ភ្ជាប់​ទៅ​គេហទំព័រ​ទាក់ទង

រដ្ឋាភិបាល​ចិន​បញ្ជា​ឱ្យ​មាន​ការ​ស៊ើប​អង្កេត​ទៅ​លើ​ការ​ហៀរ​កំពប់​ប្រេង​នៅ​ក្នុង​ឈូង​សមុទ្រ​បូហៃ


សាជីវកម្ម​ប្រេង​ក្នុង​ដែន​សមុទ្រ​ប្រទេស​ចិន​ (China​ National​ Offshore​ Oil​ Corporation)​ ដែល​ជា​ក្រុមហ៊ុន​របស់​រដ្ឋ​ឃើញមាន​នៅក្នុងនៅ​ក្នុង​តំបន់​ឈូង​សមុទ្រ​ បូហៃ​ (Bohai) ប្រទេសចិន។ រូបថតនៅថ្ងៃទី៣ខែកុម្ភះ ឆ្នាំ២០០៥។

រដ្ឋាភិបាល​ចិន​កំពុង​បង្កើន​ការ​ដាក់​សម្ពាធ​របស់​ខ្លួន​ ទៅ​លើ​ក្រុម​ហ៊ុន​ទាំង​ឡាយ​ដែល​មាន​ជាប់​ពាក់​ព័ន្ធ​នៅ​ក្នុង​ការ​ហៀរ​កំពប់​ប្រេង​ នៅ​ក្នុង​ឈូង​សមុទ្រ​ បូហៃ​ (Bohai​ Bay)។​ រដ្ឋាភិបាល​បាន​អំពាវ​នាវ​ឱ្យ​មាន​ការ​ស៊ើប​អង្កេត​ហ្មត់​ចត់​មួយ​ទៅ​ក្នុង​ឧប្បត្តិហេតុ​នេះ និង​ការ​ដាក់​កំហិត​មួយ​ទៅ​លើ​គម្រោង​សាង​សង់​ថ្មី​នៅ​ក្នុង​ឈូង​សមុទ្រ​ បូហៃ។

បណ្តាញ​ព័ត៌មាន​ចិន​កាល​ពី​ថ្ងៃ​ព្រហស្បត៍​ បាន​ធ្វើ​សេចក្តី​រាយការណ៍យ៉ាង​ទូលំ​ទូលាយ​ អំពី​ការ​អំពាវនាវ​របស់​លោក​នាយក​រដ្ឋមន្រ្តី​ វែន​ ជៀប៉ាវ​ (Wen​ Jiabao)​ ឱ្យ​មាន​ការ​ស៊ើប​អង្កេត​មួយ​ទៅ​លើ​ការ​ហៀរ​កំពប់​ប្រេង​នៅ​ក្នុង​ឈូង​សមុទ្រ​ បូហៃ​ (Bohai​ Bay)។

លោក​ វែន​ (Wen)​ ជា​អ្នក​ដឹកនាំ​ក្រុម​ប្រឹក្សា​រដ្ឋ​ ដែល​បាន​ចេញ​សេចក្តី​ថ្លែង​ការ​មួយ​ អំពាវ​នាវ​ឱ្យ​គ្រប់​ភាគី​ទាំង​អស់​ ដែល​ទទួល​ខុស​ត្រូវ​ចំពោះ​គ្រោះ​ថ្នាក់​នេះ​ ធ្វើ​ការ​ប្រមូល​ទប់​ប្រេង​ និង​បោស​សម្អាត​លទ្ធ​ផល​ទាំង​ឡាយ។

តំបន់​ដែល​មាន​ការ​ហៀរ​កំពប់​ប្រេង​នេះ​ ត្រូវ​គ្រប់​គ្រង​ដោយ​ក្រុម​ហ៊ុន ខូណូខូ​ហ្វីលីបស៍​ ឆាយ​ណា​ (Conoco​Phillips​ China)​ ដែល​ជា​ក្រុមហ៊ុន​រក​ស៊ី​រួម​គ្នា​មួយ​ រវាង​ក្រុម​ហ៊ុន​អាមេរិកាំង​ ខូណូខូ​ហ្វីលីបស៍​ (Conoco​Phillips)​ និង​ សាជីវកម្ម​ប្រេង​ក្នុង​ដែន​សមុទ្រ​របស់​ប្រទេស​ចិន​ (China​ National​ Offshore​ Oil​ Corporation)​ ដែល​ជា​ក្រុមហ៊ុន​របស់​រដ្ឋ។

កាល​ពេល​មុន​នេះ​ ក្រុមហ៊ុន​ ខូណូខូ​ហ្វីលីបស៍​ (Conoco​Phillips)​ បាន​និយាយ​ថា​ ខ្លួន​នឹង​បង្កើត​មូលនិធិ​មួយ​ ដើម្បី​ទូទាត់​ការ​ខូចខាត​ទាំង​ឡាយ​ ដែល​បណ្តាល​មក​ពី​ការ​ហៀរ​កំពប់​ប្រេង។​ បណ្តាញ​ព័ត៌មាន​ចិន​និយាយ​ថា​ គេ​មិន​បាន​ប្រាប់​ចំនួន​ទឹក​ប្រាក់​សម្រាប់​មូលនិធិ​នោះ​ទេ។

