ប្រទេសចិនបានធ្វើការសរសើររដ្ឋាភិបាលថ្មីរបស់ប្រទេសភូមាថាបានលើកតម្កើងលទ្ធិប្រជាធិបតេយ្យ។ ចិនបានរិះគន់ប្រទេសផ្សេងទៀតដែលបានរិះគន់ចំពោះរដ្ឋាភិបាលថ្មីរបស់ប្រទេសជិតខាងនិងជិតស្និទ្ធមួយនេះ។ រដ្ឋាភិបាលថ្មីរបស់ភូមាបានស្បថចូលកាន់អំណាចនៅសប្តាហ៍មុននេះ។
ក្នុងពេលផ្តល់សេចក្តីអបអរសាទររបស់ប្រទេសចិនជូនចំពោះរដ្ឋាភិបាលថ្មីរបស់ភូមាដែលបានចូលកាន់អំណាចកាលពីថ្ងៃពុធ អ្នកនាំពាក្យក្រសួងការបរទេសចិន Jiang Yu បានធ្វើការព្រមានភ្លាមៗផងដែរដល់ប្រទេសដទៃកុំឲ្យលូកដៃកិច្ចការផ្ទៃក្នុងរបស់ប្រទេសជិតខាងរបស់ខ្លួនមួយនេះ។
Jiang និយាយថារដ្ឋាភិបាលក្រុងប៉េកាំងមិនយល់ស្របនឹងប្រទេសដទៃទាំងនោះដែលអះអាងថា សភាថ្មីដែលដឹកនាំដោយក្រុមស៊ីវិល ជារដ្ឋាភិបាលយោធាចាស់ដដែល ដែលគ្រាន់តែមានទម្រង់ថ្មី។
អ្នកស្រីបានសរសើររដ្ឋាភិបាលថ្មីនេះចំពោះសកម្មភាពដែលអ្នកស្រីហៅថាជាការលើកតម្កើងលទ្ធិប្រជាធិបតេយ្យ។
សហរដ្ឋអាមេរិកស្ថិតនៅក្នុងចំណោមប្រទេសដែលបានហៅការផ្ទេរអំណាចនៅក្នុងប្រទេសភូមាថាគ្រាន់តែជាការក្លែងបន្លំ។ មន្ត្រីអាមេរិកបាននិយាយកាលពីថ្ងៃពុធថា ពួកគេនឹងបន្តជំរុញឲ្យមាននូវអ្វីដែលពួកគេពិពណ៌នាថាជាកំណែទម្រង់ពិតប្រាកដនោះ។
សហរដ្ឋអាមេរិកនិងអ្នករិះគន់ដទៃទៀតអះអាងថា ឧត្តមសេនីយ៍កំពុងកាន់តំណែងនិងឧត្តមសេនីយ៍ចូលនិវត្តន៍ពីរដ្ឋាភិបាលចាស់ រួមទាំងអ្នករដ្ឋបាលបច្ចេកទេសផង កំពុងក្តាប់អំណាចយ៉ាងខ្លាំង។ ប្រធានាធិបតីថ្មីគឺលោក Thein Sein ជាអតីតឧត្តមសេនីយ៍ដែលបានលះបង់ឯកសណ្ឋានយោធាកាលពីឆ្នាំមុន ដើម្បីទៅរៀបចំការបោះឆ្នោតដែលត្រូវគេរិះគន់យ៉ាងខ្លាំង។
ប្រទេសចិនមានចំណងទាក់ទងជិតស្និទ្ធផ្នែកនយោបាយ យោធា និង សេដ្ឋកិច្ចជាមួយប្រទេសភូមា ហើយជាយូរមកហើយធ្លាប់បានការពារសម្ព័ន្ធមិត្តរបស់ខ្លួននេះយ៉ាងខ្ជាប់ខ្ជួន។
ចិនធ្លាប់ជាអ្នកគាំទ្រយ៉ាងខ្លាំងរបស់រដ្ឋាភិបាលយោធាដែលផុតអាណត្តិនេះ ហើយដែលបានគ្រប់គ្រងប្រទេសភូមាតាំងពីឆ្នាំ១៩៨៨មក ក្នុងទម្រង់ដែលគេហៅថាជា «ប្រជាធិបតេយ្យមានវិន័យ»។ ប្រទេសភូមាបានស្ថិតនៅក្រោមការគ្រប់គ្រងយោធា ចាប់តាំងពីឆ្នាំ១៩៦២មកម៉្លេះ។
អ្នកនាំពាក្យ Jiang Yu និយាយថាសហគមន៍អន្តរជាតិគួរតែទទួលស្គាល់រដ្ឋាភិបាលជាប់ឆ្នោតតាមប្រជាធិបតេយ្យរបស់ភូមា។
ហើយអ្នកស្រីថ្លែងថាការណ៍នេះនឹងជួយប្រទេសភូមាឈានទៅមុខតាមផ្លូវទៅកាន់កំណើនសេដ្ឋកិច្ចនិងការអភិវឌ្ឍ៕
ប្រែសម្រួលដោយ សឹង សុផាត
