ភ្ជាប់​ទៅ​គេហទំព័រ​ទាក់ទង

ប្រទេសចិន​តទល់​ជាមួយនឹង​គ្រោះរាំង​ស្ងួត​ដ៏អាក្រក់​បំផុត​ នៅក្នុង​រយៈពេល​ជាង​៥០​ឆ្នាំ​កន្លង​មកនេះ។


ទំនប់​នៅតាម​ដង​ទន្លេ​ យ៉ង់​ស្សេ នៅខ្សែ​ខាង​លើ​នៃ​​ទំនប់​​ Three Gorge Dam​ ​នៅក្នុង​ខេត្តហ៊ូបី (Hubei) ប្រទេសចិន។

ទីក្រុង​និង​ខេត្ត​ទាំងឡាយ​នៅ​តាមដងទន្លេ​ យ៉ង់ស្សេ (Yangtze) នៅក្នុង​ភាគកណ្តាល​នៃ​ប្រទេស​ចិន កំពុង​ធ្វើការ​ប្រយុទ្ធ​តទល់​ជាមួយ​នឹង​គ្រោះ​រាំង​ស្ងួតដ៏​អាក្រក់​បំផុត​របស់​ប្រទេស​នេះ​ នៅក្នុង​រយៈពេល​ជាង​៥០ឆ្នាំ​កន្លង​មក​នេះ។ ក្រុម​អ្នកវិភាគ​ផ្នែកធនធាន​និយាយថា គ្រោះ​រាំង​ស្ងួត​នេះ​មិនត្រឹម​តែ​បង្ហាញ​អំពី​ផលប៉ះពាល់​ពីការ​ផ្លាស់ប្តូរ​អាកាសធាតុ​តែ​ប៉ុណ្ណោះ​ទេ តែ​ថែមទាំង​បង្ហាញ​អំពីបញ្ហា​ដែល​បន្ត​កើត​មាន​ នៃការ​ខ្វះខាត​ទឹក និង​ថាតើ​ប្រទេសនេះ​ ត្រូវ​តែថ្លឹងថ្លែង​បញ្ហា​នេះ ដោយ​វិធី​ណា ជាមួយ​នឹង​តម្រូវការ​ដ៏ធំសម្បើម​របស់​ខ្លួន ទៅលើថាម​ពលនិងសម្រាប់កំណើន​សេដ្ឋកិច្ច។

បឹង ប៉ូយាង (Poyang) គឺជា​បឹង​ទឹកសាប​ធំជាង​គេ​បង្អស់​នៅក្នុង​ប្រទេស​ចិន ហើយ​គ្រាន់តែ​ជា​ឧទាហរណ៍មួយ​ ថាតើគ្រោះរាំងស្ងួតបាន​ក្លាយ​ទៅ​ជា​មាន​សភាព​ធ្ងន់ធ្ងរ​ដល់​កំរិត​ណា។ បឹង​ដែល​ស្ថិត​នៅក្នុង​ខេត្ត​ ជៀងស្សី (Jiangxi) តាម​ដងទន្លេ​ យ៉ង់ស្សេ នេះ បាន​រួម​តូច​ នៅ​តិចជាង​ពាក់​កណ្តាល​នៃ​ទំហំ​ធម្មតា​របស់វា ហើយ​ការ​ខ្វះខាត​ទឹក​មាន​ផល​ប៉ះពាល់​យ៉ាង​ធំធេង​មួយ ទៅលើ​ការនេសាទ​និង​ការ​ធ្វើស្រែចម្ការ​នៅតំបន់ក្បែរ​បឹង​នេះ។

ជាមួយនឹង​កម្រិតទឹក​ទាបយ៉ាងខ្លាំង ដងទន្លេ យ៉ង់ស្សេ មិន​អាច​ឱ្យកប៉ាល់​ដឹកទំនិញ​ឆ្លង​កាត់​បានទេ ហើយ​បាន​បង្អាក់​ដល់ការផ្គត់ផ្គង់​រោងចក្រ​ទាំង​ឡាយ​នៅ​តាម​ដង​ទន្លេ និងការ​ដឹក​ផលិតផល​រោងចក្រ​និង​ទំនិញ​កសិកម្ម។ ក្រុម​អ្នក​វិភាគ​និយាយ​ថា ទន្លេ​នេះ​ត្រូវ​បាន​ប្រើប្រាស់​ សម្រាប់​ដឹកជញ្ជូនទំនិញប្រមាណ១០០​ពាន់លាន​តោន នៅ​ក្នុង​មួយ​ឆ្នាំៗ។

