នៅថ្ងៃពុធនេះ តំណាងអយ្យការតុលាការក្រុងភ្នំពេញបានសួរដេញដោលលោកកឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១នៃរដ្ឋសភាអំពីការធ្វើបាតុកម្ម ក្រោយពេលបោះឆ្នោត និងការលើកឡើងរបស់លោកអំឡុងពេលទស្សនកិច្ចនៅសហរដ្ឋអាមេរិកកាលពីខែមុន។
ក៏ប៉ុន្តែតុលាការមិនទាន់មានចំណាត់អ្វីនៅឡើយទេ ក្រោយពីការសាកសួរអស់រយៈពេលជាង៧ម៉ោងរួចមក។ តាមការឲ្យដឹង មេធាវីការពារលោកកឹម សុខាចំនួនបួនរូបក៏បានចូលរូមការពារលោកដែរ ពេលលោកឆ្លើយនឹងសំណួររបស់តំណាងអយ្យការពីររូប រួមទាំងលោកលី សុផាន់ណា ដែលជាព្រះរាជអាជ្ញារងផងដែរ។
បន្ទាប់ពីការសាកសួររបស់តំណាងអយ្យការតុលាការក្រុងភ្នំពេញ លោកកឹម សុខាបានថ្លែងទៅកាន់ក្រុមអ្នកយកព័ត៌មានថា តំណាងអយ្យការបានសួរសំណួរច្រំដែលៗ និងឈ្លេចសួរលោកទាក់ទងនឹង«និយមន័យនៃពាក្យបដិវត្តន៍» និងការចូលរួមធ្វើបាតុកម្មក្រោយពីការបោះឆ្នោតនោះ។ លោកបានបញ្ជាក់ថា ការសាកសួរនេះបានបញ្ចប់ហើយ។
«សួរលម្អិត សួរគ្រប់ពាក្យដែលខ្ញុំបាននិយាយ។ សួរតាំងពីបាតុកម្ម តាំងពីនៅអាមេរិក។ សួរគ្រប់ពេលវេលាទាំងអស់ សួរពាក្យ ហើយសួរអ្វីដែលមិនគួរសួរក៏សួរដែរ។ សួរតាំងពីនិយមន័យពាក្យថា បដិវត្តន៍»។
លោកស្រី ម៉េង សុភារី មេធាវីមួយរូបក្នុងចំណោម៤រូបដែលតំណាង ឲ្យលោកកឹម សុខាក្នុងពេលសាកសួរនោះ បានប្រាប់អ្នកព័ត៌មានថា ការសាកសួរនោះគឺគ្មានគោលដៅច្បាស់លាស់ទេ។ លោកស្រីបានបន្តថា មកដល់ពេលនោះមិនទាន់មានការចោទប្រកាន់ណាមួយលើកូនក្តីរបស់លោកស្រីនៅឡើយទេ។
«ខ្ញុំយល់ថា សំណួរហ្នឹងវាស្មុគស្មាញ និងគ្រប់រឿង គ្រប់ព្រឹត្តិការណ៍។ គ្រាន់តែថា ពេលនេះយើងសុំឲ្យបញ្ឈប់ការសាកសួរលើគាត់ទៀត។ ហើយនៅថ្ងៃនេះគឺគាត់មកឆ្លើយមិនមែនក្នុងនាមជាសាក្សី មិនមែនដើមបណ្តឹង មិនមែនជាចុងចោទអ្វីទាំងអស់គឺនៅក្នុងនាមតំណាងអយ្យការអញ្ជើញមកបំភ្លឺ»។
ការចូលបំភ្លឺរបស់លោកកឹម សុខាថ្ងៃនេះគឺតាមការកោះកៅរបស់ តំណាងអយ្យការតុលាការក្រុងភ្នំពេញបានធ្វើការកោះហៅលោកកឹម សុខាឲ្យចូលបំភ្លឺបន្ថែមលើសំណុំរឿងលេខ១៥ ចុះថ្ងៃទី០៣ ខែមករាឆ្នាំ២០១៤ ដែលទាក់ទិននឹងបាតុកម្មនៅផ្លូវវ៉េងស្រេងកាលពីដើមឆ្នាំមុននោះ ហើយដែលលោកបានចូលបំភ្លឺម្តងរួចមកហើយ។
ការតវ៉ារបស់កម្មករទាមទារដំឡើងប្រាក់ខែគោលកាលពីចុងឆ្នាំ២០១៣និងដើមឆ្នាំ២០១៤ត្រូវបានរងការបង្ក្រាបដោយកងកម្លាំងមានសមត្ថកិច្ចនៅផ្លូវវ៉េងស្រេងនិងបានបណ្តាលឱ្យមនុស្សយ៉ាងហោចណាស់៥នាក់បានស្លាប់បាត់បង់ជីវិតនិងរងរបួសជាច្រើនទៀតព្រមទាំងមានការខូចខាតទ្រព្យសម្បត្តិពលរដ្ឋដែលនៅ ជិតខាងនោះផងដែរ។
ការកោះហៅនេះគឺធ្វើឡើងមិនបានប៉ុន្មានថ្ងៃក្រោយពេលដែលលោកនាយករដ្ឋមន្ត្រីហ៊ុន សែនវាយប្រហារដោយប្រើពាក្យសម្តី និងស្នើឲ្យតុលាការចាត់វិធានការលើលោកកឹម សុខា ក្រោយពេលដែលលោកបានថ្លែងទៅកាន់អ្នកគាំទ្រនៅសហរដ្ឋអាមេរិកកាលពីខែមុន ដែលថា លោកមិនអាចធ្វើឲ្យមានការផ្លាស់ប្តូរមួយនៅកម្ពុជានោះទេ។
លោកអំ សំអាត ប្រធានក្រុមបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូថ្លែងថា ការកោះហៅនេះមានភាពប្រទាក់ក្រឡាជាមួយនឹងរឿងនយោបាយ ជាពិសេសគម្រោងនៃការបង្កើតគ.ជ.ប.ពេលថ្មីៗនេះ និងគម្រោងរៀបចំបង្កើតច្បាប់គ្រប់គ្រងលើអង្គការសង្គមស៊ីវិលជាដើម។
«យើងគិតថា កាលៈទេសៈអីក៏ដោយនៅស្រុកខ្មែរគេតែងតែដាក់សម្ពាធទៅលើអ្នកនយោបាយជាន់ខ្ពស់ដើម្បីធ្វើការចរចា»។
VOA បានព្យាយាមទាក់ទងសុំការអត្ថាធិប្បាយពីមន្ត្រីសាលាដំបូងរាជធានីភ្នំពេញ រួមទាំងលោកព្រះរាជអាជ្ញារងលី សុផាន់ណាផងដែរ តែមិនអាចទាក់ទងបានទេ ដោយសារទូរស័ព្ទរបស់លោកគ្មានអ្នកទទួល៕
