វ៉ាស៊ីនតោន៖ រដ្ឋាភិបាលកម្ពុជា បានស្នើថវិការជាង៣ពាន់លានដុល្លាសរអាសំរាប់ចំណាយឆ្នាំ២០១៣លើវិស័យផ្សេងៗរួមមាន សន្តិសុខ អប់រំ សុខាភិបាល សង្គមកិច្ច និងវិស័យផ្សេងៗទៀតដែលរដ្ឋាភិបាលអះអាងថា ក្នុងទិសដៅអភិវឌ្ឍសេដ្ឋកិច្ច ប្រទេសកម្ពុជា។ តែលោក សុន ឆៃ អ្នកតំណាងរាស្ត្រគណបក្សសម រង្ស៉ី បន្ទោសរដ្ឋាភិបាលអំពីការចាយវាយច្រើនហួសប្រមាណដោយពឹងលើប្រាក់ដែលខ្ចីពីបរទេស ដោយលោក ចាត់ទុកថា នេះជាការចាយវាយដោយគ្មានការទទួលខុសត្រូវ។
លោក សុន ឆៃ ស្នើសុំឲ្យព្រឹទ្ធសភាដែលគ្រោងនឹងអនុម័តច្បាប់ថវិកានេះពិនិត្យឡើងវិញដើម្បីរកវិធីបញ្ឍប់ការខ្ចីបុលបរទេស និងកុំឲ្យប្រាក់ជំពាក់ដែលពលរដ្ឋកម្ពុជា ត្រូវសងក្លាយជាបន្ទុកដ៏ធ្ងន់ធ្ងរដល់ប្រជាពលរដ្ឋ។ លោកថ្លែងយ៉ាងដូច្នេះ ពេលលោកបានអញ្ជើញចូលរួមជាវាគ្មិនក្នុងកម្មវិធីហេឡូវីអូអេនៅយប់ថ្ងៃព្រហស្បតិ៍ ជាមួយលោក ផៃ ស៊ីផានអ្នកនាំពាក្យទីស្តីការគណៈរដ្ឋមន្ត្រី។
តែលោក ផៃ ស៊ីផានច្រានចោលការអត្ថាធិប្បាយរបស់លោក សុន ឆៃ។ លោក ផៃ ស៊ីផានថ្លែងថា រដ្ឋាភិបាលមានគំរោងច្បាស់លាស់ក្នុងការចំណាយរបស់ខ្លួន ដើម្បីអភិវឌ្ឍសេដ្ឋកិច្ច ដើម្បីភ្ជាប់ទីក្រុងនឹងជនបទដោយកសាងហេដ្ឋារចនាសម្ព័ន្ធ ស្ពាន ផ្លូវថ្នល់ ការក្សាលំនឹងសេដ្ឋកិច្ចជាដើម៕
