ភ្ជាប់​ទៅ​គេហទំព័រ​ទាក់ទង

ខ្សែ​ភាពយន្ត​«នណា​សម្លាប់​ជា​ វិជ្ជា?»​គ្រោង​បញ្ចាំង​នៅ​កម្ពុជា


នេះ​ជា​ឈុត​មួយ​នៅ​ក្នុង​ភាព​យន្ត​ឯកសារ​«អ្នក​ណា​សម្លាប់​ជា​វិជ្ជា?» លោក​ ជា វិជ្ជា​ត្រូវ​គេ​ធ្វើ​ឃាត​នៅ​ថ្ងៃ​ទី​២២​ខែ​មករា​ឆ្នាំ​២០០៤​នៅ​ក្នុង​ទី​ ក្រុង​ភ្នំពេញ។

លោក​រ៉ុង ឈុន​ ​ប្រធាន​សហភាព​សហជីព​ការងារ​កម្ពុជា​ ​គ្រោង​នឹង​ដាក់​បញ្ចាំង​ខ្សែ​ភាពយន្ត​ដ៏​រសើប​មួយ​ដែល​មាន​ចំណង​ជើង​ថា​ «នណា​សម្លាប់​លោក​ជាវិជ្ជា?» ​នៅ​សួន​ប្រជា​ធិបតេយ្យ​ ​នៅ​សប្ដាហ៍​ក្រោយ​នេះ។ ​ផែន​ការ​បញ្ចាំង​ខ្សែ​ភាពយន្ត​ជា​សារធារណៈ​នេះ​បាន​កើត​ឡើង​ក្រោយ​ពី​សាលាក្រុង​ភ្នំពេញ​បាន​បើក​សម្ពោធ​ឲ្យ​ប្រើ​ប្រាស់​ជា​ផ្លូវ​ការ​នូវ​ទីលាន​ប្រជា​ធិបតេយ្យ ​ដើម្បី​ឲ្យ​ប្រជា​ពលរដ្ឋ​សម្តែង​មតិ​ដោយ​សេរី។​ ក៏​ប៉ុន្តែមន្ត្រី​រដ្ឋា​ភិបាល​បាន​និយាយ​ថា ​មិន​អនុញ្ញាត​ឲ្យ​បញ្ចាំង​ខ្សែ​ភាពយន្ត​នេះ​ទេ។

លោក​រ៉ុង ឈុន ​ប្រធាន​សហភាព​សហជីព​ការងារ​កម្ពុជា​ និង​ជា​ប្រធាន​សមាគម​គ្រូ​បង្រៀន​ឯករាជ្យកម្ពុជា​ ​នៅ​ថ្ងៃអាទិត្យ​នេះ​ ​បាន​មាន​ប្រសាសន៍​ថា​ ​នៅ​ដើម​សប្តាហ៍​ក្រោយ​នេះ​ ​លោក​នឹង​ដឹកនាំ​ការ​ដាក់​បញ្ចាំង​ខ្សែ​ភាពយន្ត​ដ៏​រសើប​មួយ​ ដែល​មាន​ចំណង​ជើង​ថា​ ​«នរណា​សម្លាប់​លោក​ជា វិជ្ជា?»​ ​នៅ​សួន​ប្រជា​ធិបតេយ្យ។

សួន​ប្រជា​ធិបតេយ្យ ​ដែល​មាន​ទីតាំង​នៅ​ក្នុង​សង្កាត់​វត្តភ្នំ​ ​ខាង​ក្រោយ​ស្ថានទូត​សហ​រដ្ឋ​អាមេរិក ​ត្រូវ​បាន​សាលាក្រុង​ភ្នំពេញបើក​សម្ពោធ​ឲ្យ​ប្រើប្រាស់​កាល​ពី​ថ្ងៃ​ព្រហស្បតិ៍​នេះដើម្បី​ឲ្យ​ប្រជា​ពលរដ្ឋសម្តែង​មតិ​ដោយ​សេរី ​និង​ធ្វើ​ការ​ជួប​ប្រជុំ​ដើម្បី​ប្រឆាំង​ជំទាស់​ការ​ជិះ​ជាន់​ដោយ​អយុត្តិ​ធម៌​នោះ។

ការ​តវ៉ា​សម្តែង​មតិនេះ​មិន​ចាំបាច់​សុំ​ច្បាប់​ទៅ​សាលា​ក្រុង​ទេ​ ​គឺ​គ្រាន់​តែ​អ្នក​ជួប​ប្រជុំ​គ្នា​នោះ​បាន​ជួន​ដំណឹង​ទៅ​សាលាក្រុង​តែ​ប៉ុណ្ណោះ។

