ភ្ជាប់​ទៅ​គេហទំព័រ​ទាក់ទង

ពលរដ្ឋ​នៅ​ភ្នំពេញ​បង្ហាញ​មតិ​ចម្រុះ​ចំពោះ​វ៉ាក់សាំង​ចិន Sinopharm


ឯកអគ្គរដ្ឋទូតចិនប្រចាំកម្ពុជាលោក Wang Wentian បានប្រគល់វ៉ាក់សាំងបង្ការជំងឺកូវីដ១៩ របស់ក្រុមហ៊ុនឱសថចិន Sinopharm ដល់នាយករដ្ឋមន្ត្រីកម្ពុជាលោក ហ៊ុន សែន នៅអាកាសយានដ្ឋានអន្តរជាតិភ្នំពេញ កាលពីថ្ងៃអាទិត្យ ទី៧ ខែកុម្ភៈ ឆ្នាំ២០២១។

វ៉ាក់​សាំង Sinopharm បង្ការ​ជំងឺ​កូវីដ​១៩​ ផលិត​ដោយ​ក្រុម​ហ៊ុនរដ្ឋ​របស់​ចិន​ បាន​ដឹក​មក​កម្ពុជា​ចំនួន​ ៦០​ ម៉ឺន​ដូស​ នា​រសៀល​ថ្ងៃ​អាទិត្យ​ម្សិលមិញ​ ដែល​ទាក់ទាញ​នូវ​ចំណាប់​អារម្មណ៍​ចម្រុះ​ពី​មហាជន​តាម​ដង​ផ្លូវ​ក្នុង​រាជធានី​ភ្នំពេញ។

លោកឯកអគ្គរដ្ឋ​ទូត​ចិន​ប្រចាំ​កម្ពុជា Wang Wentian បាន​ឲ្យ​ដឹង​ថា ​ជំនួយវ៉ាក់សាំង​របស់​ចិន​មក​កម្ពុជា​ជាង​សរុប​ ១ លាន​ដូស​នេះ ​រំពឹង​ថា​នឹង​រឹតចំណង​មិត្តភាព​អមតៈ​រវាង​ខ្មែរ​និង​ចិន​ឲ្យ​កាន់​តែ​រឹង​មាំ។​

ថ្លែង​នៅ​ចំពោះ​មុខ​យន្តហោះ​ដឹកជញ្ជូន​ខ្នាត​យក្ស​របស់​យោធា​ចិន ដែល​បាន​ដឹក​ជញ្ជូន​វ៉ាក់សាំង​Sinopharm មក​ដល់​កាល​ពី​វេលា​បាក់​រសៀល​ថ្ងៃ​អាទិត្យ​ នៅ​អាកាសយាន​ដ្ឋានអន្តរជាតិ​ភ្នំពេញ លោក​ Wang Wentian​ ឯក​អគ្គរដ្ឋ​ទូត​ចិនប្រចាំ​កម្ពុជា​ថ្លែង​ថា៖ «ប្រទេសចិន​នឹង​បន្ត​ពង្រឹង​កិច្ច​សហប្រតិបត្តិការក្នុងការ​ទប់ស្កាត់​ជំងឺ​កូវីដ​ជាមួយ​ប្រទេស​កម្ពុជា​ ដែល​ជា​មិត្ត​ដែក​ថែប​ជាមួយ​គ្នា​នឹង​បន្ត​ផ្តល់​ជំនួយ​ទៅ​តាម​លទ្ធភាព​ ដែល​អាច​ធ្វើទៅ​បាន​ជូន​ដល់​មិត្ត​កម្ពុជា​រហូត​ដល់​ភាគី​មិត្ត​អាច​យក​ឈ្នះ​ក្នុង​ការ​ប្រយុទ្ធ​ប្រឆាំង​នឹង​ជំងឺ​វីរុស​កូវីដ​១៩​ មួយ​នេះ»។​

វ៉ាក់សាំង ​៦០ ​ម៉ឺន​ដូស​នេះ​ត្រូវ​បាន​បែង​ចែក​ទៅ​ក្រសួង​សុខាភិបាល​និង​ក្រសួង​ការពារ​ជាតិ។​

ការ​ចាក់​វ៉ាក់សាំង​ដំណាក់​កាលដំបូង​នឹង​ចាប់​ផ្តើម​ នៅ​ថ្ងៃ​ពុធ ​ទី​ ១០​ ខែ​កុម្ភៈ​នេះ ដល់​ឥស្សរជន​ជាន់​ខ្ពស់​និង​អ្នក​សារព័ត៌មាន​តាម​ការ​ស្ម័គ្រ​ចិត្ត។

