ភ្ជាប់​ទៅ​គេហទំព័រ​ទាក់ទង

អាជ្ញាធរ​មូលដ្ឋាន​រត់ការ​បញ្ចប់​រឿងក្តី​បាញ់​កម្មករ​នៅ​បាវិត​ដោយ​ស្ងាត់ៗ


ជន​រងគ្រោះ​ម្នាក់ក្នុង​ការ​បាញ់​ប្រហារ​កាល​ពី​ខែ​មុន​

មន្ដ្រី​ជាន់​ខ្ពស់​ប៉ូលិស ​និង​ចៅ​សង្កាត់​មួយ​រូប​រួមទាំង​សមាជិក​ក្រុមប្រឹក្សា​សង្កាត់​ម្នាក់​ទៀត ​ត្រូវ​គេ​រាយការណ៍​នៅ​ថ្ងៃ​ពុធ​នេះ​ថា ​បាន​ព្យាយាម​ជួយ​ស្វែង​រក​ការ​សម្រប​សម្រួល​ដើម្បី​ឲ្យ​ជន​រងគ្រោះ​ក្នុង​ការ​បាញ់​ប្រហារ​កាល​ពី​ខែ​មុន​បោះបង់​ចោល​ចេតនា​ប្ដឹង​ប្រឆាំង​នឹង​អភិបាល​ក្រុង​បាវិត។

អភិបាល​ក្រុង​បាវិត ​លោក ​ឈូក ​បណ្ឌិត ​ត្រូវ​ក្រុម​ប៉ូលិស​ចង្អុល​បង្ហាញ​ថា​ គឺ​ជា​ខ្មាន់​កាំភ្លើង​ដែល​បាន​បាញ់​ប្រហារ​ដោយ​ត្រង់​ទៅ​លើ​បាតុករ​ដែល​កំពុង​តវ៉ា​ទាមទារ​លក្ខខណ្ឌ​ល្អ​ប្រសើរ​នៅ​ក្នុង​ការងារ​កាល​ពី​ខែ​កុម្ភៈ។ ​ការ​បាញ់​ប្រហារ​នោះ​បាន​ធ្វើ​ឲ្យ​កម្មការិនី​ចំនួន​បី​នាក់​រងរបួស។

កញ្ញា​ ប៊ុន​ ចិន្ដា​ គឺ​ជា​ជន​រងគ្រោះ​ម្នាក់​ ដែល​មាន​សភាព​ធ្ងន់ធ្ងរ​ជាង​គេ​នៅ​ក្នុង​ចំណោម​ជន​រងគ្រោះ​ទាំង​បី។ ​នាង​ត្រូវ​គ្រាប់​ពី​ខាង​ខ្នង​ធ្លាយ​ដល់​ដើម​ទ្រូង​ផ្នែក​ខាង​ឆ្វេង​ហើយ​បាន​ចាកចេញ​ពី​មន្ទីរពេទ្យ​កាល់ម៉ែត្រ​កាល​ពី​ថ្ងៃ​អង្គារ។

សមាជិក​គ្រួសារ​របស់​នាង ​និង​ប្រធាន​ភូមិ​ព្រៃផ្ដៅ ​របស់​នាង​គឺ​លោក ​សុខ ​ស៊ា ​បាន​បញ្ជាក់​ថា ​លោក ​កែវ​ គង់ ​អធិការរង​ប៉ូលិស​ក្រុង​បាវិត ​និង​លោក ​ហួត ​សម័យ ​ចៅ​សង្កាត់​ច្រកម្ទេស​ ក្រុង​បាវិត ​បាន​ស្វែងរក​ការសម្រុះ​សម្រួល​ពី​គ្រួសារ​ជនរងគ្រោះ​ដើម្បី​កុំ​ឲ្យ​ដាក់​ពាក្យ​ប្ដឹង​ទៅ​តុលាការ​ប្រឆាំង​លោក​ ឈូក ​បណ្ឌិត។

