ភ្ជាប់​ទៅ​គេហទំព័រ​ទាក់ទង

រដ្ឋាភិបាល​ដំឡើង​កម្រិត​បំណុល​បរទេស​ដោយ​ការ​ប្រាក់​នៅ​ទាប​ជា​ជាង​ខ្ចី​លុយ​អ្នក​មាន​ក្នុង​ស្រុក


រដ្ឋាភិបាល​គ្រោង​ដំឡើង​ការ​ខ្ចី​ពី​កម្រិត​៦០០​លាន ​SDR ​(ឬ​ប្រមាណ​ជា​៨៤០​លាន​ដុល្លារ​អាមេរិក)​នៅ​ឆ្នាំ​២០១៥​ទៅ​ដល់​៧០០​លាន​ SDR ​(ឬ​ប្រមាណ​ជា​ ៩៨០​លាន​ដុល្លារ​អាមេរិក) ​នៅ​ឆ្នាំ​២០១៦​ខាងមុខ​នេះ។​ ​

ការ​ដំឡើង​បន្ទុក​បំណុល​តាម​រយៈ​ការ​អនុម័ត​សេចក្តី​ព្រាង​ច្បាប់ស្តី​ពី​ហិរញ្ញ​វត្ថុ​សម្រាប់​ការ​គ្រប់​គ្រង​ឆ្នាំ​២០១៦​ ដែល​ធ្វើ​ឡើង​ដោយ​សមាជិក​សភា​នៃ​គណបក្ស​គ្រប់​គ្រង​ប្រទេស​កាល​ពី​ថ្ងៃ​ច័ន្ទ​គឺ​ស្រប​គ្នា​ទៅ​តាម​យុទ្ធ​សាស្ត្រ​ស្តី​ពី​ការ​គ្រប់​គ្រង​បំណុល​សាធារណៈ​ ឆ្នាំ​២០១៥​ និង​២០១៨ ដែលជា​ផ្នែក​មួយ​នៃ​ការ​កែ​ទម្រង់​ការ​គ្រប់​គ្រង​ហិរញ្ញ​វត្ថុ​សាធារណៈ​របស់​រាជរដ្ឋាភិបាល​កម្ពុជា។​ នេះ​បើ​តាម​ការ​អះអាង​របស់​មន្ត្រី​រដ្ឋាភិបាល​កម្ពុជា។​

ការដំឡើង​បន្ទុក​បំណុល​នេះ​ កើតមាន​ឡើង​ដោយ​គ្មាន​វត្តមាន​ពី​ក្រុម​អ្នកតំណាងរាស្ត្រ​នៃ​គណបក្ស​សង្គ្រោះ​ជាតិ​ដែលបាន​ធ្វើ​ពហិការ​មិន​ចូល​ប្រជុំ​ក្នុង​សភា​ជាតិ។​

អ្នក​តំណាងរាស្ត្រនៃ​គណបក្ស​សង្គ្រោះ​ជាតិ​មួយ​រូប​ដែល​មិន​បាន​ចូល​រួម​ការ​ប្រជុំ​អនុម័ត​ថវិកា​ជាតិ​សម្រាប់​២០១៦នោះ បាន​សម្តែង​ក្តី​បារម្ភ​ពី​ការ​កើន​ឡើង​បំណុល​បរទេស​ ដែល​អាច​នឹង​បង្ក​ការ​លំបាក​ដល់​ការ​កសាង​ប្រទេស​កម្ពុជា​ បើ​ទោះ​ជា​ការ​កើន​ឡើង​នៃ​បំណុល​នេះ​ ធ្វើ​ឡើង​ដោយ​ឈរ​នៅ​លើ​យុទ្ធសាស្ត្រ​ស្តីពី​ការ​គ្រប់​គ្រង​បំណុល​សាធារណៈ​ដែល​បាន​បង្ហោះ​លើ​គេហទំព័រ​របស់​ក្រសួង​សេដ្ឋកិច្ច​ និង​ហិរញ្ញវត្ថុ​កាល​ពីដើម​ខែ​វិច្ឆិកា​កន្លង​ទៅ​នេះ។​