ការ​ចាក់​ដំបូង​នេះ​ធ្វើ​ឡើង​នៅ​មន្ទីរ​ពេទ្យ​រដ្ឋ​ចំនួន ​៤​ គឺ​មន្ទីរ​ពេទ្យកាល់ម៉ែត ​មន្ទីរ​ពេទ្យព្រះ​អង្គឌួង ​មន្ទីរ​ពេទ្យ​មិត្តភាព​ខ្មែរ-សូវៀត ​និង​មន្ទីរ​ពេទ្យ​កុមារ​ជាតិ។​ នេះ​បើ​យោង​តាម​ក្រសួង​សុខាភិបាល។​

ដើម្បី​ឲ្យវ៉ាក់​សាំង​នេះ​មាន​ប្រសិទ្ធភាព​ក្នុង​ការ​បញ្ចប់​ការ​រីករាលដាល​នៃ​ជំងឺ​កូវីដ​១៩ ទូទាំង​ប្រទេស យ៉ាង​ហោច​ណាស់​ពលរដ្ឋ ៥០​ ទៅ ​៨០ ​ភាគរយ ​គួរ​តែ​ត្រូវ​ទទួល​បាន​វ៉ាក់សាំងនេះ។ នេះ​បើ​យោង​តាម​មជ្ឈមណ្ឌល​ស្រាវជ្រាវ​វេជ្ជសាស្ត្រ​ Cleveland Clinic នៅ​រដ្ឋ​ Ohio នៃ​សហរដ្ឋ​អាមេរិក។

លោក​នាយក​រដ្ឋមន្ត្រី​ ហ៊ុន សែន​ មាន​ប្រសាសន៍ថា អង្គការ​សុខភាព​ពិភព​លោក​ បាន​ផ្តល់​យោបល់​ដូចគ្នា​ដល់​រដ្ឋាភិបាល​កម្ពុជា។

នៅ​ក្នុង​សន្និសីទ​សារព័ត៌មាន​ក្រោយ​ទទួល​អំណោយ​វ៉ាក់សាំងលោក​នាយក​រដ្ឋមន្ត្រី​ ហ៊ុន សែន ​ថ្លែង​ថា បើ​គិត​ពី​បុរេ​លក្ខខណ្ឌ​ មាន​ពលរដ្ឋ​ប្រមាណ​ ១០ ​លាន​នាក់​ត្រូវ​តម្រូវ​ឱ្យ​ចាក់​វ៉ាក់សាំង។

នាយក​រដ្ឋមន្ត្រី​រូប​នេះ​បាន​ថ្លែង​ថា​ មាន ​១១​ លាន​ដូស​នៃ​វ៉ាក់សាំង​ជា​ជំនួយ​ដែល​កម្ពុជា​ត្រូវ​បាន​ធានា​ជូន​ពី​ដៃគូ​នានា​រួច​ហើយ​ និង​ត្រូវ​ចំណាយ​ថវិកា​រដ្ឋ​និង​ថវិកា​កៀរគរ​ពី​សាធារណជន​ទិញ​ចំនួន​ ៩​ លាន​ដូស​ផ្សេងទៀត។​

កាល​ពី​ខែ​មករា អង្គការ​សុខភាព​ពិភព​លោក​ធ្លាប់​លើក​ឡើង​ថា ​វត្តមាន​វ៉ាក់សាំង​បាន​នាំ​ឲ្យ​មាន​ក្តី​សង្ឃឹម​ក្នុង​ការ​បញ្ចប់​ការ​រីករាលដា​នៃ​ជំងឺ​កូវីដ​១៩​ ប៉ុន្តែ​ក៏​បង្ក​ឲ្យ​មានវិសមភាព​រវាង​ប្រទេស​អ្នក​មាន​និង​ប្រទេស​អ្នក​ក្រ​ផងដែរ​ ក្នុង​ការ​ដណ្តើម​ទិញ​វ៉ាក់សាំង។​