លោក​ប្រធាន​ភូមិ​ព្រៃផ្ដៅ ​មាន​ប្រសាសន៍​ថា ​ភ្នាក់ងារ​នៃ​មន្ត្រី​ទាំង​បី​រូប​បាន​មក​ត្រឹម​ផ្ទះ​របស់​លោក ​ហើយ​ស្នើ​ឲ្យ​លោក​ទៅ​ចរចា​ជាមួយ​ជន​រងគ្រោះ​ និង​ក្រុម​គ្រួសារ​ដោយ​ផ្ទាល់។

លោក ​សុខ ​ស៊ា ​បាន​បញ្ជាក់​ថា ​លោក​ កែវ​ គង់ ​អធិការរង​ប៉ូលិស​ក្រុង​បាវិត ​និង​លោក ​ហួត ​សម័យ ​ចៅ​សង្កាត់​ច្រកម្ទេស​និង​សមាជិក​ក្រុមប្រឹក្សា​ម្នាក់ទៀត​បាន​ពាំនាំ​ពាក្យ​ពី​ភាគី​ខ្មាន់​កាំភ្លើង​ក្នុងការ​បង់​ប្រាក់​ចំនួន ​១.០០០​ដុល្លារ​អាមេរិក​ដើម្បី​រំលត់​បណ្ដឹង។ ​ក៏ប៉ុន្ដែ​ក្រុម​គ្រួសារ​ជន​រងគ្រោះ​មិន​យល់​ព្រម​ជាមួយ​នឹង​សំណើ​នោះ​ទេ ​ហើយ​ភាគី​ភ្នាក់ងារ​អាជ្ញាធរ​បាន​ស្នើ​សុំ​ឲ្យ​មាន​ការ​ចរចា​ជា​លើក​ទី​ពីរ​ទៀត​នៅ​ថ្ងៃ​ដដែល​នេះ។

«មាន​ប្រាំ​នាក់ ​ប៉ុន្តែ​មក​នៅ​សល់​តែ​បី​នាក់​ទេ។ ​អធិការ​ក្រុងបាវិត​ហ្នឹង ​ទូរស័ព្ទ​មក​ហៅ​គេ​ឲ្យ​ទៅ​កន្លែង​កាស៊ីណូ ​ហើយ​នៅ​តែ​អធិកា​រង​ជាមួយ​នឹង​ចៅ​សង្កាត់ ​ក្រុម​គ្រួសារ​ម្នាក់។​ គេ​និយាយ​ថា​ មក​ឲ្យ​ចរចា​អ្នក​រងគ្រោះ​ហ្នឹង។ ​ម្តាយឪពុក​អ្នក​រងគ្រោះ​ហ្នឹង​ តើ​ប្តឹង​ ឬ​ក៏​មិនប្តឹង។​ បើ​ថា​មិន​ប្តឹង​ទេ​ គេ​ថា​សុំ​ជូន​ ១.០០០​ដុល្លារ​បើ​យក​ជាលុយ។ ​បើ​យក​ជា​ម៉ូតូ ​គេ​ថា​ទិញ​តម្លៃ​១.០០០​ដែរ។​ គ្រាន់តែ​មក​សុំ​ចរចា។ ​តើ​ព្រម​ ឬ​មិនព្រម?​ ខាង​ជនរងគ្រោះ​គាត់​មិន​អាច​ចរចា​បាន​ទេ។ ​អញ្ចឹង​គេ​ថា​ទៅ​ចរចា​ម្តង​ទៀត​នៅ​ពេល​ថ្ងៃ​ហ្នឹង​ត្រូវការ​ប៉ុន្មាន?​ វា​ស្រួល​គេ​រាយការណ៍​ទៅ​លើ​ទៀត។​ ខ្ញុំ​រាយការណ៍​ទៅ​ប្រាប់​ចៅសង្កាត់​ហើយ​ថា​គាត់​ឥតព្រម​ទេ ​លុះត្រា​មួយ​ម៉ឺន​ដុល្លារ ​ទើប​គាត់​ព្រម»។