នៅ​ពេល​ដែល​ត្រូវ​បាន​គេ​សួរ​អំពី​ប្រិត​កម្ម​របស់​រដ្ឋាភិបាល​ចិន​ ទៅ​លើ​ការ​ប្រកាស​របស់​ក្រុម​ហ៊ុន​ ខូណូខូ​ហ្វីលីបស៍​ (Conoco​Phillips)​ អ្នក​នាំ​ពាក្យ​ក្រសួង​ការ​បរទេស​ លី​ វីមិន​ (Liu​ Weimin)​ បាន​ហៅ​ការ​ប្រកាស​នេះ​ថាជា​បញ្ហា​ពាណិជ្ជ​កម្ម​មួយ​ ហើយ​មិន​មែន​ជា​បញ្ហា​ការទូត​មួយ​ទេ។

លោក លី​ (Liu)​ និយាយ​ថា​ អាជ្ញាធរ​ដែល​ជាប់​ពាក់​ព័ន្ធ​ នឹង​ដោះ​ស្រាយ​ជា​មួយ​នឹង​ករណី​នេះ​ ដោយ​យោង​ទៅ​តាម​អ្វី​ដែល​លោក​ពណ៌នា​ថា​ «ជា​ទម្រង់ការ​ធម្មតា»។

រដ្ឋាភិបាល​ចិន​មិន​បាន​ស្តី​បន្ទោស​ក្រុម​ហ៊ុន​ណា​មួយ​ដោយ​ចំ​ឈ្មោះ​ទេ​ ប៉ុន្តែ លោក​ ហ្វង់​ យ៉ាមិន​ (Wang​ Yamin)​ ដែល​ជា​សាស្រ្តាចារ្យ​រង​មួយ​រូប​នៃ​មហា​វិទ្យាល័យ​អំពី​មហា​សមុទ្រ​ (College​ of​ Ocean)​ នៅ​ក្នុង​សាកល​វិទ្យាល័យ​ ស្សានទុង​ (Shandong​ University)​ បាន​និយាយ​ចំៗ​ជាង​នេះ។

លោក​ Wang​ និយាយ​ថា​ លោក​យល់​ថា​ ក្រុមហ៊ុន​ ខូណូខូ​ហ្វីលីបស៍​ (Conoco​Phillips)​ បាន​ព្រងើយ​កន្តើយ​នឹង​បទ​បញ្ញត្តិ​ទាំង​ឡាយ​ស្តី​អំពី​បរិស្ថាន​ ហើយ​ខ្វល់​ខ្វាយ​តែ​អំពី​ការ​បូម​យក​ប្រេង​តែ​ប៉ុណ្ណោះ។​ ដូច្នេះ​ ក្រុមហ៊ុន​នេះ​ជា​អ្នក​ទទួល​ខុស​ត្រូវ​ចំពោះ​ការ​ធ្វើ​ឱ្យ​មាន​ការ​ហៀរ​កំពប់​ប្រេង​នេះ។

ជា​ពិសេស​ លោក​បាន​និយាយ​សរសើរ​បញ្ញត្តិ​របស់​ក្រុម​ប្រឹក្សា​រដ្ឋ​ ដែល​បាន​កំណត់​គម្រោង​ឧស្សាហកម្ម​បន្ថែម​ទៀត​ នៅ​ក្នុង​តំបន់​ឈូង​សមុទ្រ​ បូហៃ​ (Bohai)។​ លោក​និយាយ​ថា​ តំបន់​នេះ​មាន​ប្រព័ន្ធ​បរិស្ថាន​មិន​រឹង​មាំ​មួយ​ ដែល​ត្រូវ​បាន​អភិវឌ្ឍ​យក​ផល​លើស​លុប​រួច​ទៅ​ហើយ។

លោក​និយាយ​ថា​ ការ​ខូច​ខាត​ផ្នែក​បិរស្ថាន​កំពុង​តែ​មាន​ភាព​ធ្ងន់​ធ្ងរ​ ដ៏​គួរ​ឲ្យ​មាន​ការ​ភ័យ​ខ្លាចរួច​ទៅ​ហើយ​ ហើយ​មិន​ទាន់​ឈាន​ដល់​កម្រិត​ខ្ពស់​បំផុត​របស់​វា​នៅ​ឡើយ​ទេ។​ លោក​និយាយ​ថា​ ប្រសិន​បើ​និន្នាការ​នា​ពេល​បច្ចុប្បន្ន​នៅ​តែ​បន្ត​ តំបន់​ បូហៃ​ (Bohai)​ នឹង​ក្លាយ​ទៅ​ជា​ដែន​សមុទ្រ​មួយ​ ដែល​លែង​មាន​សត្វ​និង​រុក្ខជាតិ​នៅ​រស់​ជីវិត​ត​ទៅ​ទៀត​ហើយ៕

ប្រែ​សម្រួល​ដោយ​ ឌី ខាំបូលី

XS
SM
MD
LG