ទិដ្ឋភាព​កម្ពុជា​ត្រៀម​ទទួល​វ៉ាក់សាំង​បង្ការ​ជំងឺ​កូវីដ​១៩​ SARs-CoV-2 Vaccine (Sinopharm) មកពីប្រទេស​ចិន​ នៅ​អាកាស​យាន​ដ្ឋាន​អន្តរជាតិ​ភ្នំពេញ​ ថ្ងៃទី៧​ ខែ​កុម្ភៈ​ ឆ្នាំ​២០២១​។ (ហ៊ាន សុជាតា/វីអូអេ)
ទិដ្ឋភាព​កម្ពុជា​ត្រៀម​ទទួល​វ៉ាក់សាំង​បង្ការ​ជំងឺ​កូវីដ​១៩​ SARs-CoV-2 Vaccine (Sinopharm) មកពីប្រទេស​ចិន​ នៅ​អាកាស​យាន​ដ្ឋាន​អន្តរជាតិ​ភ្នំពេញ​ ថ្ងៃទី៧​ ខែ​កុម្ភៈ​ ឆ្នាំ​២០២១​។ (ហ៊ាន សុជាតា/វីអូអេ)

បើ​តាម​ការ​បញ្ជាក់​របស់​អ្នកស្រី​ ឱ វណ្ណឌីន ​អ្នកនាំ​ពាក្យ​ក្រសួង​សុខាភិបាល​នា​ពេល​កន្លង​មក ​អ្នក​ដែលមិន​អាច​ចាក់​វ៉ាក់សាំង​នេះ​បាន​មាន​ដូចជា​អ្នក​ដែល​ធ្លាប់​មាន​ប្រវត្តិ​ប្រតិកម្ម​នឹង​វ៉ាក់​សាំង​ផ្សេងៗ​ អ្នក​មាន​បញ្ហា​ផ្លូវ​ដង្ហើម ​អ្នក​ជំងឺ​សើរ​ស្បែក ​អ្នកមាន​ជំងឺ​រ៉ាំរ៉ៃ និងជំងឺ​ដំណពូជ​ ស្ត្រី​មាន​ផ្ទៃ​ពោះ​ និង​អ្នក​ធ្លាប់​ឆ្លង​ជំងឺ​កូវីដ១៩​ ជា​ដើម។​

ពលរដ្ឋ​នៅ​តាម​ដងមហាវិថី​សហព័ន្ធរុស្ស៊ី​ស្រប​អាកាសយានដ្ឋាន​អន្តរជាតិ​ភ្នំពេញ​ ដែល​ក្បួន​ដឹក​វ៉ាក់សាំង​ឆ្លង​កាត់​បង្ហាញ​មតិ​ចម្រុះ​ជុំវិញ​ការ​ទទួល​វ៉ាក់សាំង​ជា​លើក​ដំបូង​ពី​ប្រទេស​ចិន។

លោក ពេជ្រ​ សំរឹទ្ធ​ ជា​បុគ្គលិក​សន្តិសុខ​ក្រុមហ៊ុន​ឯកជន កំពុង​តាមដាន​ព័ត៌មាន​ផ្សាយ​ផ្ទាល់​អំពី​ការ​មក​ដល់​នៃ​វ៉ាក់សាំង​បង្ការ​ជំងឺ​កូវីដ​១៩ ​នៅ​លើ​ទូរស័ព្ទ​ដៃ​របស់​លោក។

លោក​ថា​ លោក​នឹង​ចាក់​វ៉ាក់សាំងចិន​នេះ ​បើ​រដ្ឋាភិបាល​ស្នើ​ឲ្យ​ធ្វើ។

លោក​ប្រាប់​វីអូអេ​ថា៖« បើ​សិន​ជា​ទូទៅ​នៅ​សង្គម​គេ​ឲ្យ​យើង​ទៅ​ យើង​បដិសេធ​គេ​ ក៏​មិន​កើត​ដែរ»។​

លោក​បន្ត​ថា៖ «ព្រោះ​ថា​ជីវិត​យើង​មិន​មែន​ចេះ​តែ​លេង​សើច​ទេ ​ព្រោះ​សង្គម​គ្រួសារ​យើង​ពឹង​ផ្អែក​មក​លើ​យើង។ ពេល​មាន​បញ្ហា​អី​ យើង​ក៏​យ៉ាប់​ដែរ។ តែ​បើ​ល្អ​ ថ្នាក់​លើ​គាត់​អនុវត្ត​ហើយ អត់​បញ្ហា​ យើង​ទៅ​តាម​ហ្នឹង​ដែរ​ទៅ»។

លោក ទន់​ រ៉ាវុធ​ វ័យ​ ៣០ ​ឆ្នាំ ​អ្នក​ដឹកទឹក​សុទ្ធលក់​តាម​រទេះ​ ជា​អ្នក​រស់​នៅ​សង្កាត់​ពោធិ៍សែនជ័យ។​