លោក រ៉ូប៊ឺត គីមប័ល (Robert Kimball) អ្នក​សម្រប​សម្រួល​គម្រោង​មួយ នៅ​ឯ​វិទ្យាស្ថាន​ធនធាន​ពិភព​លោក នៅក្នុង​រដ្ឋ​ធានី វ៉ាស៊ីនតោន និយាយថា គ្រោះរាំង​ស្ងួត​ក៏បាន​ប៉ះពាល់​ផលដែរ​ដល់​ការ​ផលិត​ថាម​ពលអគ្គីសនី។

«មាន​ប្រព័ន្ធ​វារីអគ្គីសនី​ជាច្រើន នៅក្នុងអាងទន្លេ យ៉ង់ស្សេ។​ ឧទាហរណ៍ នៅ​ឯ​ទំនប់​មួយ​ដែល​មាន​ឈ្មោះ​ជា​ភាសា​អង់​គ្លេស​ថា Three Gorges Dam ​ការ​ផលិត​ថាមពល​ បាន​ធ្លាក់​ចុះ​២០ ភាគរយ ដោយសារ​គ្រោះ​រាំងស្ងួត ​បើយោង​តាម​ការ​ប៉ាន់​ស្មាន​មួយ​ចំនួន។ ក្រុមហ៊ុន​ណាដែលពឹង​ផ្អែក​លើ​ថាមពល​នេះ កំពុងទទួលផល​ប៉ះពាល់​។ ក្រុមហ៊ុន​ខ្លះ​ថែមទាំង​ត្រូវ​បានបង្ខំ​ ឱ្យកំណត់​អំពី​ការប្រើ​ប្រាស់​ថាម​ពល​របស់​ពួក​គេ​ថែម​ទៀត​ផង។»

ដើម្បី​ជួយ​សម្រួល​ដល់​ផលប៉ះពាល់​នៃគ្រោះ​រាំងស្ងួត អាជ្ញាធរ​ចិន​បាន​ចាប់​ផ្តើម​បញ្ចេញទឹក​យ៉ាងច្រើន​សន្ធឹក​សន្ធាប់​ពីទំនប់​ Three Gorges Dam ដើម្បី​លើក​កំពស់​កម្រិត​ទឹក។

លោក គីមប័ល បន្ថែម​ថា ផល​ប៉ះពាល់​នៃគ្រោះរាំងស្ងួត​ទៅលើ​ការ​បង្កើតថាមពល​និង​អាជីវកម្ម គួស​បញ្ជាក់​អំពី​ភាព​ស្មុគស្មាញ​នៃ​បញ្ហា​នេះ។

«នៅពេលដែល​អ្នក​ធ្វើ​អ្វី​មួយ ដូចជា​ការបែងចែក​ទឹក​និង​ថាមពល ដែល​គឺ​ជាអ្វី​ដែល​យើង​កំពុង​មើល​ឃើញ នៅអាងទន្លេ​ យ៉ង់ស្សេ​ នាពេល​ឥឡូវនេះ ​ក្រុមហ៊ុន​ទាំងឡាយ​និង​រដ្ឋាភិ​បាល​នៅ​ក្នុង​ប្រទេស​ចិន ព្យាយាម​សម្រេចថា​តើផ្នែក​អ្វី តើ​ការ​ប្រើ​ប្រាស់​អ្វី ដែល​ជា​ការ​ប្រើ​ប្រាស់​ ដែលមាន​សារៈសំខាន់​ខ្លាំង​ជាង​គេ និង​ប្រកប​ដោយ​ផលិត​ភាពខ្លាំង​ជាង​គេ​ សម្រាប់​ធនធាន​ទឹក​ដ៏​មាន​កំណត់​របស់​យើង។»

