កម្រងរូបភាព៖ ​មហោស្រព​ភាពយន្តអន្តរជាតិកម្ពុជាលើកទី៩​ រំលេចនូវតួនាទីរបស់សិល្បៈក្នុងការបង្ហាញអំពីប្រវត្តិសាស្រ្ត​របបខ្មែរក្រហម

កំណត់និពន្ធ៖ បណ្តុំ​ខ្សែភាពយន្ត​ជាច្រើន​ដែលបង្ហាញ​សាច់រឿងទាក់ទិននឹង​ប្រវត្តិសាស្ត្រ ​និង​បច្ចុប្បន្នកាល​របស់កម្ពុជា ត្រូវបានចាក់បញ្ចាំង​ដោយសេរីយៈ​ពេល៦ថ្ងៃ គឺចាប់ពីថ្ងៃទី៩ រហូតដល់ថ្ងៃទី១៤ ខែមីនា។ ​យ៉ាងហោចណាស់​មាន​ខ្សែភាព​ចំនួន ៩ ឆ្លុះបញ្ចាំងអំពីប្រវត្តិសាស្ត្រ​សម័យខ្មែរក្រហម ត្រូវបានយកមកបញ្ចាំង នៅក្នុងព្រឹត្តិការណ៍ប្រចាំឆ្នាំលើកទី៩ នៃមហោស្រពភាពយន្តអន្តរជាតិកម្ពុជា ដើម្បីរំលឹក​អនុស្សាវរីយ៍៤០ឆ្នាំ​ ក្រោយកម្ពុជា​ចាកផុតពីរបបមួយនេះ។ ក្រៅពី​ខ្សែភាពយន្តជាតិ​ និងអន្តរជាតិ ភាពយន្ត​ខ្នាតវែង និងភាពយន្តខ្លី ភាពយន្តឯកសារ និងភាពយន្តបែបគំនូរជីវចល ដែលមានប្រមាណជាង១០០រឿង សាធារណជនក៏អាច​ទស្សនា​ពិពណ៌សិល្បៈ​ និងចូលរួមក្នុង​ជជែកពិភាក្សា​អំពីការផ្សះផ្សារ​របួសផ្លូវចិត្ត តាម​រយៈសិល្បៈ ​ពិសេស​វិស័យ​ភាពយន្ត ដែល​អាចឲ្យបាន​យល់ដឹងបន្ថែម អំពី​តួនាទីរបស់សិល្បៈក្នុងការ​ឆ្លុះបញ្ចាំង​តថភាពនៃ​ជីវិត​ក្នុង​សង្គម​សព្វថ្ងៃរបស់ពួកគេ។