ពុំ​ទាន់​មាន​ប្រភព​ណាមួយ​បញ្ជាក់​ថា ​ជន​រងគ្រោះ​ពីរ​រូប​ផ្សេង​ទៀត​ ត្រូវ​បាន​ទាក់ទង​ដើម្បី​សម្រួល​ទៅ​ដល់​ការ​រំលត់​បណ្ដឹង​នោះ​ទេ។

លោក ​អំ ​សំអាត ​ប្រធាន​គ្រប់គ្រ​ងការិយាល័យ​គ្រប់គ្រង​បច្ចេកទេស​ស៊ើបអង្កេត​របស់​អង្គការ​ការពារ​សិទ្ធិ​មនុស្ស​លីកាដូ ​បាន​បញ្ជាក់​ថា ​ជន​រងគ្រោះ​ពីរ​រូប​ទៀត​មិន​ទាន់​បាន​បង្ហាញ​ចេតនា​ប្ដឹង​ប្រឆាំង​លោក​អភិបាល​ក្រុង​បាវិត​នោះ​ទេ ​រហូត​មក​ទល់​នឹង​ថ្ងៃ​នេះ។

បងប្រុស​របស់​កញ្ញា ​ប៊ុន ​ចិន្ដា ​គឺ​លោក​ សំ​ ស៊ីណាត​ បាន​អះអាង​ថា ​ប្រធាន​ភូមិ​បាន​មក​ចរចា​ជាមួយ​រូប​លោក​ និង​ក្រុម​គ្រួសារ​របស់​លោក​នៅ​ថ្ងៃ​នេះ។

ដោយឡែក​កញ្ញា ​ប៊ុន ​ចិន្ដា ​នៅ​តែ​រក្សា​ជំហរ​ប្ដឹង​ប្រឆាំង​នឹង​អ្នក​វាយប្រហារ​ដោយ​គ្រាប់​កាំភ្លើង​មក​លើ​រូប​នាង​ដដែល។

«ទោះ​បី​ជា​គេ​ធ្វើ​អញ្ចឹង​មក​លើ​រូប​ខ្ញុំ​ ខ្ញុំ​មិន​អាច​ឈប់​បាន​ទេ»។

លោក ​កែវ ​គង់ ​អធិការ​រង​ប៉ូលិស​ក្រុង​បាវិត​និង​លោក ​ហួត ​សម័យ ​ចៅសង្កាត់​ច្រកម្ទេស ​សុទ្ធតែ​បាន​បដិសេធ​ដូច​ៗ​គ្នា​ថា ​ពួក​លោក​មិន​បាន​ដឹកនាំ​ឲ្យ​មាន​ការ​ចរចា​សម្រប​សម្រួល​បញ្ឈប់​បណ្ដឹង​នេះ​ទេ។

លោក ​កែវ ​គង់ ​គ្រាន់​តែ​និយាយ​ថា​ប្រហែល​ជា​ប្រធាន​ភូមិ​បាន​ទៅ​សួរ​សុខទុក្ខ​ជន​រងគ្រោះ។

«ខ្ញុំ​ក្រែង​ថា​មេភូមិ​ គេ​ទៅ​អី​មិន​ដឹង»។

លោក ​សុខ ​សំអឿន ​នាយក​អង្គការ​ក្រុម​អ្នក​ច្បាប់​ការពារ​សិទ្ធិ​កម្ពុជា ​មាន​ប្រសាសន៍​ថា ​យោង​តាម​ក្រម​នីតិព្រហ្មទណ្ឌ​កម្ពុជា ​ជន​រងគ្រោះ​ និង​ជន​ល្មើស​អាច​អនុញ្ញាត​មាន​ការ​សម្រុះសម្រួល​គ្នា​ក្រៅ​ផ្លូវ​តុលាការ​បាន។ ​ក៏ប៉ុន្ដែ​សម្រាប់​បទ​ល្មើស​ធ្ងន់ធ្ងរ​ព្រះរាជអាជ្ញា​ និង​ក្រុម​សមត្ថកិច្ច​នៅ​តែ​មាន​តួនាទី​សំខាន់​ក្នុង​ការ​បន្ដ​ប្ដឹង​ប្រឆាំង​នឹង​ជន​ល្មើស​ដដែល។