ជាមួយ​និង​ក្តី​បារម្ភ​នេះ​ លោក សុន ឆ័យ​ អ្នក​តំណាង​រាស្ត្រ​មកពី​គណបក្ស​ប្រឆាំង​ និង​ជា​អនុប្រធាន​គណៈកម្មការ​សេដ្ឋកិច្ច​ និង​ហិរញ្ញវត្ថុ​នៃ​សភា​ជាតិ ថ្លែងប្រាប់​ VOA ថា​ ក្រុម​អ្នក​តំណាងរាស្រ្ត​នៃ​គណបក្ស​ប្រឆាំង​បាន​សើ្ន​ឲ្យ​រដ្ឋាភិបាល​ធ្វើការ​ចេញ​ប័ណ្ណ​រតនាគារជាតិ​ ឬ​ប័ណ្ណ​បំណុល​របស់​រដ្ឋ​ ទៅ​ឲ្យអ្នក​មានទ្រព្យ​ស្តុកស្តម្ភ​រួម​មាន​មន្ត្រី​ក្នុង​រដ្ឋាភិបាល​ ដើម្បី​កាត់​បន្ថយ​ការ​ពឹង​ផ្អែក​លើ​ការ​ខ្ចី​ប្រាក់​ពី​បរទេស​ដែល​បាន​បន្ត​កើន​ឡើង​ជា​រៀង​រាល់​ឆ្នាំ​ទៅ​តាម​ការអនុម័ត​សេចក្តី​ព្រាង​ច្បាប់​ស្តី​ពី​ថវិកា​ជាតិ​នេះ​។​

លោក​ថ្លែង​បញ្ជាក់​ថា៖​ ​

«យើង​បាន​ផ្តល់​ទៅ​គាត់​ឲ្យ​ យើង​ខ្ចី​លុយ​សម្រាប់​ការ​កសាង​ ផ្លូវ​ថ្នល់​ស្ពាន​អី​ ពី​អ្នកមាន​ អ្នកមាន​នៅ​ស្រុក​ខ្មែរ​វិញ​ទៅ​ ព្រោះ​ឥឡូវ​យើង​ឃើញ​អ្នក​មាន​ មន្ត្រី​រដ្ឋាភិបាល​មួយ​ចំនួន​នោះ​មាន​ប្រាក់​រាប់​រយ​រាប់​ពាន់​លាន ដែល​ប្រាក់​នេះ​ភាគច្រើន​ ប្រហែល​ជា​ទុក​ចោល​ អត់​យក​មក​ប្រើ​ប្រាស់​ ដូច្នេះ​យើង​គួរ​តែ​លក់ បង្កើត​ជា​ប័ណ្ណ​រតនា​គា​រ ដែល​ភាសា​អង់គ្លេស​ហៅ​ថា​ bond លក់​ប័ណ្ណ​រតនា​គារ​នេះ​ ឲ្យ​ទៅ​ អ្នក​ដែល​មាន​លុយ​ច្រើនៗ​ នៅ​ស្រុក​ខ្មែរ​យើង​ ហើយ​យក​លុយ​ នៅ​ក្នុង​ស្រុក​នេះ​ ទៅ​កសាង​វិញ​ទៅ​ ហើយ​ការប្រាក់​ដែល​រដ្ឋ​ត្រូវ​បង់​ ចំពោះ​ការ​ខ្ចី​ ឬក៏​ការ​លក់​ bond នេះ​ គឺ​នឹង​នៅ​តែ​រក្សា​ក្នុង​ប្រទេស​យើង ហើយ​យើង​អាច​នឹង​ជួយ​ទៅ​ដល់​ធនធាន​នៅ​ក្នុង​ស្រុក​នេះ​ អាច​យក​ទៅ​ប្រើ​ប្រាស់​ បម្រើ​វិស័យ​វិនិយោគ​ និង​ផ្នែក​ដទៃ​ៗ​ ទៀត​ផង​»។​