លោក ឃីសហ៍ ស្នាយឌ័រ (Keith Schneider) ដែល​ជា​និពន្ធនាយក​ជាន់​ខ្ពស់​មួយ​រូប នៅឯ​សមាគម​អ្នក​កាសែត​និង​អ្នកវិទ្យាសាស្រ្ត​អន្តរ​ជាតិ ដែលហៅជា​ភាសា​អង់គ្លេស​ថា Circle of Blue ដែល​ផ្តោត​ការ​យក​ចិត្ត​ទុក​ដាក់​ទៅ​លើ​ធនធាន​ទឹក​សាកល និយាយ​ថា ការ​ខ្វះ​ខាត​ទឹក​គឺជា​បញ្ហាមួយដែល​កំពុង​តែ​កើនឡើងនៅ​ក្នុង​ប្រទេស​ចិន។

«ប្រទេស​ចិន​បាត់បង់ទឹក​បន្តិច​ម្តងៗ ចាប់តាំង​ពី​ឆ្នាំ​២០០០​មក បើ​យោង​តាម​ការិយាល័យ​ស្ថិតិ​ជាតិ​របស់​ពួកគេ។ តាម​ការ​ពិត​ ពួកគេ​បាន​បាត់​បង់​ទឹក​ចំនួន​៣៥​ពាន់​លាន​ម៉ែត្រ​គូប​ជា​រៀង​រាល់​ឆ្នាំ​ ចាប់​តាំង​ពី​ឆ្នាំ​២០០០។ នេះ​គឺ​មាន​ចំនួន​សរុប​ចំនួន៣៥០​ពាន់​លាន​ម៉ែត្រ​គូប​សម្រាប់​ប្រទេសនេះ។ ហើយ​ចំនួន​៣៥០​ពាន់​លាន​ម៉ែត្រ​គូប​ គឺជាបរិមាណ​មួយ​ដ៏​ច្រើន។ វាមាន​ចំនួន​ច្រើន ​ប្រហែល​ស្មើរ​នឹង​ចំនួន​ទឹក​ ដែលហូរ​ចុះ​តាម​ដង​ទន្លេ​ យ៉ង់ស្សេ ហើយ​កាត់​តាម​ទីក្រុង​ ស៊ាងហៃ (Shanghai) ក្នុង​រយៈ​ពេល​៨​ខែ។»

ក្រុម​អ្នក​ឧតុនិយម​ចិន​និយាយថា ការ​ផ្លាស់​ប្តូរ​អាកាស​ធាតុកំពុង​បង្ក​ការ​បំផ្លាញ​ ទៅលើ​ការ​ផ្គត់​ផ្គង់​ទឹក​របស់​ប្រទេស​នេះ។

លោក​ ស្នាយឌ័រ​ និយាយថា ការ​សាងសង់​ទំនប់​ទឹក​ទាំង​ឡាយនៅតាម​ដង​ទន្លេ​ យ៉ង់​ស្សេ ក៏ជា​កត្តា​រួម​ចំណែក​មួយ​ផង​ដែរ។ នៅខ្សែ​ខាង​លើនៃ​ទំនប់ Three Gorge Dam មានទំនប់​ទឹក​ចំនួន​១០០ ដែល​ស្ថិត​នៅក្នុង​ដំណាក់​កាល​ផ្សេងៗ​គ្នា​នៃ​ការ​សាង​សង់​។ ដូច​ទំនប់​ Three Gorge Dam ដែរ ទំនប់​ទាំង​នេះ​មាន​អាង​ស្តុក​ទឹក​ធំៗ។

«ដូច្នេះ ការ​បំពេញបឹង​ទាំង​នោះ​ ជាឧបសគ្គផង និង​ជា​ការ​ជួយផង ពីព្រោះ​វាមាន​ទឹក​ដែល​ត្រូវ​បាន​រក្សា​ទុក​នៅ​ទីនោះ ដូច្នេះ អ្នក​អាច​បញ្ចេញ​វា​ទៅ​ក្នុង​ទន្លេ។ ប៉ុន្តែ ការ​ពិត​គឺថា បឹង​ទាំង​នោះ​ក៏​ត្រូវ​ការ​បំពេញ​ផង​ដែរ ដើម្បីផលិត​ថាមពល​ពីទំបន់​វារីអគ្គីសនី​ទាំង​នោះ។»

