ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រតិកម្ម​របស់​ចិន​ចំពោះ​មរណភាព​របស់​ប៊ិន ឡាដិន


លោក​ស្រី​ជាង​យូ​អ្នក​នាំ​ពាក្យ​ក្រសួង​ការ​បរទេស​នៃ​ប្រទេស​ចិន​ឆ្លើយ​​សំណួរពេល​ធ្វើ​សន្និ​សីទ​​សារព័ត៌មាន​នៅ​ទី​ក្រុង​ប៉េកាំង។​
លោក​ស្រី​ជាង​យូ​អ្នក​នាំ​ពាក្យ​ក្រសួង​ការ​បរទេស​នៃ​ប្រទេស​ចិន​ឆ្លើយ​​សំណួរពេល​ធ្វើ​សន្និ​សីទ​​សារព័ត៌មាន​នៅ​ទី​ក្រុង​ប៉េកាំង។​

ចិន​អបអរ​មរណភាព​របស់​ប៊ិន​ឡាដិន ​និង​ការពារ​ប៉ាគីស្ថាន​ដែល​ជា​សម្ព័ន្ធ​មិត្ត​របស់​ខ្លួន​ប្រឆាំង​នឹង​ការ​ចោទ​ប្រកាន់​ដែល​ថា​ ប្រទេស​នេះ​ស្ទើរ​តែ​មិន​បាន​ធ្វើ​អ្វី​ដើម្បី​រក​មេដឹក​នាំ​ពួក​អាល់ខេដា​។ ប្រតិកម្មរបស់​ក្រុម​អ្នក​រស់​នៅ​ក្នុង​តាម​មូលដ្ឋាន​មាន​ភាព​ចម្រុះ។

កាល​ពីព្រឹក​ថ្ងៃ​អង្គារ​ រដ្ឋាភិបាល​ចិន​ចេញ​សេចក្ដី​ថ្លែង​ការ​ណ៍​មួយ​ហៅ​ការ​ស្លាប់​របស់​អូសាម៉ា ប៊ិន ឡាដិន​ ថាជា​ព្រិត្ដិការណ៍​សំខាន់​មួយ​ ហើយ​នឹងជាព្រិត្ដិការណ៍​វិវត្ដ​ជា​វិជ្ជមាន​នៅ​ក្នុង​ការ​ពុះពារ​ប្រយុទ្ធរបស់​អន្ដរជាតិ​ប្រឆាំង​នឹង​ភេរវកម្ម។

នៅ​ពេល​ថ្លែង​ទៅ​កាន់​អ្នក​យក​ព័ត៌មានទៀងទាត់​របស់​ក្រសួង​ការបរទេសចិន លោក​ស្រី​ជាង យូ (Jiang Yu) ​អ្នក​នាំ​ពាក្យក្រសួង​ការ​បរទេស​ ហៅ​ភេរវកម្ម​ថា ជា​សត្រូវ​របស់​សាធារណ:នៃ​សហគមន៍​អន្ដរជាតិ។​ លោកស្រី​ថ្លែង​ថា ​ប្រទេស​ចិន​បាន​ប្រឆាំង​នឹង​ភេរវកម្ម​គ្រប់​ប្រភេទ ហើយ​ចូល​រួម​ចំណែកយ៉ាង​សកម្ម​ក្នុង​កិច្ច​ខិត​ខំ​ប្រឹង​ប្រែង​ប្រឆាំង​នឹង​ពួក​ភេរវជន។

លោកស្រី​ ជាង​ ប្រាប់​ក្រុមអ្នក​យក​ព័ត៌មាន​ថា​ ចិន​ក៏​ជា​ប្រទេស​រង​គ្រោះដោយសារ​សកម្មភាព​ជា​ច្រើន​របស់​ពួក​ភេរវជន​ដែរ ​ក៏​ប៉ុន្ដែ​លោកស្រី​មិន​បាន​ឲ្យ​សេចក្ដី​លម្អិត​ទេ។​ កាល​ពី​ប៉ុន្មាន​ឆ្នាំ​ថ្មីៗ​នេះ​ រដ្ឋាភិបាល​ចិន​ បាន​ទាញ​ហេតុផល​នៃ​ការ​បង្ក្រាប​នៅតំបន់​ ស្ស៊ីនជាង (Xinjiang) ​ភាគ​ខាង​លិច​ ដែល​មាន​ជនកាន់​សាសនា​ឥស្លាម​ភាគ​ច្រើន​រស់​នៅ​ ថា​ការ​បង្ក្រាបទាំង​នោះ​មាន​ទិសដៅ​ប្រឆាំង​នឹង​បណ្ដាញភេរវជន។

នៅ​ថ្ងៃ​អង្គារ​លោកស្រី ជាង​ មិន​បាន​ឆ្លើយ​តប​ដោយ​ត្រង់នឹង​សំណួរមួយ​អំពី​ថា​តើ​រដ្ឋាភិបាល​ទី​ក្រុង​ប៉េកាំង​យល់​ថា​ មាន​ការ​គម្រាម​ភេរវកម្ម​ធំ​ណា​មួយ​ចេញ​ពី​ខាង​ក្នុង​ឬ​ខាង​ក្រៅ​ប្រទេសដែរ​ឬទេ?។

អ្នក​នាំ​ពាក្យ​ក្រសួង​ការ​បរទេស​រូប​នេះ​ ក៏​និយាយដែរ​ថា​ ចិន​គាំ​ទ្រប្រទេស​ប៉ាគីស្ថាន​យ៉ាង​រឹង​មាំ។ ​លោក​ស្រី​និយាយ​ថា​៖

