ភ្នំពេញ៖ ការជួបគ្នារវាងលោកប្រធានាធិបតីអាមេរិកបារ៉ាក់ អូបាម៉ា និងគួប្រជែងដ៏ខ្លាំងក្លារបស់ខ្លួនលោកមីត្ត រ៉មនីនៅថ្ងៃព្រហស្បតិ៍នេះបានទាក់ទាញការកោតសរសើរពីអ្នកនយោបាយគណបក្សជំទាស់ មន្ដ្រីសង្គមស៊ីវិលនិងមន្រ្តីបោះឆ្នោត។
ជំនួបក្រោយពីការបោះឆ្នោតរវាងអ្នកនយោបាយអាមេរិកទាំងពីរក្នុងសេតវិមានសម្រាប់
អាហារថ្ងៃត្រង់ជាលក្ខណៈឯកជននៅថ្ងៃនេះកើតឡើងបន្ទាប់ពីការប្រជែងគ្នាយ៉ាងជូរចត់មុនការបោះឆ្នោតថ្ងៃទី៦ខែវិច្ឆិកា។
លោកហង្ស ពុទ្ធា នាយកគណៈកម្មាធិការមិនលម្អៀង អព្យាក្រិតដើម្បីការបោះឆ្នោតដោយសេរីនិងយុត្តិធម៌នៅកម្ពុជាហៅថានិចហ្វិចមានប្រសាសន៍ថា កម្ពុជាស្ថិតនៅឆ្ងាយពីលទ្ធិប្រជាធិបតេយ្យបែបនេះនៅឡើយ។
«ប្រសិនបើអ្នកនយោបាយខ្មែរគិតគូរប្រយោជន៍ជាតិធំជាងប្រយោជន៍បក្សនោះទិដ្ឋភាពដូចជំនួបរវាងលោកបារ៉ាក់ អូបាម៉ានិងលោករ៉មនីនឹងអាចកើតឡើងក្នុងប្រទេសកម្ពុជា»។
លោកមានប្រសាសន៍ថាអ្នកនយោបាយខ្មែរ «គួររៀនពីលទ្ធិប្រជាធិបតេយ្យឲ្យបានច្រើនជាងអ្វីដែលពួកខ្លួនកំពុងធ្វើសព្វថ្ងៃគឺមានន័យថាប្រជែងគ្នាក្នុងនាមទស្សនៈផ្សេងគ្នាប៉ុន្តែទិសដៅរួមគឺអភិវឌ្ឍន៍ប្រទេសជាតិ»។
លោកបារ៉ាក់ អូបាម៉ា បានជាប់ឆ្នោតជាប្រធានាធិបតីអាមេរិកសម្រាប់អាណត្តិទី២កាលពីថ្ងៃទី៦ ខែវិច្ឆិកា។ លោកបានថ្លែងក្នុងថ្ងៃជ័យជម្នះរបស់ខ្លួនថាលោកនឹងជួបជាមួយលោករ៉មនី ហើយនឹងពិចារណាអំពីគំនិតនានារបស់គណបក្សសាធារណរដ្ឋដែលចាញ់ឆ្នោត។
លោកហង្ស ពុទ្ធា សម្គាល់ឃើញថាកម្ពុជាកំពុងស្ថិតក្នុងលទ្ធិប្រជាធិបតេយ្យបែបអន្តរកាលដែលមិនទាន់អាចទទួលយកគំរូនយោបាយជឿនលឿនបែបនេះបាននៅឡើយ។ លោកគិតថា អ្នកនយោបាយកម្ពុជាត្រូវតែបូជាដើម្បីលទ្ធិប្រជាធិបតេយ្យនិងត្រូវមានសីលធម៌ដាក់គ្នាទៅវិញទៅមក។
កម្ពុជានឹងធ្វើការបោះឆ្នោតនៅថ្ងៃទី២៨ ខែកក្កដា ឆ្នាំ២០១៣ សម្រាប់ជ្រើសតាំងតំណាងរាស្ដ្រនិងបង្កើតរដ្ឋាភិបាលថ្មី។ ក៏ប៉ុន្តែសហគមន៍អន្តរជាតិបានរិះគន់និងដាក់សម្ពាធដល់រដ្ឋាភិបាលឲ្យបើកទូលាយទៅដល់គណបក្សប្រជែង ជាពិសេសអនុញ្ញាតឲ្យមេដឹកនាំគណបក្សជំទាស់លោកសម រង្ស៊ី វិលត្រឡប់ចូលរួមការបោះឆ្នោតវិញបាន។
លោកសម រង្ស៊ី ដែលបានក្លាយជាប្រធានគណបក្សសង្គ្រោះជាតិត្រូវបានលុបឈ្មោះចេញពីបញ្ជីអ្នកបោះឆ្នោតដោយសំអាងថាលោកត្រូវផ្តន្ទាទោសដោយតុលាការហើយលោកមិនអាចឈរឈ្មោះនិងចូលរួមការបោះឆ្នោតបានទៀតទេ។