កំពុង​ឈរ​អែប​រទេះ​របស់​លោក​ ដើម្បី​ទន្ទឹង​រង់​ចាំ​មើល​ក្បួន​ដឹក​វ៉ាក់​សាំង​ពីព្រលាន​យន្ត​ហោះ​ លោក ​ រ៉ាវុធ ប្រាប់​វីអូអេ​ថា៖​ «បើ​សិន​គេ​ឲ្យ​ទៅ​ខ្ញុំ​ស្ម័គ្រ​ចិត្ត​ទៅ​ចាក់ ព្រោះ​ខ្ញុំ​ចេះ​តែ​ខ្លាច​ដែរ​ ព្រោះ​មេរោគ​ហ្នឹង​យើង​មើល​អត់​ឃើញ​ចឹង។ ធម្មតា​តែ​គេ​យក​មក ​គឺ​ដើម្បី​ជួយ​កាត់​បន្ថយ​ជំងឺ​ហ្នឹង​ហើយ»។

ខណៈ​កំពុង​រុញ​រទេះ​បំពេ​កូនស្រី​តូច​របស់​ខ្លួន​អ្នកស្រី​ ដឿន គឹមដឿន ​បង្ហាញ​ក្តី​សង្ឃឹម​ចំពោះ​វ៉ាក់សាំង​នេះ​ថា៖ «មាន​អារម្មណ៍​ថា​អរ​ចឹង​ទៅ​ ក្រែង​លោ​បាន​ចាក់​មក​យើង​ដែរ។​ គេ​ចាក់​យើង​ក៏​ចាក់​ដែរ​ទៅ។ នឹក​ឃើញ​ថា​បាន​ចាក់​ទៅ​ការពារ យើង​ចេញ​លក់ ​ចេញ​ដូរ​រកស៊ី​យើង​កក់​ក្តៅ​ចិត្ត​ដែរ ព្រោះ​រាល់​ថ្ងៃ យើង​លក់​ដូរ​អាប់​លុយ​អាប់​អី​យើង​ភ័យ​ខ្លាច​ដែរ»។

«ខ្ញុំ​អត់​ដឹង​ថា​ មាន​រឿង​អី​គ្រាន់​តែ​ថា​ឃើញ​ប៉ូលីស​ទាហាន​ច្រើន។ ពេល​សួរ​ថា​ គេ​ហែ​ក្បួន​មែន​គាត់​ថា​ មិនមែន​ហែ​ក្បួន​ទេ។​ ដឹក​វ៉ាក់​សាំង​ចូល​មក។​ ថា​មក​ពី​ស្រុក​ក្រៅ​គេ​ជំនួយ​មក​ចឹង»។

នេះ​ជា​ការ​លើក​ឡើង​របស់​អ្នកស្រី​ ដឿន​ គឹម​ដឿន​ វ័យ​ ២៩ ​ឆ្នាំ ​អ្នក​លក់​តុក្កតា​ចម្រុះ​ពណ៌​នៅ​ចម្ងាយ​ប្រមាណ​ជិត​មួយ​គីឡូម៉ែត​ពី​ព្រលាន​យន្តហោះ។​

វ៉ាក់សាំង​ Sinopharm មាន​ប្រសិទ្ធភាព​ខ្ពស់​តែ​ចំពោះ​មនុស្ស​មាន​អាយុ​ចន្លោះ​ ១៨ ដល់ ​៥៩ ​ឆ្នាំ​ប៉ុណ្ណោះ។ នេះ​បើ​យោង​តាម​ការ​ប្រកាស​របស់​លោក ហ៊ុន សែន។​

វ៉ាក់សាំង ​Sinopharm មក​ពី​ប្រទេស​ចិន​នេះ​មាន​អត្រា​ប្រសិទ្ធភាព ៧៩,៣% ​ក្នុង​ការ​ប្រយុទ្ធប្រឆាំង​ជំងឺ​កូវីដ​១៩។ ក៏ប៉ុន្តែ​ វ៉ាក់​សាំង​នេះ​មិន​ទាន់​ត្រូវ​បាន​ទទួលស្គាល់​ដោយ​អង្គការ​សុខភាព​ពិភពលោក​នៅឡើយ​ទេ។​

