លោករដ្ឋមន្ត្រីការបរទេសកម្ពុជា ប្រាក់ សុខុន បានផ្ញើលិខិតមួយច្បាប់ជូនរដ្ឋមន្ត្រីការបរទេសថ្មីរបស់សហរដ្ឋអាមេរិក លោក Antony Blinken ដែលទើបចូលកាន់ដំណែងថ្មី ជាមួយនឹងការអំពាវនាវឱ្យទីក្រុងវ៉ាស៊ីងតោន គោរពទីក្រុងភ្នំពេញស្មើមុខស្មើមាត់ជារដ្ឋអធិបតេយ្យដូចគ្នា។
«ខ្ញុំមានសេចក្ដីសោមនស្សជាពន្លឹកដើម្បីផ្ញើជូននូវការជូនពរដ៏ស្មោះស្ម័គ្រអំពីខ្ញុំចំពោះឯកឧត្តម ដែលបានទទួលការតែងតាំងជារដ្ឋមន្ត្រីការបរទេសរបស់សហរដ្ឋអាមេរិក»។ នេះជាខ្លឹមសារនៃលិខិតចុះថ្ងៃទី២៧ ខែមករា របស់លោក ប្រាក់ សុខុន ដែលវីអូអេទទួលបាន។
ក្រៅតែពីបានបង្ហាញនូវការប្ដេជ្ញាចិត្តរបស់កម្ពុជាក្នុងការ «ផ្សាភ្ជាប់ទៅនឹងធម្មនុញ្ញភាពនៃលទ្ធិប្រជាធិបតេយ្យសេរីពហុបក្ស» និងថ្លែងអំណរគុណអាមេរិកដែលជួយកម្ពុជា លោក ប្រាក់ សុខុន ថាកម្ពុជាចង់មានទំនាក់ទំនងល្អជាមួយសហរដ្ឋអាមេរិក «ផ្អែកលើប្រយោជន៍ទាំងសងខាង ការគោរពគ្នាទៅវិញទៅមក និងយុត្តិធម៌»។
សហរដ្ឋអាមេរិកជារដ្ឋបរទេស ដែលបានរិះគន់ការបង្ក្រាបនយោបាយរយៈកាលបួនឆ្នាំកន្លងមកនេះនៅប្រទេសកម្ពុជា ដែលបក្សជំទាស់ត្រូវបានរំលាយ ហើយអ្នកប្រឆាំងត្រូវរងទុក្ខទោសនិងបណ្ដឹងរ៉ាំរ៉ៃខណៈបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បន្តកាន់អំណាចពេញទី។
រដ្ឋាភិបាលកម្ពុជាតែងតបតការរិះគន់ទាំងនោះ ថាជាការបំពានអធិបតេយ្យភាពនៃប្រទេសខ្លួន។
ស្ថានទូតអាមេរិកនៅភ្នំពេញបានប្រាប់វីអូអេនៅថ្ងៃសុក្រនេះថា ខ្លួនបានទទួលរួចហើយនូវលិខិតរបស់លោក ប្រាក់ សុខុន ហើយបានបញ្ជូនទៅកាន់ក្រសួងការបរទេសនៅរដ្ឋធានីវ៉ាស៊ីងតោន តែសុំមិនធ្វើអត្ថាធិប្បាយអ្វីលើខ្លឹមសារសំបុត្រនោះទេ។
នៅថ្ងៃព្រហស្បតិ៍ម្សិលមិញ ឯកអគ្គរដ្ឋទូតអាមេរិកប្រចាំកម្ពុជាលោក W. Patrick Murphy បានទៅដល់គេហដ្ឋានលោក កឹម សុខា ដើម្បីជួបអតីតមេបក្សជំទាស់រូបនេះពិភាក្សាអំពីការពន្យារពេលសវនាការក្ដីក្ដាំរបស់លោក កឹម សុខា ដែលរងការចោទថាបានសមគំនិតនឹងសហរដ្ឋអាមេរិក ផ្ដួលរំលំរដ្ឋាភិបាលកម្ពុជា។ ទាំងលោក កឹម សុខា និងសហរដ្ឋអាមេរិក បានបដិសេធការចោទប្រកាន់នេះ៕