ដើម្បី​កម្រិត​ការ​ប្រើ​ប្រាស់​ទឹក​របស់​ខ្លួន ចិន​កំពុង​តែ​ធ្វើការ​ពង្រីក​យ៉ាង​ខ្លាំង​ក្លា ទៅលើ​ការ​ផលិតថាមពល​ផ្សេងទៀត និង​កំពុង​ស្វែង​រក​វិធី​ទាំង​ឡាយ ដើម្បីប្រើរ​ប្រាស់​ធន​ធាន​ទឹក​របស់​ខ្លួន​ឡើង​វិញ​ នៅ​ក្នុង​ទី​ក្រុង​ធំៗ។

ទោះ​ជា​យ៉ាង​នេះ​ក្តី ទឹក​គឺ​ជា​សមាសភាព​ដ៏​ចម្បង​មួយ នៃ​ភាព​ស្មុគ​ស្មាញ​នៃ​ការ​បង្កើត​ប្រភព​ធនធាន​និងថាម​ពល ដែលរក្សា​ការ​រីកចំរើន​ផ្នែក​សេដ្ឋ​កិច្ច​ដ៏​ធំសម្បើម​របស់​ចិន។​ ឧទាហរណ៍ ផលិត​កម្ម​ធ្យូងថ្មបាន​ជួយ​ប្រទេសចិន នៅ​ក្នុង​ការ​ជំរុញ​កំណើន​សេដ្ឋ​កិច្ច​ ហើយស្មើនិង​ការ​ប្រើ​ប្រាស់​ទឹក​របស់​ប្រទេស​នេះ ចំនួន២៣​ភាគរយ។

«ចិន​កំពុង​តែត្រូវ​ការអ្វីៗ​គ្រប់​បែប​យ៉ាង។ ពួកគេ​ត្រូវ​ការ​ទឹក​ថែម​ទៀត ពួកគេ​ត្រូវ​ការ​ថាមពល​ថែមទៀត ពួកគេ​ត្រូវ​ការ​ធ្យូងថ្ម​ថែម​ទៀត។ ពួកគេ​ត្រូវការ​ប្រភព​ធន​ធាន​យ៉ាង​ច្រើន​សន្ធឹក​សន្ធាប់​ ហើយការ​ប្រកួត​ប្រជែង​យក​ថាម​ពល ទឹក​ និង​ម្ហូប​អាហារ​បាន​មក​ដល់​ចំណុច​ជាប់​គាំង​ដ៏​សំខាន់​ពិត​ប្រាកដ​មួយ ទាំង​នៅ​ភាគ​ខាង​ជើង​និង​ភាគ​ខាង​ត្បូង។ ហើយ​គ្រោះ​រាំង​ស្ងួត​នៅ​ក្នុង​ទន្លេ យ៉ង់ស្សេ ដែល​ជា​ទន្លេ​វែង​ជាង​គេ​និង​ធំ​ជាង​គេ​បង្អស់​នៅ​ក្នុង​ប្រទេស​នេះ គឺ​ជា​និមិត្ត​រូប​នៃ​បញ្ហា​ទាំង​អស់​នោះ។»

យោង​តាម​សារព័ត៌មាន​រដ្ឋ​ចិន គ្រោះ​រាំង​ស្ងួត​មាន​ផលប៉ះពាល់​ទៅលើ​ដី​ចំការ​ជាង​មួយ​លាន​ហិកតា នៅ​ក្នុង​ខេត្ត​ចំនួន​៧ នៅភាគកណ្តាល​នៃ​ប្រទេស​ចិន។ ក្រុម​មន្រ្តី​អាជ្ញា​ធរ​ដែន​ដី ត្រូវ​បាន​រាយ​ការណ៍​មក​ថា បាន​បាញ់​រ៉ុក្កែតជាង​៤​ពាន់​គ្រាប់ទៅលើ​មេឃ​ដើម្បី​បង្កើត​ពពក និងដើម្បី​ព្យាយាម​នាំទឹក​ភ្លៀង​ទៅ​កាន់​តំបន់​រាំង​ស្ងួតនៅតាម​ដង​ទន្លេ។ ទោះ​ជា​យ៉ាង​នេះ​ក្តី ការ​ព្យាករណ៍​បាន​បង្ហាញ​ថា និងមានការ​ធ្លាក់​ភ្លៀង​បន្តិច​បន្តួច​ ជា​បន្ត​យ៉ាង​ហោច​ណាស់​រហូត​ដល់​ខែ​ក្រោយ៕

ប្រែសម្រួល​ដោយ ឌី ​ខាំបូលី

XS
SM
MD
LG