ភ្ជាប់​ទៅ​គេហទំព័រ​ទាក់ទង

សហ​រដ្ឋ​អាមេរិក​ និង​កម្ពុជា​ពិភាក្សា​រឿង​សុំ​កូន​ខ្មែរ​ចិញ្ចឹម​

  • គង់ សុឋានរិទ្ធ

ភ្នំពេញ​
សហ​រដ្ឋ​អាមេរិក​បាន​បដិសេធ​នៅ​ថ្ងៃ​ព្រហស្បតិ៍​នេះ​ថា មិន​បាន​កំណត់​កាល​បរិច្ឆេទ​អំពី​ការ​សុំកូន​កម្ពុជា​យក​ទៅ​ចិញ្ចឹម​នៅ​ឆ្នាំ​ក្រោយ​ទេ។​
កាលពី​ថ្ងៃ​ច័ន្ទ ក្រោយ​ពី​ជួប​ជាមួយ​លោកស្រី​ Susan​ Jacobs​ ឯក​អគ្គរដ្ឋទូត​និង​ជាទី​ប្រឹក្សា​ពិសេស​ទទួល​បន្ទុក​កុមារ​អាមេរិក​ លោក​ ​ឡុង​ វិសាលោ​ ​រដ្ឋ​លេខាធិការ​ក្រសួង​ការ​បរទេស​កម្ពុជា​ បាន​ថ្លែង​ប្រាប់​ក្រុម​អ្នក​កាសែត​ថា​ កម្ពុជា​អនុញ្ញាត​ឲ្យ​មាន​ការ​ស្មុំ​កូន​ទៅ​ចិញ្ចឹម​នៅ​សហ​រដ្ឋ​អាមេរិក​ឡើង​វិញ​ ចាប់ពី​ថ្ងៃ​ទី​០១ ​ខែ​មករា​ ​ឆ្នាំ​២០១៣​ខាង​មុខ​នេះ។​
នៅ​ក្នុង​សេចក្ដី​ថ្លែង​ការណ៍​នៅ​រសៀល​នេះ​ ស្ថានទូត​សហ​រដ្ឋ​អាមេរិក​ប្រចាំក្រុង​ភ្នំពេញ​បាន​ច្រានចោល​ព័ត៌មាន​ខាង​លើ​ ដោយ​លើក​ឡើង​ថា ​ក្នុង​អំឡុង​ពេល​ដែល​លោកស្រី​ Susan​ Jacobs​ ជួប​ពិភាក្សា​ជាមួយ​មន្ដ្រី​រដ្ឋាភិបាល​កម្ពុជា​នៃ​ក្រសួង​ការបរទេស​និង​ក្រសួង​សង្គមកិច្ច​អតីត​យុទ្ធ​ជន​និង​ស្តារ​និតិសម្បទា​ចន្លោះ​ពី​ថ្ងៃ​ទី​២៨​និង​ថ្ងៃ​ទី​២៩​តុលា​នោះ​«មិន​មាន​ការ​សម្រេច​ចិត្ត​ ឬ​កំណត់​ពេល​វេលា​រវាង​កម្ពុជា​និង​សហ​រដ្ឋអាមេរិក​ សម្រាប់​ដំណើរការ​ឡើង​វិញ​នូវ​ការ​សុំ​កូន​ខ្មែរ​ទៅ​ចិញ្ចឹមនៅ​បរទេសទេ»។​
លោក​កុយ​ គួ​ង​ អនុរដ្ឋលេខាធិការ​និង​ជា​អ្នក​នាំពាក្យ​ក្រសួង​ការ​បរទេស​មិន​អាច​ទាក់ទង​បាន​ទេ​នៅ​ថ្ងៃ​ព្រហស្បតិ៍​នេះ​ ដោយ​ទូរ​ស័ព្ទ​របស់​លោក​រោទិ៍​ដោយ​គ្មាន​អ្នក​ទទួល។​
កម្ពុជា​ធ្លាប់​បាន​អនុញ្ញាត​ឲ្យ​មាន​ការ​យក​កូន​ពី​កម្ពុជា​ទៅ​ចិញ្ចឹម​ចន្លោះ​ពី​១០០​ទៅ​២០០​នាក់ក្នុង​មួយ​ឆ្នាំ​ ក៏​ប៉ុន្តែ​ក្រោយមក​មាន​កើត​រឿង​អាស្រូវ​នៃ​ការ​ជួញដូរ​កុមារ​តាម​រយៈ​ការ​សុំ​កូន​នេះ ​ហើយ​រដ្ឋាភិបាល​ប្រទេស​ទាំង​ពីរ​ក៏​បាន​ផ្អាក​និតិ​វិធី​នេះ។​
ហើយ​គ្រួសារ​ជនជាតិ​អាមេរិក​មួយ​ត្រូវ​បាន​រដ្ឋាភិបាល​សហ​រដ្ឋ​ចាប់​ខ្លួន ​រួច​ត្រូវ​បាន​កាត់ទោស​ឲ្យ​ជាប់​ពន្ធនាគារ​ បន្ទាប់​ពី​យក​កូន​ចិញ្ចឹម​ ដែលសុំ​ពី​ប្រទេស​កម្ពុជា​ យក​ទៅ​លក់។​
ស្ថានទូត​អាមេរិក​បញ្ជាក់​ក្នុង​សេចក្ដី​ថ្លែង​ការណ៍​របស់​ខ្លួន​ថា​ ដំណើរ​ទស្សនកិច្ច​របស់​លោកស្រី​ឯក​អគ្គរដ្ឋទូត​និង​ជាទី​ប្រឹក្សា​ពិសេស​ទទួល​បន្ទុក​កុមារ​អាមេរិក​គឺ​ដើម្បី​បន្ត​ពិភាក្សា​ពី​ផែនការ​របស់​កម្ពុជា​ក្នុង​ការ​ចាប់ផ្តើម​ឡើង​វិញ​នូវ​ដំណើរការ​សុំ​កូន​ទៅ​ចិញ្ចឹម​នៅ​ក្រៅ​ប្រទេស។​
ក្រៅពី​សហរដ្ឋអាមេរិក ​កម្ពុជា​អនុញ្ញាត​ឲ្យ​មាន​ការ​យក​កូន​ទៅ​ចិញ្ចឹម​នៅ​ប្រទេស​អ៊ីតាលី​ចំនួន​៥០​ទៅ​៦០​នាក់​ក្នុង​មួយ​ឆ្នាំ​ ហើយ​ក្រៅពី​នោះ ​មាន​ប្រទេស​បារាំង​ អូស្ត្រាលី​ ​និង​ប្រទេស​អង់គ្លេស​ផង​ដែរ៕​
XS
SM
MD
LG