា ជាកិច្ចការសម្ងាត់ដែរ សូម្បីតែព័ត៌មាននោះត្រូវបានបោះពុម្ពផ្សាយជាសាធារណៈហើយក៏ដោយ។
ច្បាប់ស្តីអំពីកិច្ចការសម្ងាត់រដ្ឋប្រកបដោយភាពស្រពិចស្រពិលដ៏ល្បីល្បាញជាច្រើន បានទទូលការយកចិត្តទុកដាក់ពីមជ្ឈដ្ឋានអន្តរជាតិកាលពីឆ្នាំកន្លងទៅ នៅពេលដែលនិយោជិកបួននាក់នៃក្រុមហ៊ុនរ៉ែដ៏ធំរបស់អូស្ត្រាលី ឈ្មោះ រីអូ ទីនតូ (Rio Tinto) ត្រូវបានឃុំខ្លួន ពីបទលួចកិច្ចការសម្ងាត់របស់រដ្ឋក្នុងអំឡុងពេលដំណើរការនៃចរចារតឹងតែងមួយចំនួនស្តីអំពីរ៉ែដែក។
ប្រែសម្រួលដោយលោកអ៊ឹម សុធារិទ្ធ
