ភ្ជាប់​ទៅ​គេហទំព័រ​ទាក់ទង

ចិន​ជំរុញ​ឲ្យ​រក្សា​ស្ថិរភាព ​ពេល​លោក​មូបារ៉ាក់​លះបង់​អំណាច

  • Peter Simpson
  • VOA

បាតុករ​ប្រឆាំង​រដ្ឋាភិបាល​នៅ​ទីលាន ​Tahrir​ ប្រទេស​អេហ្ស៊ីព​អបអរ​ការ​លាលែង​ពី​តំណែង​​ដោយ​លោក​មូបារ៉ាក់។

ប៉េកាំង៖ រដ្ឋាភិបាល​កាន់​អំណាច​ផ្ដាច់​ការ​របស់​ប្រទេស​ចិន​ មាន​ប្រតិកម្ម​ដ៏​ប្រុង​ប្រយ័ត្ន​ទៅ​នឹង​ការ​បណ្ដេញ ​លោក​ ហុសនី ​មូបារ៉ាក់​ចេញ​ពី​តំណែង​ប្រធានាធិបតីអេហ្ស៊ីព។

គណបក្ស​កុម្មុយនិស្ត ​ដែលដឹក​នាំ​ប្រទេស​ចិន​ ​បាន​អំពាវនាវ ​កាល​ពី​ថ្ងៃ​សៅរ៍​ ​ឲ្យ​មាន​ស្ថិរភាព​នៅ​ក្នុង​ប្រទេសអេហ្ស៊ីព​ ​ក្រោយ​ពីការ​ធ្លាក់​ចេញ​ពី​តំណែង​របស់​ប្រធានា​ធិបតី ​ហុសនី​ មូបារ៉ាក់ ដោយ​និយាយ​ថា​ មហា​អំណាចបរទេស​មិន​ត្រូវ​ជ្រៀត​ជ្រែក​ទេ។

អ្នក​នាំ​ពាក្យ​ក្រ​សួង​ការ​បរទេស​ចិន ​លោកម៉ា ស្សាវស៊ូ (Ma Zhaoxou)​បាន​ថ្លែង​ផ្ទួនៗ​នៅ​ក្នុង​សេចក្ដី​ថ្លែងការណ៍​ដ៏​ប្រុងប្រយ័ត្ន​ ​ទៅ​នឹង​ព្រឹត្ដិការណ៍​នៅ​ក្នុង​ប្រទេស​អេហ្ស៊ីព​ ​ចុះ​ផ្សាយ​នៅ​ក្នុង​បណ្ដាញ​អ៊ិនធឹណិត ​ចាប់​តាំង​ពី​បាតុកម្ម​គាំទ្រ​លទ្ធិ​ប្រជា​ធិបតេយ្យ​បាន​ផ្ដើម​ឡើង​កាល​ពី​១៨​ថ្ងៃ​ មុន។

អ្នក​នាំ​ពាក្យ​នោះ​មិន​បាន​និយាយ​អំពី​ការ​លា​លែង​ចេញ​ពី​តំណែង​របស់​លោក​ មូបារ៉ាក់​ទេ​ ​ហើយ​ក៏​មិន​និយាយ​អំពី​មធ្យោបាយ​ដែល​បណ្ដាល​ឲ្យ​លោក​មូបារ៉ាក់ ​បាត់បង់​អំណាច​ដែរ។ ​តែ​ផ្ទុយ​ទៅ​វិញ​ ​លោក ​ម៉ា​បាន​ថ្លែង​ផ្ទួនៗ​ពាក្យ​ដដែលៗ​ដែល​ថ្លែង​នៅ​ក្នុង​សន្និសីទកាសែត ​កាល​ពី​ថ្ងៃ​ព្រហស្បតិ៍។

លោក​ម៉ា​ និយាយ​ថា ចិន​បាន​តាម​ដាន​មើល​ដ៏​ដិត​ដល់​ ​ទៅ​នឹង​ការ​ប្រែ​ប្រួល​ ​នៅ​ក្នុង​ប្រទេស​ អេហ្ស៊ីព​ ​ហើយ​សង្ឃឹម​ថា​ ​ការ​អភិវឌ្ឈ​ចុង​ក្រោយ​បង្អស់ ​នឹង​ជួយ​ប្រទេស​អេហ្ស៊ីព​រៀបចំ​ឲ្យ​មាន​ស្ថិរភាពឡើងវិញ​ ​នៅ​ក្នុង​ប្រទេស​ជាតិនិង​មាន​សណ្ដាប់​ធ្នាប់​ជាប្រក្រតី​ឡើង​វិញ​ឲ្យ​បាន​ឆាប់​រហ័ស។