«ប្រទេស​ចិន​ជឿ​ថា​ រដ្ឋាភិបាល​ប៉ាគីស្ថាន​ សម្រេច​ចិត្ដ​យ៉ាង​មាំទាំ ហើយនឹង​យ៉ាង​សកម្មនៅ​ក្នុង​ការ​ប្រយុទ្ធ​របស់​ខ្លួន​ប្រឆាំង​នឹង​ភេរវកម្ម​ ហើយ​បាន​ធ្វើ​វិភាគទាន​យ៉ាង​សំខាន់​នៅ​ក្នុង​កិច្ច​ខំ​ប្រឹង​ប្រែងរបស់​អន្ដរជាតិ​ប្រឆាំង​ភេរវជន»។

នៅ​ក្រុង​ប៉េកាំង​ជន​ជាតិ​ចិន​ មាន​អារម្មណ៍​ចម្រុះ​គ្នា​ អំពី​ការ​ស្លាប់​របស់​អូសាម៉ា ប៊ិន ឡាដិន។​ អ្នក​ខ្លះ​ដូច​ជា​បុរស​នេះ​ ដែល​បដិសេធ​មិន​ព្រមប្រាប់​ឈ្មោះ​របស់​គាត់​ ស្វាគម​ន៍​ព័ត៌មាន​នោះ។ ​គាត់​និយាយ​ថា ​គាត់​គិត​ថា​ ការ​ស្លាប់​នេះ​ជា​ការ​ល្អ​មួយ​ ពីព្រោះ​បើ​មាន​ភេរវជន​តិច​ជាង​មុន​ នោះ​នឹង​មាន​សន្ដិភាពច្រើន​ឡើង​ទៀត។គាត់​និយាយថា​ សន្ដិភាព​ជា​អ្វី​ដែល​មនុស្ស​សាមញ្ញ​ធម្មតា​ដូច​គាត់​ចង់​បាន។

លោក លី​ ដែល​ជា​ពាណិជ្ជករ​ម្នាក់​មាន​មតិ​ខុស​ពី​នេះ។ ​លោក​និយាយ​ថា​ តាម​ការ​គិត​របស់​លោក​ជា​ជន​ជាតិ​ចិន​ គ្មាន​នរណា​ដែល​ត្រូវ​ទាំង​អស់​ឬ​ខុស​ទាំង​អស់​នោះ​ទេ​ រាប់​បញ្ចូល​ទាំង​ប៊ិន ឡាដិន​ និង​សហរដ្ឋអាមេរិក​ផង។លោក​និយាយ​ថា​៖

«បើ​ សហរដ្ឋ​អាមេរិក​តាំង​ខ្លួន​ឯង​ថា​ ជា​ភ្នាក់ងារ​ប៉ូលីស​នៃ​ពិភពលោក​ វា​ជា​រឿង​ធម្មតា​ទេ ​ដែល​មនុស្ស​នៅ​ក្នុង​ប្រទេស​ដទៃ​ទៀត​នឹង​ចង់យក​សហរដ្ឋអាមេរិក​ធ្វើ​ជាមុខ​សញ្ញា»។

ក្រុម​សកម្មជន​ចិន​នៅ​ក្រៅ​ប្រទេស​សង្ស័យ​ អំពី​ប្រតិកម្ម​ជា​វិជ្ជមាន​របស់​រដ្ឋាភិបាល​ចិន​ចំពោះ​ការ​ស្លាប់​របស់​ឡាដិន។​ លោក​ បប ហ្វ៊ូ (Bob ​Fu) ​ជា​បុគ្គលិក​នៃ​អង្គការ​ ChinaAid ដែល​ជា​អង្គការ​ឃ្លាំ​មើល​ការ​ប្រព្រឹត្ដទៅ​លើ​អ្នក​កាន់​សាសនា​គ្រីស្ដ​នៅ​ប្រទេស​ចិន។ ​លោក​និយាយ​ថា៖

«ខ្ញុំគិតថា​ រដ្ឋាភិបាល​ចិន​ពិត​ជា​មិន​យក​ចិត្ដ​ទុក​ដាក់​ថាតើ​ប៊ិន ឡាដិន​ ស្លាប់​ឬ​រស់​ទេ។​ តាម​ពិត​ទៅ​ខ្ញុំ​គិត​ថា​ គំនិត​របស់​ក្រុម​មេដឹកនាំ​កំពូល​ចិន​ គឺ​ថា​ ពួក​គេ​ចង់​ឃើញ​ប៊ិន​ ឡាដិន​ នៅ​រស់​ ដើម្បី​ឲ្យ​ សហរដ្ឋអាមេរិក​ ជាប់​រវល់​នឹង​ការ​តាម​រក​ពួក​អាល់ខេដា​ ហើយ​នឹង​ក្រុម​របស់​ប៊ិន​ឡាដិន​ ហើយ​មិន​ផ្ដោតទៅ​លើ​ជនជាតិ​ចិន»។

លោក​ ហ្វ៊ូ និយាយថា​លោក​គិត​ថា​ រដ្ឋាភិបាល​ចិន​ព្រួយ​បារម្ភ​អំពី​ស្ថិរ​ភាព​នៅ​ក្នុង​ស្រុក​ជា​ជាង​ការ​គម្រាម​របស់​ភេរវជន​ពី​ខាង​ក្រៅ​នោះ៕

ប្រែ​សម្រួល​ដោយ កង ស៊ីវន

XS
SM
MD
LG