នៅក្នុងបរិបទនេះដែរ លោកម៉ម សុណង់ដូ អ្នកប្រជាធិបតេយ្យម្នាក់នៅកម្ពុជានិងជានាយកវិទ្យុសំបុក្រឃ្មុំត្រូវបានកាត់ទោសដោយតុលាការក្រុងភ្នំពេញឲ្យជាប់ពន្ធនាគារចំនួន២០ឆ្នាំក្រោមការចោទប្រកាន់ថា បានប៉ុនប៉ងធ្វើអបគមន៍ ក៏ប៉ុន្តែសហរដ្ឋអាមេរិកនឹងសហគមន៍អន្តរជាតិចាត់ទុកថា លោកម៉ម សុណង់ដូ ត្រូវជាប់ទោសដោយសារតែការបញ្ចេញមតិរបស់ខ្លួន។
លោកយឹម សុវណ្ណ អ្នកនាំពាក្យគណបក្សសង្គ្រោះជាតិដែលទើបនឹងបង្កើតថ្មីដោយគណបក្សសម រង្ស៊ី និងគណបក្សសិទ្ធមនុស្សរបស់លោកកឹម សុខា មានប្រសាសន៍ថា នៅសហរដ្ឋអាមេរិក អ្នកនយោបាយតម្កល់ប្រយោជន៍ជាតិជាធំហើយពួកគេខុសគ្នាតែទស្សនៈនយោបាយតែប៉ុណ្ណោះហើយ«គេមានឯកភាពជាតិ»។
លោកបន្ថែមថា «ផ្ទុយពីប្រទេសកម្ពុជាអ្នកដែលមានមតិផ្ទុយពីរដ្ឋាភិបាលគេដាក់ក្នុងកន្រ្តកមួយដែលគេចាត់ទុកជាសត្រូវរបស់គេហើយគេមិនចាត់ទុកជាដៃគូក្នុងការអភិវឌ្ឍសង្គមប្រជាធិបតេយ្យទាំងអស់គ្នាទេ»។
មន្ត្រីគណបក្សជំទាស់ដដែលបានស្រង់ករណីលោកម៉ម សុណង់ដូនិងលោកសម រង្ស៊ី មកធ្វើជាសំអាងថា«អ្នកដែលហ៊ានបញ្ចេញមតិនិងអ្នកដែលមានប្រជាប្រិយភាពអាចប្រជែងមេដឹកនាំកាន់អំណាចបានគឺតែងតែទទួលរងការកៀបសង្កត់នយោបាយគ្រប់បែបយ៉ាង»។
ទោះជាយ៉ាងនេះក្តីលោកផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្ដ្រីមានប្រសាសន៍ថា លទ្ធិប្រជាធិបតេយ្យមានគំរូខុសៗគ្នាទៅតាមប្រទេសនិមួយៗ។ មន្ដ្រីអ្នកនាំពាក្យដដែលបានហៅគណបក្សជំទាស់ថា មិនបានបំពេញតួនាទីរបស់ខ្លួនក្នុងបរិបទលទ្ធិប្រជាធិបតេយ្យទេ។ ហើយក៏មានលក្ខណៈខុសគ្នាពីការប្រជែងគ្នារវាងលោកបារ៉ាក់ អូបាម៉ា និងលោករ៉មនី។
លោកថាគណបក្ស «ប្រឆាំងនៅមានលក្ខណៈជាគណបក្សឧទ្ទាមរាប់តាំងពីភាសានិងការគិតនិងរបៀបប្រកួតប្រជែង»។
ថ្វីបើដូច្នេះក្តីលោកទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតចាត់ទុកថា ជំនួបក្រៅផ្លូវការរវាងលោកបារ៉ាក់ អូបាម៉ា និងគូបដិបក្ខរបស់លោកគឺជាគំរូនយោបាយមួយសម្រាប់កម្ពុជា ក៏ប៉ុន្តែលោកគិតថា «វាអាស្រ័យនឹងប្រវត្តិនៃនយោបាយនិងអ្នកនយោបាយនិងប្រវត្តិនៃលទ្ធិប្រជាធិបតេយ្យនៃប្រទេសនិមួយៗដែរពីព្រោះប្រសិនបើមិនការបោះឆ្នោតមានការប្រេះស្រាំខ្លាំងភាពសម្រុះសម្រួលដូច្នេះពិបាកនឹងធ្វើដែរ»៕