បណ្ដាញ​ព័ត៌​មាន​ចិន ដែល​រដ្ឋ​កាន់​កាប់ ក៏​មាន​ការ​ប្រុង​ប្រយ័ត្ន​ដែរ។ ​ទិនានុប្បវត្ដិចិន​ ​ឆៃណា​ ដែលី ​(China Daily) បាន​សរ​សេរ​សង្កត់ធ្ងន់​មក​លើ​ពាក្យ​ស្លោក​របស់​រដ្ឋាភិបាល​ចិនថា ​ស្ថិរភាព​មាន​សារៈ​សំខាន់​លើសអ្វី​ទាំង​អស់។​កាសែត​នោះ​សរសេរ​ចុះ​ផ្សាយ​នៅ​ក្នុង​បទ​វិចារណកថានៅ​ថ្ងៃសៅរ៍​ថា​ ​ប្រទេស​មហា​អំណាច​មិន​ត្រូវ​ចូល​ធ្វើ​អន្ដរាគមន៍​ទេ។

បទ​វិចារណកថា​នោះ​ ​ជា​សេចក្ដី​អធិប្បាយ​ទូលំ​ទូលាយ​លើក​ទី​មួយ​ ចេញ​ពី​បណ្ដាញ​ព័ត៌មាន​រដ្ឋ​កាន់​កាប់ ដែល​បកស្រាយ​អំពី​ការ​បណ្ដេញ​លោក​មូបារ៉ាក​ ​ចេញ​ពី​អំណាច​នៅ​ថ្ងៃសុក្រ។​លោកបាន​ដឹក​នាំ​ប្រទេស​អេហ្ស៊ីព​ជិត​៣០​ឆ្នាំ​មក​ហើយ។ ទូរទស្សន៍រដ្ឋ​ផ្សព្វផ្សាយ​ព័ត៌​មាន ​ដែល​រាយ​ការណ៍អំពី​ការ​ធ្លាក់​ចេញ​ពី​តំណែង​ ​តែ​ការ​ផ្សាយ​នេះ​មិនមាន​បទ​អធិប្បាយ​ ​មិន​បាន​បង្ហាញ​រូប​ភាព​ហ្វូង​មនុស្សគាំទ្រ​លទ្ធិ​ប្រជា​ធិបតេយ្យ​ ​នៅ​ក្នុង​ទី​ក្រុង​ឡឺ​គែរ​ទេ។

អ្នក​សង្កេត​ការណ៍​ជា​ច្រើន​និយាយ​ថា​ ​ប្រតិកម្ម​ដ៏ប្រុង​ប្រយ័ត្ន​របស់ចិននេះ​ ​អាច​ជា​ការ​បង្ហាញ​ពី​ក្តី​ព្រួយ​បារម្ភ​ក្នុង​ចំណោម​មន្ដ្រី​ចិន​ ​នៅ​ក្នុង​ទី​ក្រុង​ប៉េកាំង​ ទាក់ទង​នឹង​ការ​កាន់​ក្ដាប់​ត្រួត​ត្រា​កិច្ចការ​ផ្ទៃ​ក្នុង​ប្រទេស។

គេហ​ទំព័រ​ក្នុងបណ្ដាញ​អ៊ិធឹណិត​ចិន​បាន​រឹត​បន្ដឹង​មក​លើ​ការ​អធិប្បាយ​របស់​សាធារណ​ជន អំពី​ការ​បះ​បោរ​នៅ​ក្នុង​ប្រទេស​អេហ្ស៊ីព។​ តែ​គេ​ឃើញ​មាន​ការ​សរសេរ​នៅ​ក្នុង​ទំព័រ​ប្លក​ ​វែក​ញែក​អំពី​ការ​ធ្លាក់​ចេញ​ពី​អំណាច​របស់​មេ​ដឹក​នាំនេះ។ ​អ្នក​សរ​សេរ​ទំព័រ​ប្លក​ម្នាក់​និយាយ​ថា​ “ការ​ប៉ះ​ពាល់​ចេញ​ពី​ព្រឹត្ដិការណ៍​នោះ ​នឹង​រាលដាល​ហួស​ពី​ពិភព​អារ៉ាប់​ទៅ​ទៀត។ ប្រទេស​ចិន​ដែល​នៅ​ឆ្ងាយ​ក៏​នឹង​អាច​ត្រូវ​ប៉ះ​ពាល់ ​ដែរ”។

ប្រែ​សម្រួល​ដោយ​ អ៊ូ ធួក

XS
SM
MD
LG