រដ្ឋាភិបាលចិនកាលពីថ្ងៃអង្គារ បានដកអាជ្ញាប័ណ្ណធ្វើការរបស់អ្នកសារព័ត៌មានបីរូបរបស់កាសែត the Wall Street Journal ដោយសារចំណងជើងនៃបទវិចារណកថាមួយ ដែលរដ្ឋាភិបាលចិនចាត់ទុកថាមានលក្ខណៈរើសអើងជាតិសាសន៍។
អ្នកនាំពាក្យក្រសួងការបរទេសចិន លោក Geng Shuang ថ្លែងប្រាប់អ្នកសារព័ត៌មានក្នុងទីក្រុងប៉េកាំងក្នុងថ្ងៃពុធនេះថា កាសែត the Wall Street Journal បានបដិសេធមិនសុំទោសចំពោះបទវិចារណកថាកាលពី៣ ខែកុម្ភៈ ដែលមានចំណងជើងជាភាសាអង់គ្លេសថា China is the Real Sick Man of Asia ដែលប្រែថា «ចិនជាអ្នកជំងឺពិតប្រាកដរបស់ទ្វីបអាស៊ី»។
បទវិចារណកថានេះ ត្រូវបានសរសេរដោយអ្នកសិក្សាស្រាវជ្រាវអាមេរិកមួយរូបឈ្មោះ Walter Russell Mead ដែលបានរិះគន់ពីរបៀបដែលចិនបានចាត់ចែងក្នុងរឿងទប់ទល់នឹងការផ្ទុះរាលដាលនៃមេរោគកូរ៉ូណាវីរុសប្រភេទថ្មី Covid-19 ដែលបានសម្លាប់មនុស្សជាង២០០០នាក់ គិតត្រឹមថ្ងៃពុធនេះ។
ឃ្លាជាភាសាអង់គ្លេស sick man of Asia ជាឃ្លាក្នុងប្រវត្តិសាស្ត្រដែលមានលក្ខណៈវាយតម្លៃមុនចំពោះជនជាតិចិន ថាជាជាតិសាសន៍ សំបូរជំងឺនិងមិនមានអនាម័យ។ ប៉ុន្តែកាសែត Wall Street Journal ថា ចំណងជើងនៃអត្ថបទនេះមិនត្រូវបានសរសេរដោយលោក Mead ទេ តែត្រូវសរសេរដោយបុគ្គលិក៣រូប គឺអនុប្រធានការិយាល័យកាសែតប្រចាំក្រុងប៉េកាំង លោក Josh Chin និងអ្នកកាសែត Chao Deng ដែលអ្នកទាំងពីរជាពលរដ្ឋអាមេរិកាំង និងអ្នកសារព័ត៌មានលោក Philip Wen ដែលជាជនជាតិអូស្ត្រាលី។
អាជ្ញាធរចិនបានបញ្ជាឲ្យបុគ្គលិកទាំងបីរូបចាកចេញពីប្រទេសចិនក្នុង៥ថ្ងៃទៀត។
ការសម្រេចបណ្តេញអ្នកកាសែតបស្ចិមប្រទេសបីរូបក្នុងថ្ងៃពុធនេះកើតមានឡើងក្រោយពីរដ្ឋបាលលោក ត្រាំ ប្រកាសចាត់ទុកស្ថាប័នផ្សាយព័ត៌មានរបស់ចិនចំនួន៥ថាជាស្ថាប័នរដ្ឋចិន ដូចស្ថានទូតដែរ ដែលនេះតម្រូវឲ្យស្ថាប័នព័ត៌មានទាំងនេះ ត្រូវចុះឈ្មោះបុគ្គលិកនិងការិយាល័យទាំងអស់ជាមួយក្រសួងការបរទេសអាមេរិក៕