នៅ​ក្នុង​ការ​អនុម័ត​ដែល​បាន​ធ្វើ​ឡើង​កាល​ពី​ថ្ងៃ​ច័ន្ទ​កន្លង​ទៅ​នេះ​ រដ្ឋាភិបាល​គ្រោង​ដំឡើង​ការ​ខ្ចី​ពី​កម្រិត​៦០០​លាន ​SDR ​(ឬ​ប្រមាណ​ជា​៨៤០​លាន​ដុល្លារ​អាមេរិក)​នៅ​ឆ្នាំ​២០១៥​ទៅ​ដល់​៧០០​លាន​ SDR ​(ឬ​ប្រមាណ​ជា​ ៩៨០​លាន​ដុល្លារ​អាមេរិក) ​នៅ​ឆ្នាំ​២០១៦​ខាងមុខ​នេះ។​ ​

ទោះ​ជា​មាន​ការ​ពន្យល់​ពី​ លោក​ សុន​ ឆ័យ​ ជា​អ្នក​តំណាងរាស្ត្រ​ និង​ជា​ប្រធាន​ក្រុម​តំណាង​រាស្ត្រ​គណបក្ស​សង្គ្រោះ​ជាតិ​ក៏ដោយ​ រដ្ឋាភិបាល​ពុំ​មាន​ផែនការ​នៃ​ចេញ​ សញ្ញាប័ណ្ណរដ្ឋ​ដែល​ជា​សំបុត្រ​ធានា​សង​ប្រាក់​រវាង​រដ្ឋ​ មិន​ម្ចាស់​បំណុល​ដែល​មក​ពី​វិស័យ​ឯកជន​ក្នុង​ស្រុក​នោះ​ទេ។ នេះ​បើ​យោង​ទៅ​តាម​ខ្លឹមសារ​សង្ខេប​នៃ​ឯកសារ​យុទ្ធសាស្ត្រ​ស្តី​ពី​ការ​គ្រប់​គ្រង​បំណុល​សាធារណៈ​ឆ្នាំ​២០១៥​ និង​២០១៨។

ខ្លឹមសារ​សង្ខេប​នៃ​ឯកសារ​យុទ្ធ​សាស្ត្រ​នេះ​ បាន​សរសេរ​ថា​ រដ្ឋាភិបាល​កំណត់​ទំហំ​នៃ​ការ​ខ្ចី​ថ្មី​បន្ថែម​ក្នុង​រង្វង់​ ៦០០លាន​អេស​ដេ​អ៊ែ​ (SDR) ​សម្រាប់​ឆ្នាំ​២០១៥​ និង​ក្នុង​រង្វង់​ពី​ ៧០០​ លាន​ ទៅ​៨០០​ លាន​អេស​ដេអ៊ែរ​ ក្នុង​មួយ​ឆ្នាំ​ សម្រាប់​ឆ្នាំ​២០១៦​ដល់​ឆ្នាំ​២០១៨​ ទៅ​តាម​បរិការណ៍​នៃ​គោល​នយោបាយ​ថវិកា​ និង​វិវឌ្ឍនាការ​ម៉ាក្រូ​សេដ្ឋកិច្ច​ជាក់​ស្តែង​របស់​កម្ពុជា។​

ទាក់​ទិន​ការ​ចេញ​សញ្ញាប័ណ្ណ​រដ្ឋ​ ឬ​ប័ណ្ណ​បំណុល​រដ្ឋ​នេះ​ ខ្លឹម​សារ​សង្ខេប​នៃ​ឯកសារ​យុទ្ធសាស្ត្រ​នេះ​ សង្កត់​ធ្ងន់​ថា​៖ «សម្រាប់​ឆ្នាំ​២០១៥​ដល់​២០១៨​ ជា​រួម​ រាជរដ្ឋាភិបាល​នឹង​មិន​បោះ​ផ្សាយ​មូលបត្រ​រដ្ឋ​ ឬ​សញ្ញាប័ណ្ណ​រដ្ឋ​អធិបតេយ្យ​ដែល​ជា​ឧបករណ៍​បំណុល​ថ្មី​ទេ​ តែ​ក៏​អាច​ធ្វើការ​សាកល្បង​ប្រើ​ប្រាស់​ឧបករណ៍​ថ្មី​នេះ​នៅ​ពេល​ណា​មួយ​ សម្រាប់​ជា​ការ​ចាប់​ផ្តើម​នៃ​ទី​ផ្សារ​បំណុល​ (មូលប័ត្រ​រដ្ឋ​) និង​អាច​ជា​មូលដ្ឋាន​សម្រាប់​ឲ្យ​មាន​ការ​បោះ​ផ្សាយ​មូលបត្រ​ឯកជន»​។

