អ្នកនាំពាក្យក្រសួងការបរទេសចិន បាននិយាយថា រដ្ឋាភិបាលរបស់លោកបានកត់សម្គាល់ពីការវិវឌ្ឍនានាក្នុងលទ្ធភាពដែលរដ្ឋាភិបាលសហរដ្ឋអាមេរិកអាចនឹងកាត់ការផ្សាយភាសាចិនកុកងឺរបស់វីអូអេ (VOA) ផ្សាយទៅប្រទេសចិន។ ក៏ប៉ុន្តែអ្នកប្រឆាំងរដ្ឋាភិបាលជើងចាស់ជនជាតិចិនម្នាក់បានរឹះគន់ការកាត់នេះ។
លោក ម៉ា ស្សាក្ស៊ូ (Ma Zhaoxu) អ្នកនាំពាក្យក្រសួងការបរទេសចិនបាននិយាយកាលពីថ្ងៃអង្គារ៍ថា លោកបានឃើញសេចក្តីរាយការណ៍ថា ស្ថានីយ៍ផ្សាយអន្តរជាតិដូចជាសំឡេងសហរដ្ឋអាមេរិក និងប៊ីប៊ីស៊ី (BBC) នឹងកាត់បន្ថយការផ្សាយជាភាសាចិនកុកងឺ។
លោកម៉ាមិនបានធ្វើអត្ថាធិប្បាយបន្ថែមទេ ក៏ប៉ុន្តែលោកបាននិយាយថាអង្គការទាំងនោះបានធ្វើការសម្រេចចិត្តដោយខ្លួនឯងផ្ទាល់។
ការអត្ថាធិប្បាយរបស់លោកខ្សោយជាងបទវិចារណកថាដែលបានបោះពុម្ភផ្សាយកាលពីសប្តាហ៍មុននៅក្នុងកាសែតជាភាសាអង់គ្លេសឈ្មោះ ក្លូបល ថែមស៍ (Global Times) ដែលជាកាសែតដ៍ធំបង្អស់មួយរបស់ចិន។
អត្ថបទនោះប្រាប់ឲ្យដឹងថា ការកាត់ការផ្សាយភាសាចិនកុកងឺរបស់ វីអូអេ និងប៊ីប៊ីស៊ី ផ្តល់ជាសញ្ញា នៃការបញ្ចប់សករាជមួយដែលខ្លួនបានហៅថា ការកាត់បន្ថយការផ្ទុះយុទ្ធនាការមនោគមវិជ្ជា ដែលប្រទេសនានាបានធ្វើប្រឆាំងនឹងប្រទេសចិន ហើយអត្ថបទនោះបានបន្តទៀតថា ពួកអ្នកគាំទ្រវីអូអេបានស្មានលើសពីប្រសិទ្ធិភាពរបស់ខ្លួនដើម្បីឲ្យបានទទួលចំណូលចិត្តនិងសតិអារម្មណ៍របស់ទស្សនិកជនចិន។
អត្ថបទនោះ បានសន្ឋិដ្ឋានថា សេវាកម្មផ្សាយជាភាសាចិននឹងបញ្ចប់ជាប្រវត្តិសាស្ត្រដោយបេសកម្មរបស់ខ្លួនមិនទាន់បានបញ្ចប់។
ក្រុមប្រឹក្សាភិបាលការផ្សាយ ដែលត្រួតពិនិត្យវីអូអេ បានបញ្ជូនសំណើថវិកាទៅសភាដែលរួមមានផែនការរៀបចំរចនាសម្ព័ន្ធឡើងវិញនូវកិច្ចខិតខំប្រឹងប្រែងការផ្សាយរបស់ខ្លួនទៅប្រទេសចិន។ ផែនការនោះ រួមមានការបំបាត់ចោលការផ្សាយជាភាសាចិនកាតាំងរបស់វីអូអេ។ ផែនការក៏នឹងបំបាត់ការផ្សាយវិទ្យុតាមរលកធាតុអាកាសទាបជាភាសាចិនកុកងឺរបស់វីអូអេផងដែរ ហើយផ្លាស់ប្តូរការផ្សាយជាភាសាចិនកុកងឺរបស់វីអូអេទៅសេវាកម្មប្រព័ន្ធអ៊ីធឺណិតតែប៉ុណ្ណោះ។ វិទ្យុអាស៊ីសេរី ដែលត្រូវបានផ្តល់ថវិកាដោយក្រុមប្រឹក្សាភិបាលការផ្សាយដែរនោះ នឹងទទួលយកម៉ោងផ្សាយភាសាកុកងឺរបស់វីអូអេ។
ការកាត់បន្ថយថវិកានឹងកាត់បន្ថយបុគ្គលិករបស់ វីអូអេផ្សាយជាភាសាចិន៤៥នាក់ក្នុងចំណោមបុគ្គលិកទាំងអស់៧៦នាក់។ ផែនការនោះត្រូវគេរំពឹងនឹងជួយសន្សំប្រាក់៨លានដុល្លារ ដែលជាផ្នែកមួយនៃការសន្សំពីការចំណាយលើការផ្សាយ។ សំណើថវិកាទាំងអស់សម្រាប់វីអូអេនៅឆ្នាំសារពើពន្ធឆ្នាំ២០១២មានជាង២០០លានដុល្លារ។
លោក បោ តុង (Bao Tong) ជាអ្នកប្រឆាំងជើងចាស់បានរឹះគន់ការសម្រេចចិត្តនោះ។ លោកមានប្រសាសន៍ថា ចំពោះរូបលោកៗគិតថា ដើម្បីសន្សំប្រាក់៨លានដុល្លាររដ្ឋាភិបាលសហរដ្ឋអាមេរិកសុខចិត្តមិនចង់ឲ្យធ្វើជាមិត្តភក្តិជាមួយប្រជាពលរដ្ឋចិន។ លោកនិយាយបន្ថែមទៀតថា លោកគិតថា ការកាត់នោះ អាចចង្អុលបង្ហាញថា សហរដ្ឋអាមេរិកមានការភ័យខ្លាចពីការងើបឡើងរបស់ចិន។
ចិនជារឿយៗបានរិះគន់វីអូអេថាលម្អៀងហើយមានអ្វីដែលខ្លួនពណ៌នាថាជាគំនិតសង្គ្រាមត្រជាក់។
វីអូអេសំឡេងសហរដ្ឋអាមេរិកបានផ្សាយជាលើកដំបូងក្នុងឆ្នាំ១៩៤២។ វីអូអេ ត្រូវបានផ្តល់ថវិកាដោយរដ្ឋាភិបាលសហរដ្ឋអាមេរិក ក៏ប៉ុន្តែប្រតិបត្តិស្របទៅតាមគោលការណ៍មួយដែលកំណត់ទៅលើព័ត៌មានប្រកបដោយតុល្យភាព។ វីអូអេផ្សាយកម្មវិធីព័ត៌មាន ដំណឹង ការសិក្សាអប់រំ និងកម្មវិធីវប្បធ៌មជាង១.០០០ម៉ោងជារៀងរាល់សប្តាហ៍ជូនទស្សនិកជនទូទាំងពិភពលោកជាង១២៥លាននាក់។
ប្រែសម្រួលដោយ ជឹង ប៉ូជីន