លោក​រ៉ុង ឈុន​ ​បាន​មាន​ប្រសាសន៍​ថា​ ​ការ​ដាក់​បញ្ចាំង​ខ្សែ​ភាពយន្ត​ «នរណា​សម្លាប់​ លោក​ជា វិជ្ជា?»​នេះគឺ​យើង​ចង់​ឲ្យ​សាធារណជនបាន​ដឹង​អំពី​ព្រឹត្តិ​ការណ៍​ពិត​ប្រាកដ​ថា​ នរណា​ជា​ឃាដករ​សម្លាប់​លោក​ជា វិជ្ជា?

«ការ​បញ្ចាំង​នេះ​ក្នុង​គោល​បំណង​ដើម្បី​ឲ្យ​សាធារណ​ជន​បាន​ទស្សនា​ ​យល់​អំពី​ព្រឹត្តិ​ការណ៍​ឃាដកម្ម​ទៅ​លើ​រូប​លោក​ជា វិជ្ជា​ ​អតីត​ប្រធាន​សហជីព​សេរី​កម្មករ​នៃ​ព្រះ​រាជាណាចក្រ​កម្ពុជា»។

ខ្សែ​ភាពយន្ត​ ​ដែល​មាន​លក្ខណៈ​ជា​ឯកសារ​នេះ​ ​ត្រូវ​បាន​ផលិត​ឡើង​ដោយ​ផលិតករ​ជន​ជាតិ​អាមេរិក​មួយ​រូប​ ​ដែល​មាន​ឈ្មោះ​ថា​ ​ប្រែត​លីខក់។

ខ្សែ​ភាពយន្ត​នេះ​មាន​រយៈ​ពេល​ប្រមាណ​ជាង​៥០​នាទី​ ​ដែល​លោក​ប្រែតលីខក់​បាន​សម្ភាស​ជាមួយ​និង​លោក​ជា វិជ្ជា​ ​កាល​ពី​នៅ​រស់។

អត្ថន័យ​នៃ​ខ្សែ​ភាពយន្ត​នេះ​ទាំង​ស្រុង​បាន​បង្ហាញ​ឲ្យ​សាធារណ​ជន​ដឹង​ថា​ ​នរណា​ជា ឃាដករ​ពិត​ប្រាកដ​ក្នុង​ការ​បាញ់​សម្លាប់​លោក​ជា វិជ្ជា​នោះ។

លោក​ប៉ា សុជាតិវង្ស​ ​អភិបាល​រង​ក្រុងភ្នំពេញ​ ​បាន​និយាយ​ថា​ ​លោក​អនុញ្ញាត​ឲ្យ​តែ​កន្លែង​ទីលាន​ប្រជា​ធិបតេយ្យ​តែប៉ុណ្ណោះ​ ​ក៏​ប៉ុន្តែ​ខ្លឹមសារ​នៃ​ខ្សែ​ភាពយន្ត​នេះ​ ​លោក​មិន​ហ៊ាន​សម្រេច​ទេ។

«បញ្ហា​នេះ​ជា​ច្រើន​លើក​ច្រើន​សារ​ ​ហើយ​គោល​ការណ៍​ ​គេ​មិន​ឲ្យ​យក​ផ្សាយ​ជា​សាធារណៈ​ទេ។ ​ប៉ុន្តែ​បើ​សិន​គាត់​យល់​ថា​ ​គាត់​ចង់​អា​ហ្នឹង​ ​គាត់​ត្រូវ​ទទួល​ខុស​ត្រូវ​តាម​ផ្លូវ​ច្បាប់​ចុះ។ ​ខ្ញុំ​មិន​ដឹង​ថា​ ​ខុស​ ​មិន​ដឹង​ថា​ត្រូវ​ទេ​ ​ព្រោះ​ខ្ញុំ​អត់​ទទួល​ខុស​ត្រូវ​លើ​ខ្លឹមសារ​ទេ។ ​ខ្ញុំ​ទទួល​ខុស​ត្រូវ​តែ​រឿង​ទីតាំង​ហ្នឹង​ទេ»។

លោក​ខៀវ សុភ័គ ​អ្នក​នាំ​ពាក្យ​ក្រសួង​មហា​ផ្ទៃ​បាន​មាន​ប្រសាសន៍​ថា​ ​ប្រសិន​បើ​មាន​ការ​បញ្ចាំង​ខ្សែ​ភាពយន្ត ​ដែល​បាន​បង្កើត​ឡើង​ដោយ​លួចលាក់​ ​នោះ​អាជ្ញាធរ​មិន​អនុញ្ញាត​ឲ្យ​ទេ។​ ហើយ​គួរ​តែ​បញ្ចាំង​ដោយ​លួច​លាក់។