ប្រទេស​កម្ពុជា​ ត្រូវ​អ្នក​ជំនាញ​ក្នុង​វិស័យ​ហិរញ្ញ​វត្ថុ​មើល​ឃើញ​ថា​ នៅ​ពឹង​ផ្អែក​លើ​ប្រាក់​កម្ចី​ពី​បរទេស​ដែល​បានផ្តល់ក្នុង​រូបភាព​ជា​ឥណទាន​សម្បទាន ​ឬ​ក៏​ជំនួយ​ឥត​សំណង​។​ ពួកគេ​ថា​ រដ្ឋាភិបាលនឹង​ពិចារណា​ទៅ​លើ​ការ​ចេញ​ប័ណ្ណ​បំណុល​នេះ​ ដែល​តម្រូវ​ឲ្យ​មាន​ការ​រៀប​ចំ​បទប្បញ្ញត្តិ​មួយ​ត្រឹម​ត្រូវ​ និង​ការ​យល់​ដឹង​ទូលំទូលាយ​ពី​សាធារណជន​ ជាពិសេស​អ្នក​មាន​ទ្រព្យ​ដែល​ចង់​ឲ្យ​លុយ​រដ្ឋាភិ​បាល​ខ្ចី។​ យ៉ាងណា​ក៏ដោយ​ ពួក​គេ​ថា​ រដ្ឋាភិបាល​នឹង​អាច​មានការរារែក​ចិត្ត​បន្តិច​ ក្នុង​ការ​ប្រើ​ប្រាស់​ឧបករណ៍​ថ្មីនេះ​ ​ដោយ​សារ​តែ​កម្រិត​អត្រា​ការ​ប្រាក់​ដែល​ផ្តល់​ឲ្យ​អ្នក​សន្សំ​ប្រាក់​ពី​ធនាគារ​នៅ​ក្នុង​ប្រទេស​នៅ​មាន​កម្រិត​ខ្ពស់។

លោក​ ច័ន្ទ​ សុផល អ្នក​វិភាគ​សេដ្ឋកិច្ច​ ​និង​ជា​ប្រធាន​មជ្ឈ​មណ្ឌល​សិក្សា​គោល​នយោបាយ​ថ្លែង​ថា​ រាជ​រដ្ឋាភិបាល​កម្ពុជា​ គួរ​ចាប់​ផ្តើម​ពិចារណា​លើ​ការ​ប្រើ​ប្រាស់​ឧបករណ៍​ហិរញ្ញវត្ថុ​នេះ​ ដោយ​ហេតុ​ថា​ វា​ជា​ឧបករណ៍​ដែល​រដ្ឋាភិបាល​នានា​នៅ​ក្នុង​ពិភព​លោក​បាន​កំពុង​ប្រើ​ប្រាស់។​ តែ​លោក​ថា​ ការកំណត់​អត្រា​ការប្រាក់​ អាច​នឹង​ជា​រនាំង​មួយ​ដែល​ធ្វើ​ឲ្យ​រដ្ឋាភិបាល​ពិបាក​ក្នុង​ការ​សម្រេចចិត្ត​ ខណៈ​ដែល​ប្រទេស​កម្ពុជា​នៅ​ទទួល​បាន​ផល​ពី​ប្រាក់​កម្ចី​ដែល​មាន​កម្រិត​ទាប​ពី​បរទេស។​

