ភ្ជាប់​ទៅ​គេហទំព័រ​ទាក់ទង

ចិន​សុំ​ឲ្យ​មាន​ការ​រួបរួម​ជាតិ​ពេល​ពិធី​បុណ្យ​ខួប​ឆ្នាំ​ទី​១០០​នៃ​ការ​រលំ​​របប​រាជាធិរាជ


យុទ្ធជន​ពិធីការ​ដើរ​ក្បួន​ពេល​ទិវា​​បុណ្យជាតិ​កោះ​តៃវ៉ាន់​នៅ​មុខ​ការិយាល័យ​ប្រធានាធិបតី​នៅ​ទីក្រុង​តៃប៉ិ​នៅ​ថ្ងៃ​ទី​១០​ខែ​តុលា​ឆ្នាំ​២០១១។

ថ្ងៃ​ច័ន្ទ​ទី​១០​ខែ​តុលា​ជា​ថ្ងៃ​ខួប​ឆ្នាំ​ទី​១០០ នៃ​ការ​ចាប់​ផ្ដើម​ការ​បះបោរ​មួយ​បណ្ដាល​ឲ្យ​បញ្ចប់​របប​រាជាធិរាជ​នៅ​ក្នុង​ប្រទេស​ចិន។​ ប្រធានាធិបតី​ ហ៊ូ ជិនតាវ​ បានឆ្លៀត​ឱកាស​នេះ​ដើម្បី​អំពាវនាវ​ឲ្យ​មាន​ការ​រួបរួមជាតិ​តែ​មួយ​ ជា​មួយ ​តៃវ៉ាន់​ ដែល​ជា​កោះ​មូយ​គ្រប់គ្រង​ដោយ​អ្នកជាតិនិយម​ចិន​ជាង​ ប្រាំមួយ​ទសវត្សរ៍​មក​ហើយ។

នៅ​ថ្ងៃ​ច័ន្ទ ​បណ្ដាញ​ព័ត៌មាន​ចិន​ ភាគ​ច្រើន​ បាន​សរសេរ​អំពីសេចក្ដី​អំពាវនាវ​របស់​ប្រធានាធិបតី​ ហ៊ូ​ជិនតាវ​ ដែល​ស្នើ​ឲ្យ​ប្រទេស​ជាតិ​មាន​សម្រស់​ថ្មី​ និង​ក្មេង​ ឡើង​វិញ ​១០០​ឆ្នាំ​ក្រោយ​ពី​ការ​បដិវត្ដន៍ ​ស៊ិនហៃ​ បាន​ បញ្ចប់​របប​គ្រប់គ្រង​សន្ដតិវង្ស​ ជាង​ ពីរ​ពាន់​ឆ្នាំ​ នៅ​ក្នុង​ប្រទេស​ចិន។

លោក​ប្រធានាធិបតី​ ហ៊ូ ជិនតាវ​ បាន​អំពាវនាវ​ដល់​កុលបុត្រ​កុលធីតា​របស់​ប្រទេស​ ចិន​ ឲ្យ​ពួតដៃ​គ្នា​ដើម្បី​ធ្វើ​ឲ្យ​សម្រេច​នូវ​កិច្ចការ​ ​និង​ ​គោល​ឧត្ដមគតិ ​របស់​ប្រធានាធិបតី​ សាធារណរដ្ឋ​ចិនទី១​គឺ​លោក​ ស៊ុន យ៉ាត់សេន​ ចំពោះ​អ្វី​ដែល​លោក​ពិព័ណ៌នា​ថា​ « ការ​ធ្វើ​ឲ្យ​ប្រទេស​ជាតិ​មាន​សម្រស់ក្មេង​ឡើ​ង​វិញ»។

គេចាត់​ទុក​លោក​ ស៊ុនយ៉ាត សេន​ ថា​ជា​បិតា​ស្ថាបនា​ប្រទេស​ចិន​ទំនើប​ ហើយ​បាន​ទទួល​ការគោរព​ជ្រាលជ្រៅ​ដោយ​ពលរដ្ឋ​តៃវ៉ាន់​ និង​ ពលរដ្ឋ​ចិន​ នៃ​ប្រទេស​ចិន​ដី​គោក។ ​លោក​ ស៊ុនយ៉ាត​ សេន​ បាន​ទទួល​មរណភាព​ទៅ​ហើយ​ ក្រោយ​ពី​ក្រុម​ចិន​អ្នក​ជាតិនិយម ​បាន​ចាញ់​សង្រ្គាម​ជា​មួយ​ក្រុមកុម្មុយនិស្ដ​ចិន​ នៅ​ឆ្នាំ​ ១៩៤៩ ​រួច ​ក៏​បាន​រត់គេច​វេះទៅ​កាន់​ដែន​ដី​តៃវ៉ាន់។

នៅ​ក្នុង​សុន្ទរកថា​របស់​លោក​ កាល​ពី​ថ្ងៃ​អាទិត្យ​ លោក​ ហ៊ូ ​ជិនតាវបាន​ថ្លែង​សង្កត់ទៅ​លើ​ប្រវត្ដិសាស្រ្ដ​រួម​ជា​មួយ​គ្នា​ដោយ​លោក​ចង្អុល​ថា​ប្រជាពលរដ្ឋ​នៃ​ដែនដី​ទាំង​ពីរ​ស្ថិត​នៅ​ចន្លោះ​ឆកសមុទ្រ​តៃវ៉ាន់​ជា​ពលរដ្ឋ​មាន​ឈាម​រួម។