លោក​បាន​មាន​ប្រសាសន៍​ថា​ ​អាជ្ញាធរ​នឹង​បង្រ្កាប​ ​ប្រសិន​ណា​លោក​រ៉ុង ឈុន​ ​ប៉ុន​ប៉ង​ដាក់​បញ្ចាំង​ខ្សែ​ភាពយន្ត​នេះ។

«ជា​រួម​ ​ខ្ញុំ​យល់​ថា​ ​ខ្សែ​ភាពយន្ត​នេះ​គឺ​ថត​ដោយ​លួចលាក់។ ​ដូច្នេះ​ខ្ញុំ​ក៏​សូម​ស្នើ​ឲ្យ​គាត់​បញ្ចាំង​ដោយ​លូចលាក់​ចុះ»។

លោក​ជា មុន្នី ​ប្រធាន​សហជីព​សេរីកម្មករ​នៃ​ព្រះរាជាណាចក្រ​កម្ពុជា ​និង​ត្រូវ​ជា​ប្អូន​ប្រុស​បង្កើត​របស់​សព​លោក​ជា វិជ្ជា​ ​បាន​មាន​ប្រសាសន៍​ថា​ ​លោក​នឹង​ចូល​រួម​ទស្សនា​ខ្សែ​ភាពយន្ត​នេះ​ដែរ។

លោក​ជា មុន្នី​បាន​អំពាវនាវ​ឲ្យ​ក្រុម​គ្រួសារ​ជន​រងគ្រោះ​ទាំងអស់​ ​ដែល​ត្រូវ​បាន​ឃាដករ​បាញ់​សម្លាប់​ដោយ​អយុត្តិ​ធម៌នោះ​ ​ចេញ​មក​ចូលរួម​ទស្សនា​ខ្សែ​ភាពយន្ត​ «នរណា​សម្លាប់​លោក​ជា វិជ្ជា?» នេះ។

«អ្នក​ណា​ ​ដែល​បាត់បង់​បងប្អូន​ ​ដែល​ត្រូវ​គេ​បាញ់សម្លាប់​ ​ហើយ​រក​ឃាដករ​មិន​ទាន់​ឃើញ​ ​ដូច​ជា​ ​ពិសិដ្ឋ​ ​ពីលីកា​ ​ព្រះសង្ឃ​សំ ប៊ុនធឿន​ ​លោកឱម​ រត្នសាឌី​ ​លោក​សុខ សេដ្ឋាមុនី​ ​នាងពៅ បញ្ញាពេជ្រ​ លោក​ធន់ ប៊ុនលី​ ​លោក​ឃឹម សំបូរ​ លោក​រស់ សុវណ្ណារ៉េត​ ​លោក​ហ៊ាង វុទ្ធី ​សូម​ចូល​ទៅ​មើល​រឿង​ឃាដកម្ម​ជា វិជ្ជា»។

លោក​ជា ​វិជ្ជា​ ​អតីត​មេ​ដឹកនាំ​សហជីព​សេរី​កម្មករ​ដ៏​ល្បីល្បាញ​ ​ត្រូវ​បាន​ឃាដករ​បាញ់​សម្លាប់​កាលពី​ខែ​មករា​ឆ្នាំ​២០០៤​ ​ហើយ​ក្រោយ​មក​រដ្ឋាភិបាល​បាន​ចាប់​លោក​សុខ សំអឿន​ និង​លោក​ប៊ន សំណាង​ដាក់ពន្ធនាគារ​ក្រោម​បទ​ចោទ​ប្រកាន់​ថា​ ​ជាប់​ពាក់​ព័ន្ធ​នឹង​ការ​បាញ់​សម្លាប់​លោក​ជា វិជ្ជា។

លោក​ប៊ន សំណាង ​និង​លោក​សុខ សំអឿន​ត្រូវ​បាន​ដោះ​លែង​ឲ្យ​មាន​សេរីភាព​ឡើង​វិញ​ ​បន្ទាប់​ពី​ជាប់​ពន្ធនាគារ​អស់​រយៈ​ពេល​ជាង​បួនឆ្នាំ។

អ្នក​ទាំង​ពីរ​ត្រូវ​បាន​អង្គការ​សង្គម​ស៊ីវិល​បាន​ពិពណ៌នា​ថា​ ​ជា​ឃាដករ​សិប្បនិម្មិត៕

XS
SM
MD
LG