រដ្ឋមន្រ្ដីការបរទេសកម្ពុជា លោក សុខ ចិន្ដាសោភា នឹងចូលរួមកិច្ចប្រជុំចង្អៀតរដ្ឋមន្រ្ដីការបរទេសអាស៊ាន ដែលនឹងប្រព្រឹត្តទៅនៅទីក្រុងហ្លួងព្រះបាង ប្រទេសឡាវ ដែលជាប្រធានប្តូរវេនរបស់សមាគមអាស៊ាន។ នេះបើតាមសេចក្ដីប្រកាសព័ត៌មានរបស់ក្រសួងការបរទេស ចេញផ្សាយកាលពីថ្ងៃព្រហស្បតិ៍។
ក្រសួងការបរទេសបញ្ជាក់ថា រដ្ឋមន្រ្ដីការបរទេសកម្ពុជានឹងចូលរួមកិច្ចប្រជុំ តបតាមការអញ្ជើញរបស់រដ្ឋមន្រ្ដីការបរទេសឡាវ លោក សាលើមសៃ គុំម៉ាស៊ីត។
កិច្ចប្រជុំដែលនឹងប្រព្រឹត្តទៅនៅថ្ងៃទី ២៨ និង ២៩ ខែមករា ឆ្នាំ ២០២៤ ធ្វើឡើងក្រោមប្រធានបទ៖ «អាស៊ាន៖ ការពង្រឹងការតភ្ជាប់ និងភាពធន់» ដែលពិភាក្សាអំពីគម្រោងសមិទ្ធផលសំខាន់ ក្រោមការដឹកនាំរបស់ប្រទេសឡាវដែលជាប្រធានអាស៊ានក្នុងឆ្នាំ ២០២៤។
សេចក្ដីប្រកាសព័ត៌មានបន្ថែមថា រដ្ឋមន្រ្ដីការបរទេសអាស៊ាននឹងពិនិត្យតាមដានកិច្ចប្រជុំកំពូលអាស៊ានលើកទី ៤៣ និងកិច្ចប្រជុំពាក់ព័ន្ធនានា ឆ្ពោះទៅរកការកសាងសហគមន៍អាស៊ាន រួមទាំងការរៀបចំ «ចក្ខុវិស័យសហគមន៍អាស៊ានឆ្នាំ ២០៤៥»។
រដ្ឋមន្រ្ដីការបរទេសកម្ពុជានឹងមានជំនួបពិភាក្សាទ្វេភាគីជាមួយសមាជិកអាស៊ានមួយចំនួន នៅពេលចូលរួមកិច្ចប្រជុំនោះ ដើម្បីពង្រឹងកិច្ចសហប្រតិបត្តិការក្នុងក្របខណ្ឌទ្វេភាគី និងពហុភាគី។
គួរបញ្ជាក់ថា ប្រទេសឡាវទើបទទួលធ្វើជាប្រធានអាស៊ានប្តូរវេនបន្ទាប់ពីប្រទេសឥណ្ឌូណេស៊ី៕
វេទិកាបញ្ចេញមតិ