«លោក​ហ៊ូជិនតាវ​ថ្លែង​ថា​នៅ​ពេល​នេះ​តៃវ៉ាន់​ និង​ចិន​ដីគោក​បាន​ជួប​ប្រទះ​នឹង​វិបុលភាព​ និង​ការ​អភិវឌ្ឍន៍។​ លោក​អំពាវនាវ​ឲ្យ​មាន​ការ​រួបរួម​ជាតិ​តែ​មួយ​ដោយ​សន្ដិវិធី ​ហើយ​ភាគី​ទាំង​ពីរ​គួរ​ផ្ដោត​ទៅ​លើ​គោលដៅ​តែ​មូយ ​គឺ​ការ​អភិវឌ្ឍន៍​ដ​ល់​ជន​ជាតិចិន»។

អតីត​ប្រធានាធិបតី​ចិន​ លោក​ ជាង​ ហ្សេមិន​បាន​ទៅ​បង្ហាញ​ខ្លួននៅ​មុខ​សាធារណជន​ក្នុង​ពិធី​បុណ្យ​ខួប​កាល​ពី​ថ្ងៃ​អាទិត្យ។

ទូរទស្សន៍​រដ្ឋ​ បង្ហាញ​រូបភាព​ជនជរាទន់ខ្សោយ​ អាយុ ​៨៥​ ឆ្នាំ​ ច្រៀងបទ​ភ្លេង​ជាតិ​ ជា​មួយក្រុម​មេ​ដឹកនាំ​ចិន​ដទៃទៀត។ មន្ដ្រី​ចិន​ ជា​រឿយៗ​ បាន​បដិសេធ​ពាក្យ​ចចាមអារាម​ អំពី​សុខភាព​ដុនដាប របស់​លោក​ ជាងហ្សេមិន​ កាល​ពី​ប៉ុន្មាន​ខែ​កន្លង​ទៅ​នេះ។

នៅ​ទី​ក្រុង​តាយប៉ិ​ លោក​ប្រធានាធិបតី​តៃវ៉ាន់​ លោក​ ម៉ា យីង ជីវ​ ក៏​បាន​លើក​ដំកើង​លោក​ ស៊ុន យ៉ាតសេន​ដែរ​ ក្នុង​ពិធីប្រារព្ធ​បុណ្យ​ខួប​១០០​ ឆ្នាំ​នោះ ​តែ​លោក​បាន​ថ្លែង​សង្កត់​ទៅ​លើសារៈសំខាន់ ​មួយ​ដែល​ខុស​ពី​ទស្សនៈ​របស់​សមភាគី​របស់​លោក​ នៃ​ចិន​ដី​គោក។

«លោក​ ម៉ា​ យីងជូ​ អំពាវនាវអាជ្ញាធរ​ចិនដី​គោក​ឲ្យ​នឹក​ឃើញអំពី​គោល​ឧត្ដមគតិ​ របស់​បិតា​ស្ថាបនា​ប្រទេស​ចិន​ លោក​ ស៊ុន យ៉ាត​សេន​ ថា​ជា​ប្រទេស​ដែល​មាន​សេរីភាព​ ប្រជាធិបតេយ្យ​ និង​ សម្បត្ដិ​ទ្រព្យ​ចែក​គ្នា​ស្មើ។​ លោក​អំពាវនាវ​ដល់​ក្រុម​មេ​ដឹកនាំ​ចិន ​តាម​ពាក្យ​ផ្ទាល់​របស់​លោក​ថា ​« សុំ​ឲ្យ​ដើរ​យ៉ាង​ក្លាហាន​ឆ្ពោះ​ទៅ​រក​មាគ៌ា​នេះ»។

សុន្ទរកថា​របស់​លោក​ធ្វើ​ឡើង​ ​បន្ទាប់​ពីមាន​ការ​បង្ហាញ​កម្លាំង​យោធា​អស់​រយៈ​ពេល​មួយ​ម៉ោង​ដោយ​មាន​យន្ដ​ហោះ​ចម្បាំង​ហោះ​ហើរ​លើ​មេឃ​ មាន ​រថក្រោះ​ និង​កំាជ្រួច​មីស៊ីល។

ចិន​ដីគោកនៅ​តែ​បន្ដ​ទាមទារ​ថា​ តៃវ៉ាន់​ជា​ផ្នែក​មូយ​នៃ​ដែនដី​របស់ខ្លួន។

ភាគី​ទាំង​ពីរ​បាន​ធ្វើ​ឲ្យ​ធូរស្រាល​ដល់ស្ថានការ​ណ៍​អរិភាព​ កាល​ពី​ប៉ុន្មាន​ឆ្នាំ​ថ្មី​ៗ​នេះ​ តែ​ចិន​ដីគោក​មិន​បាន​ទម្លាក់​ចោល​លទ្ធភាព​នៃ​ការ​ប្រើ​កម្លំាង​ទ័ព​ ដើម្បី​រារាំង​មិន​ឲ្យតៃវ៉ាន់​គ្រប់គ្រង​ដោយ​រដ្ឋាភិបាល​ផ្ទាល់​របស់​ខ្លួន​ អាច​ប្រកាស​ឯករាជ្យបាន។

ប្រែសម្រួលដោយ​ អ៊ូ​ ធួក

XS
SM
MD
LG