ភ្ជាប់​ទៅ​គេហទំព័រ​ទាក់ទង

ស្ថានទូតអាមេរិកប្រតិកម្មចំពោះវិធានការរដ្ឋាភិបាលកម្ពុជាលើប្រព័ន្ធផ្សព្វផ្សាយអាមេរិក

  • គង់ សុឋានរិទ្ធ

លោកសន ម៉ាគីនតូស អ្នកនាំពាក្យស្ថានទូតអាមេរិក
ភ្នំពេញ៖ សហរដ្ឋអាមេរិកនៅថ្ងៃសុក្រនេះបានបញ្ជាក់ថាខ្លួននឹងតាមមើលការវិវត្តទាក់ទងនឹងចំណាត់ការរបស់រដ្ឋាភិបាលលើវិទ្យុសំឡេងសហរដ្ឋអាមេរិកជាខេមរភាសា និងវិទ្យុអាស៊ីសេរី។ លោកសន ម៉ាគីនតូស អ្នកនាំពាក្យស្ថានទូតអាមេរិកបានអំពាវនាវនៅរសៀលនេះដល់រដ្ឋាភិបាលកម្ពុជាឲ្យគោរពសេរីភាពនៃការបញ្ចេញមតិ។ «សហរដ្ឋអាមេរិកនៅតែព្រួយបារម្ភជាខ្លាំងអំពីឧប្បត្តិហេតុជាច្រើនដែលបានកើតឡើងដែលធ្វើឲ្យមានចំណោទពីការប្តេជ្ញាចិត្តរបស់រដ្ឋាភិបាលក្នុងការការពារសេរីភាពបញ្ចេញមតិហើយយើងអំពាវនាវដល់រដ្ឋាភិបាលចាត់គ្រប់វិធានការចាំបាច់ដើម្បីការពារសេរីភាពបញ្ចេញមតិ»។ លោកថ្លែងដូច្នេះដោយសារតែមានការកោះហៅវិទ្យុសំឡេងសហរដ្ឋអាមេរិកនិងវិទ្យុអាស៊ីសេរីកាលពីថ្ងៃពុធទី១០ ខែតុលា ពីសំណាក់រដ្ឋាភិបាលដើម្បីសើរើពីបេសកកម្មរបស់វិទ្យុទាំងពីរនិងការទាមទារឲ្យមានកិច្ចសហការជាមួយរដ្ឋាភិបាលខ្មែរ។ លោកសន ម៉ាកគីនតូស បញ្ជាក់ថាសហរដ្ឋអាមេរិកនឹងបន្តតាមដានការវិវត្តបញ្ហានេះ។ «យើងបន្តធ្វើការជាមួយសង្គមស៊ីវិលនិងជាមួយរដ្ឋាភិបាលក្នុងបញ្ហានេះនិងមិនខ្លាចក្នុងការលើកឡើងបញ្ហានេះម្តងហើយម្តងទៀត ហើយយើងបន្តធ្វើការឃ្លាំមើលស្ថានភាពនៅទីនេះ»។ កិច្ចប្រជុំជាមួយមន្ដ្រីរដ្ឋាភិបាលរួមទាំងទីប្រឹក្សាលោកនាយករដ្ឋមន្ដ្រី និងមន្ដ្រីមកពីក្រសួងការបរទេស ក្រសួងព័ត៌មាន ក្រសួងយុត្តិធម៌ និងទីស្តីការគណៈរដ្ឋមន្ដ្រីបានចំណាយពេលអស់រយៈពេលប្រមាណពីរម៉ោងហើយមិនអនុញ្ញាតឲ្យផ្សព្វផ្សាយខ្លឹមសារនៃកិច្ចប្រជុំនេះទេ។ មន្ត្រីអ្នកនាំពាក្យស្ថានទូតអាមេរិកបានបញ្ជាក់ឡើងវិញពីឯករាជ្យភាពរបស់វិទ្យុដែលមានមូលដ្ឋាននៅក្រុងវ៉ាស៊ីនតោនទាំងពីរ។ «វិទ្យុសំឡេងសហរដ្ឋអាមេរិកនិងវិទ្យុអាស៊ីសេរីដែលផ្តល់មូលនិធិដោយរដ្ឋាភិបាលអាមេរិកមិនមែនដើម្បីប្រឆាំងប្រជាពលរដ្ឋកម្ពុជានោះទេ ហើយក៏មិនមែនដើម្បីគាំទ្រគណបក្សប្រឆាំងដែរ។ គឺដើម្បីផ្តល់ភាពជាក់ច្បាស់មួយ និងដើម្បីគាំទ្រដល់ការផ្តល់ភាពច្បាស់លាស់និងដើម្បីផ្តល់ព័ត៌មានដល់សាធារណជនកម្ពុជា»។ ទោះជាមានការកោះហៅរបស់រដ្ឋាភិបាលក៏ដោយនាយកវិទ្យុផ្សាយសំឡេងទាំងពីរបានបញ្ជាក់ជំហរមិនកែប្រែរបស់ខ្លួនក្នុងសេចក្ដីថ្លែងការណ៍ផ្សេងៗគ្នា ហើយប្តេជ្ញានឹងបន្តបេសកកម្មសព្វថ្ងៃសម្រាប់បំពេញព័ត៌មានដល់ប្រជាពលរដ្ឋខ្មែរ។ កាលពីម្សិលមិញគណៈអភិបាលការផ្សាយដែលគ្រប់គ្រងលើការផ្សាយនៃវិទ្យុទាំងពីរបានថ្កោលទោសទង្វើរបស់រដ្ឋាភិបាលខ្មែរ។ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ដ្រីបានបញ្ជាក់ថារដ្ឋាភិបាលមិនទាន់មានគម្រោងចាត់វិធានការណាមួយលើវិទ្យុអាមេរិកទាំងពីរនេះទេ។ «យើងគ្រាន់តែនិយាយគ្នា។ រដ្ឋាភិបាលគ្មានវិធានការចាត់អីទេ»។ កាលពីក្នុងអំឡុងពេលបោះឆ្នោតជ្រើសរើសក្រុមប្រឹក្សាឃុំសង្កាត់រដ្ឋាភិបាលបានបញ្ជាឲ្យវិទ្យុដែលស្ថិតក្រោមកុងត្រាជាមួយវិទ្យុវីអូអេ និងវិទ្យុអាស៊ីសេរីផ្អាកការផ្សាយបន្តផ្ទាល់និងការផ្សាយបន្តដល់វិទ្យុទាំងពីរមួយរយៈខ្លីគឺនៅមុន និងនៅក្រោយពេលបោះឆ្នោតរួច៕
XS
SM
MD
LG