ភ្ជាប់​ទៅ​គេហទំព័រ​ទាក់ទង

ស្ថានទូត​អាមេរិក​នៅ​ភ្នំពេញ​ពង្រឹង​សន្តិសុខ ​ក្រោយពី​មាន​ការ​វាយ​ស្ថាន​កុងស៊ុល​អាមេរិក​នៅ​ក្នុង​ទីក្រុង​ប៊ែនកាស៊ី ​


អ្នក​នាំពាក្យ​ស្ថានទូត​អាមេរិក​ លោក​សន ម៉ាក​គីន​តូ​ស​
ភ្នំពេញ​៖ មន្ដ្រី​ជាន់ខ្ពស់​ស្ថានទូត​សហ​រដ្ឋ​អាមេរិក​ប្រចាំ​ក្រុង​ភ្នំពេញ​បាន​ឲ្យ​ដឹង​នៅ​ថ្ងៃ​ពុធ​នេះ​ថា​ សន្តិសុខ​ស្ថានទូត​ត្រូវបាន​ពង្រឹង​បន្ថែមទៀត​ បន្ទាប់ពី​មាន​ការ​វាយ​ប្រហារ​នៅ​ប្រទេស​លីប៊ី។​

កាលពី​ថ្ងៃ​អង្គារ​សប្តាហ៍​មុន​ ក្រុម​បាតុករ​ហិង្សា​បាន​វាយ​ប្រហារ​លើ​ស្ថាន​កុងស៊ុល​អាមេរិក​ក្នុង​ទីក្រុង​ប៊ែ​ន​កាស៊ី​ ហើយ​បាន​សម្លាប់​ឯកអគ្គ​រដ្ឋទូត​ម្នាក់​និង​មន្ដ្រី​អាមេរិក​បី​នាក់​ ​មូលហេតុ​ដោយសារ​ពួកគេ​ខឹងសម្បារ​នឹង​ការ​បង្ហាញ​ភាពយន្ត​ដែល​មាន​ចំណង​ជើង​ថា “Innocence Muslim" ឬ​សាសនា​ម៉ូស្លីម​បរិសុទ្ធ​ដែល​ពួកគេ​ចាត់​ទុក​ថា​ បាន​ប្រមាថ​លើ​សាសនាម៉ូស្លីមរបស់​ពួកគេ។​

លោក​សន ម៉ាក​គីន​តូ​ស​ អ្នក​នាំពាក្យ​ស្ថានទូត​អាមេរិក​ បាន​ប្រាប់​ក្រុម​អ្នកយក​ព័ត៌មាន​នៅ​រសៀល​ថ្ងៃនេះ​ថា ​រដ្ឋបាល​របស់​លោក​ប្រធានាធិបតី​អូបាមា​បាន​ចេញ​បញ្ជា​ឲ្យ​ពង្រឹង​សន្តិសុខ​នៅ​គ្រប់​ស្ថានទូត​អាមេរិក​ទាំងអស់​ក្នុង​ពិភព​លោក។​

«ភ្លាមៗ​បន្ទាប់ពី​មាន​ការ​វាយប្រហារ​នៅ​ប្រទេស​លី​ប៊ី​ លោក​ប្រធានាធិបតី​អូបាមា ​និង​ក្រសួង​ការបរទេស​បាន​ដាក់​បញ្ជា​ឲ្យ​យើង​ទាក់ទង​ជាមួយ​រដ្ឋាភិបាល​ក្នុងស្រុក​ដើម្បី​ធានា​សន្តិសុខ ​ហើយ​ដើម្បី​ធ្ចើ​ឲ្យ​ប្រាកដ​ថា​ បុគ្គលិក​ទូត​ត្រូវ​បាន​ការពារ»។​

លោក សន ម៉ា​គីន​តូស​បន្ថែម​ថា​ ជនជាតិ​អាមេរិក​ក្នុង​ប្រទេស​កម្ពុជា​ត្រូវ​បាន​ព្រមានឲ្យ​ស្ថិត​ក្នុង​ភាព​ប្រុង​ប្រយ័ត្ន​ផងដែរ។​