«នៅ​បច្ចុប្បន្ន​នេះ​ អត្រា​ការ​ប្រាក់សន្សំ​នៅ​ធនាគារ​មាន​កម្រិត​ខ្ពស់​ គឺ​ប្រហែលជា​៥​%​ ឬ​ក៏​អាច​ដល់​១០​%​ក៏​មាន​ បើ​សិន​ជា​ ប្រជាពលរដ្ឋ​យើង​វិនិយោគ​ជាមួយ​នឹង​គ្រឹះស្ថាន​មីក្រូហិរញ្ញវត្ថុ​ ហើយ​រដ្ឋាភិបាល​ បើ​សិន​ជា​បើក​ឲ្យ​ប្រជាពលរដ្ឋ​យក​ប្រាក់​មក​ផ្ញើ​ ហើយ​ឲ្យ​ការ​ប្រាក់​នោះ​គឺៗ ប្រហែល​ជា ​មិនៗ​ រក​បាន​ទេ បើ​សិន​ជា​ការ​ប្រាក់​ឲ្យ​ត្រឹម​១[ទៅ] ​២% ដូចដែល​អាច​ខ្ចី​បាន​ពី​ទុន​ ពី​មូលធន​អនុគ្រោះ​ឬ​កម្ចី​អនុគ្រោះ​ ពី​ប្រទេស​ផ្សេងៗ​ឬ​ស្ថាប័ន​អន្តរជាតិ ការណ៍​ដែល​រដ្ឋាភិបាល​រក​ រក​ប្រាក់​កម្ចី​នោះ ​គឺ​រក​កម្ចី​ក្នុង​ក្រប​ខណ្ឌអនុគ្រោះ​ មានន័យ​ថា​ ការ​ប្រាក់១%​ ឬក៏​២​% ២,៥​%​ ក្នុង​មួយ​ឆ្នាំ​ប៉ុណ្ណោះ​ ហើយ​បើ​សិន​ជា​រក​ទុន​របៀប​នេះ​ក្នុងស្រុក​យើង​ ខ្ញុំ​យល់ថា​ រក​មិន​ទាន់​បាន​ទេ ព្រោះ​គេ​អាច​មាន​ឱកាស​យក​ប្រាក់​ទៅ​ផ្ញើ​ធនាគារ ហើយ​ឬក៏​គ្រឹះស្ថាន​មីក្រូ​ហិរញ្ញ​វត្ថុ ហើយ​បាន​អត្រា​ការ​ប្រាក់​លើស​ពី​៥%»។

នៅ​ក្នុង​ការ​អនុម័ត​កញ្ចប់​ថវិកា​ជាតិ​សម្រាប់​ការ​ចាយ​វាយ​របស់​រដ្ឋាភិបាល​ក្នុង​ឆ្នាំ​២០១៦​ដែល​ធ្វើ​ឡើង​កាល​ពី​ថ្ងៃ​ច័ន្ទ​នោះ​ រដ្ឋមន្ត្រី​នៃ​ក្រសួង​សេដ្ឋកិច្ច និង​ហិរញ្ញវត្ថុ​ បាន​ការ​ពារ​ផែន​ការ​ខ្ចី​របស់​រដ្ឋាភិបាល​ ដោយ​បាន​អះអាង​ថា​ការ​ខ្ចីបុល​នេះ​ នឹង​មិន​ធ្វើ​ឲ្យ​ប្រជាពលរដ្ឋ​ខ្មែរ​ជំពាក់​គេ​វ័ណ្ឌ​ក​នោះ​ទេ​តែ​ជា​ការ​ជ្រោមជ្រែង​កំណើន​សេដ្ឋកិច្ច។​ អ្នក​ជំនាញ​ក្នុង​វិស័យ​ហិរញ្ញវត្ថុ​ថ្លែង​ថា​ ការ​បកស្រាយ​នេះ​ អាច​ទទួល​យក​បាន​ ប្រសិន​បើ​ការ​ប្រើ​ប្រាស់​កម្ចី​ត្រូវ​បាន​ធ្វើ​ឡើង​ដោយ​តម្លា​ភាព​ និង​កសាង​បាន​ហេដ្ឋា​រចនា​សម្ព័ន្ធ​នានា​ដែល​អាច​យក​ចំណូល​ជូន​ជាតិ​ដើម្បី​សង​ការ​ប្រាក់​ទៅ​គេ​វិញ៕

XS
SM
MD
LG