«បទល្មើស​ខ្លះ​មិន​អាច​ផ្សះផ្សា​បាន​ទេ ​ទោះ​បី​ជា​ជន​រងគ្រោះ​មិន​ប្តឹង​ក៏ដោយ។​ អាជ្ញាធរ​សមត្ថកិច្ច​ត្រូវតែ​បន្តនីតិ​វិធី​ដដែល ​ហើយ​តុលាការ​ត្រូវ​តែ​ធ្វើ​ការ​កាត់​សេចក្តី​ឲ្យ​បាន​ច្បាស់លាស់»។

ជាមួយ​គ្នា​នេះ​លោក ​ហ៊ីង ​ប៊ុនជា ​ព្រះរាជ​អាជ្ញារង​តុលាការ​ខេត្ត​ស្វាយរៀង​បញ្ជាក់​ថា ​លោក​នៅ​តែ​រក្សា​ជំហរ​ចាត់ការនៅ​ក្នុង​សំណុំរឿង​បាញ់ប្រហារ​លើ​កម្មករ​រោងចក្រ​នេះ។

«បណ្តឹង​រដ្ឋប្បវេណី​វា​អាច​បញ្ចប់​ ប៉ុន្តែ​បណ្តឹង​អាជ្ញា​មិន​អាច​បញ្ចប់​បាន​ទេ។​ វា​ត្រូវ​តែ​ធ្វើ​ការ​ស៊ើបអង្កេត​នៅ​ពេល​ដែល​មាន​បទល្មើស​បន្ទាន់​កើត​ឡើង»។

សូម​បញ្ជាក់​ថា ​កាល​ពី​ថ្ងៃ​ទី​២០ ​ខែ​កុម្ភៈ ​កម្មករ​ កម្មការិនី​នៃ​រោងចក្រ​ផលិត​ស្បែក​ជើង ​នៅ​ក្នុង​តំបន់​សេដ្ឋកិច្ច​ពិសេស​ក្រុង​បាវិត​ ខេត្ត​ស្វាយរៀង​ចំនួន​ប្រមាណ​១.០០០​នាក់​មក​ពី​រោងចក្រ​ចំនួន​បី​ផ្សេងៗ​គ្នា ​បាន​ធ្វើតវ៉ា​ទាមទារ​ប្រាក់​ឈ្នួល​ម៉ោង​បន្ថែម​ និង​លក្ខខណ្ឌ​ការងារ​ឲ្យ​បាន​សមរម្យ។ ​ហើយ​នៅ​ពេល​នោះ​មាន​ការ​ប៉ះទង្គិច ​ជាមួយ​នឹង​សន្តិសុខ​ក្រុមហ៊ុន ​និង​អាជ្ញាធរ​មាន​សមត្ថកិច្ច។

​ក្នុង​ពេល​ជាមួយ​គ្នា​នោះ ​ខ្មាន់​កាំភ្លើង​ដែល​ត្រូវ​គេ​ស្គាល់​ថា​ជា​អភិបាល​ក្រុង ​បាវិត ​លោក ​ឈូក ​បណ្ឌិត ​បាន​ចុះ​ពី​លើ​រថយន្ដ​ហើយ​បាន​ដក​កាំភ្លើង​ខ្លី​បាញ់​ទៅ​លើ​ក្រុម​អ្នក​តវ៉ា​ និង​បាន​បណ្ដាល​ឲ្យ​កម្មការិនី​ទាំង​បី​នាក់​ខាង​លើ​រង​របួស៕

XS
SM
MD
LG