មន្ដ្រី​នាំពាក្យ​ដដែល​បញ្ជាក់​ថា ​ស្ថានទូត​អាមេរិក​បាន​ទាក់ទង​ជាមួយ​ក្រសួង​មហាផ្ទៃ​កម្ពុជា​រួចហើយ​ដើម្បី​ស្នើសុំ​ការគាំទ្រ​ផ្នែក​សន្តិសុខ​ ហើយ​ក្រសួង​មហាផ្ទៃ​ក៏បាន​ធានា​ចំពោះ​ការឆ្លើយតប​ជា​ចាំបាច់​សម្រាប់​ផ្នែក​សន្តិសុខ​ផងដែរ។​ ទោះជា​យ៉ាងណា​ លោក​មិន​អាច​បញ្ជាក់​លម្អិត​ពី​ការ​សន្យា​របស់​ក្រសួង​មហាផ្ទៃ​ខ្មែរ​លើ​បញ្ហា​នេះ​ទេ។​

លោក​សន ម៉ាក​គីន​តូ​ស​ឲ្យ​ដឹង​បន្ថែម​ថា​ ស្ថានទូត​កំពុង​សហការ​ល្អជា​មួយ​សមត្ថកិច្ច​រដ្ឋាភិបាល​លើ​បញ្ហា​នេះ។​

«យើង​កំពុង​សហការ​យ៉ាង​ជិតស្និត​ជាមួយ​រដ្ឋាភិបាល​ម្ចាស់ផ្ទះ​ដើម្បី​ធ្វើ​ឲ្យ​ប្រាកដ​ថា​ អ្នក​ការទូត​របស់​យើង​ត្រូវបាន​ការពារ»។​

ចលនា​ប្រជាជន​ឥស្លាម​បាន​ងើបឡើង​ប្រឆាំង​នឹង​អាមេរិក​នៅ​ក្នុង​ប្រទេស​ជាច្រើន​ក្រោយ​ពី​មានការ​វាយប្រហារ​នៅ​លីប៊ី​រួចមក។ ​កាលពី​ថ្ងៃ​អង្គារ​សប្តាហ៍​នេះ​ បាតុករ​ឥស្លាម​ថៃ​ប្រមាណ​៣០០​នាក់​បាន​ប្រមូល​ផ្តុំគ្នា​នៅមុខ​ស្ថានទូត​អាមេរិក​ក្នុង​ទីក្រុង​បាងកក​ដើម្បី​ប្រឆាំង​នឹង​ខ្សែ​ភាពយន្ត​ដ៏​ចម្រូងចម្រាស់​នោះ​ដែរ។ ​ស្ថានទូត​អាមេរិក​ក្នុង​ទីក្រុង​បាងកក​ត្រូវបាន​បិទទ្វារ​ ហើយ​លោក​សន ម៉ាក​គីន​តូ​ស​ជឿថា ​ស្ថានទូត​នេះ​អាច​នឹង​បើក​ឡើងវិញ​នៅថ្ងៃនេះ។​

ដោយឡែក​លោក​លើកឡើង​ថា ​ស្ថានទូត​មិន​ដែល​ទទួល​ការគំរាមកំហែង​ភេរវកម្ម​ពី​ប្រជា​ពលរដ្ឋ​ខ្មែរ​ឥស្លាម​នោះទេ។​
វីអូអេបានព្យាយាមទាក់ទងលោក​ឧត្តមសេនីយ៍​ខៀវ សុភ័គ​ អ្នកនាំពាក្យ​ក្រសួង​មហាផ្ទៃ​ និង​លោក​ឧត្តម​សេនីយ៍​ គាត ចន្ថារិទ្ធ​ អ្នកនាំពាក្យ​អគ្គស្នងការ​នគរបាល​ជាតិ​ ដើម្បី​សុំការ​បំភ្លឺ ​តែមិន​អាច​ទាក់ទង​បាន​ទេ​នៅថ្ងៃ​នេះ៕
XS
SM
MD
LG