ប្រទេសចិនបាននិយាយកាលពីថ្ងៃសុក្រថា ខ្លួនបានធ្វើសមយុទ្ធយោធារួមគ្នាជាមួយរុស្ស៊ីនៅតាមបណ្តោយឆ្នេរសមុទ្រភាគខាងត្បូងរបស់ខ្លួន បន្ទាប់ពីសម្ព័ន្ធមិត្តលោកខាងលិច ដែលដឹកនាំដោយសហរដ្ឋអាមេរិកបានជួបប្រជុំគ្នានៅក្នុងរដ្ឋធានីវ៉ាស៊ីនតោន ហើយជប៉ុនបានព្រមានពីការកើនឡើងនូវការគំរាមកំហែងពីចំណងទាក់ទងយ៉ាងខ្លាំងរបស់រដ្ឋាភិបាលក្រុងប៉េកាំងជាមួយរដ្ឋាភិបាលក្រុងមូស្គូ។ នេះបើតាមសេចក្តីរាយ ការណ៍របស់ទីភ្នាក់ងារសារព័ត៌មាន AFP។
ក្រសួងការពារជាតិចិនបានបញ្ជាក់ថា យោធាប្រទេសទាំងពីរបានចាប់ផ្តើមសមយុទ្ធដែលហៅថា សមុទ្ររួមឆ្នាំ ២០២៤ «នៅដើមខែកក្កដា» ហើយសមយុទ្ធនេះនឹងមានរហូតដល់ពាក់កណ្តាលខែនេះ។
សមយុទ្ធនៅក្នុងដែនទឹកនិងដែនអាកាសនៅជុំវិញទីក្រុង Zhanjiang ជាទីក្រុងមួយនៅខេត្តក្វាងទុងគឺដើម្បី «បង្ហាញការដោះស្រាយនិងសមត្ថភាពរបស់ភាគីទាំងពីរ នៅក្នុងការដោះស្រាយរួមគ្នានូវការគំរាមកំហែងសន្តិសុខផ្លូវនាវាចរណ៍និងរក្សាសន្តិភាពនិងស្ថិរភាពនៅក្នុងសាកលលោកនិងតំបន់»។ នេះបើតាមការបញ្ជាក់របស់ក្រសួងការពារជាតិចិន។
ក្រសួងការពារជាតិចិនបានបន្ថែមទៀតថា សមយុទ្ធនេះ«នឹងធ្វើឱ្យកាន់តែស៊ីជម្រៅថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រាយរវាងចិននិងរុស្ស៊ីលើផ្នែកសម្របសម្រួលសម្រាប់សករាជថ្មី»។
ក្រសួងការពារជាតិប្រាប់ឱ្យដឹងទៀតថា សមយុទ្ធនេះកើតឡើងស្របទៅតាមផែនការប្រចាំឆ្នាំរបស់រដ្ឋាភិបាលក្រុងប៉េកាំងនិងរដ្ឋាភិបាលក្រុងមូស្គូ សម្រាប់ទំនាក់ទំនងយោធា។
ការប្រកាសបានកើតមានឡើងនៅក្នុងសប្តាហ៍តែមួយ ដែលមេដឹកនាំអង្គការអូតង់បានជួបប្រជុំគ្នានៅក្នុងរដ្ឋធានីវ៉ាស៊ីនតោន សហរដ្ឋអាមេរិក ដើម្បីបញ្ជាក់ឡើងវិញនូវការគាំទ្រប្រទេសអ៊ុយក្រែននៅពេលមានការឈ្លានពានរបស់រុស្ស៊ី។
កងទ័ពចិនក៏កំពុងរៀបចំសមយុទ្ធនៅសប្តាហ៍នេះជាមួយប្រទេសបេឡារុស ដែលជាសម្ព័ន្ធមិត្តមួយទៀតរបស់រុស្ស៊ីនៅព្រំដែនភាគខាងកើតរបស់អង្គការអូតង់។
ហើយជប៉ុនបាននិយាយនៅថ្ងៃសុក្រថា សកម្មភាពរួមគ្នារវាងចិននិងរុស្ស៊ីនៅជិតដែនដីរបស់ខ្លួនបណ្តាលឱ្យមាន «ការព្រួយកង្វល់ពីសន្តិសុខជាតិ»៕
វេទិកាបញ្ចេញមតិ