លោក ពេជ្រ​ សំរឹទ្ធ​ ជា​បុគ្គលិក​សន្តិសុខ​ក្រុមហ៊ុន​ឯកជននៅរាជធានីភ្នំពេញ។
លោក ពេជ្រ​ សំរឹទ្ធ​ ជា​បុគ្គលិក​សន្តិសុខ​ក្រុមហ៊ុន​ឯកជននៅរាជធានីភ្នំពេញ។


​អ្នកស្រី​ ដឿន​ គឹម​ដឿន​ វ័យ​២៩​ឆ្នាំ​ អ្នក​លក់​តុក្កតា​ចម្រុះ​ពណ៌នៅរាជធានីភ្នំពេញ។
​អ្នកស្រី​ ដឿន​ គឹម​ដឿន​ វ័យ​២៩​ឆ្នាំ​ អ្នក​លក់​តុក្កតា​ចម្រុះ​ពណ៌នៅរាជធានីភ្នំពេញ។

លោក ហ៊ុន សែន​ ទើប​ផ្លាស់ប្ដូរ​គម្រោង​មិន​ចាក់​វ៉ាក់សាំង​ Sinopharm កាល​ពី​ថ្ងៃ​សុក្រ​ ដោយ​លើក​ហេតុផល​ថា​ លោក​ហួស​អាយុ ដែល​អាច​ចាក់​វ៉ាក់សាំង​នេះ​បាន។

លោក ​ប៊ុន​ សុវណ្ណរិទ្ធ​ វ័យ​ ៣០ ​ឆ្នាំ ​ជា​អ្នក​បើក​ម៉ូតូ​កង់​បី​មួយ​រូប និយាយ​ថា​ លោក​ហ៊ាន​ចាក់​តែវ៉ាក់​សាំង​ណា​ ដែល​ទទួល​ស្គាល់​ដោយ​អង្គ​ការ​សុខ​ភាព​ពិភព​លោក​តែ​ប៉ុណ្ណោះ។

«ខ្ញុំ​គ្មាន​គ​ម្រោង​ទៅ​ចាក់​វ៉ាក់សាំង​ហ្នឹង​ទេ។ វ៉ាក់សាំង​ហ្នឹង​អង្គការ​សុខភាព​ពិភពលោក​គេ​អត់​ទាន់​ទទួល​ស្គាល់​ផង។ លក្ខណៈ​ថា​យើង​អត់​មាន​ទំនុក​ចិត្ត​លើ​វ៉ាក់សាំង​ហ្នឹង»។​

លោក​ថា លោក​សុខចិត្ត​ចំណាយ​ថវិកា​ផ្ទាល់​ខ្លួន​ដើម្បី​ចាក់​វ៉ាក់សាំង​ឲ្យ​តែ​វ៉ាក់សាំង​នោះ​មាន​ការ​ទទួលស្គាល់​ពី​អង្គការ​សុខភាព​ពិភព​លោក។

​ពលរដ្ឋ​រស់​នៅ​ក្នុង​ទី​ក្រុង​ភ្នំពេញ​ម្នាក់​ទៀត​លោក យឹម វីរៈ ​ វ័យ​ ៣៤​ ឆ្នាំ​ជឿជាក់​លើ​រដ្ឋ​អំណាចកម្ពុជា​ក្នុង​ការ​រក​វ៉ាក់​សាំង​មាន​គុណភាព​ មក​ចាក់​ជូន​ពលរដ្ឋ​ដូច​រូប​លោក។

«បើ​រដ្ឋាភិបាល​គេ​ឲ្យ​យើង​ចាក់​អា​ណា​យើង​ចាក់​អា​ហ្នឹង​ទៅ។ បើ​វា​មាន​បញ្ហា​ដល់​ជីវិត​ គេ​មិន​យក​ឲ្យ​យើង​ចាក់​ទេ»។​

លោក​ យឹម វីរៈ​ បាន​និយាយ​ថា​ ២០២០​ គឺ​ជា​ឆ្នាំ​ដែល​រូប​លោក​ និង​ពលរដ្ឋដទៃ​ទៀត​ជួប​ប្រទះ​ការ​លំបាក​ក្នុងជីវភាព។​ លោក​រំពឹង​ថា​ ជាមួយ​នឹង​វត្តមាន​វ៉ាក់សាំង​សេដ្ឋកិច្ច​គ្រួសារ​របស់​លោក​នៅ​ឆ្នាំ​ ២០២១​ នេះ​នឹង​បាន​ប្រសើរ​ឡើង​វិញ៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG