ប្រទេសកម្ពុជាសង្ឃឹមថានឹងនាំចូលសត្វខ្លា៤ក្បាលពីប្រទេសឥណ្ឌានៅឆ្នាំនេះក្រោមកិច្ចព្រមព្រៀងមួយ ដែលបានចុះហត្ថលេខាជាមួយនឹងរដ្ឋាភិបាលឥណ្ឌាក្នុងបំណងស្ដារឡើងវិញនូវសត្វប្រភេទនេះ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP ដែលយោងលើការបញ្ជាក់របស់មន្ត្រីបរិស្ថានម្នាក់នៅថ្ងៃចន្ទនេះ។
ព្រៃស្ងួតនៅក្នុងប្រទេសកម្ពុជាធ្លាប់ជាជម្រករបស់សត្វខ្លាឥណ្ឌូចិនជាច្រើនក្បាល ប៉ុន្តែអ្នកអភិរក្សថា ការបរបាញ់ខ្លាំងក្លាខុសច្បាប់លើសត្វខ្លានិងសត្វដែលជាចំណីរបស់ខ្លាបានធ្វើឱ្យចំនួនសត្វខ្លាថយចុះ។
សត្វខ្លាដែលគេឃើញចុងក្រោយបង្អស់នៅក្នុងប្រទេសកម្ពុជា គឺសត្វខ្លាដែលបានថតជាប់នៅក្នុងកាមេរ៉ាដែលគេលួចបង្កប់នៅក្នុងឆ្នាំ ២០០៧ ហើយសត្វខ្លាត្រូវបានគេប្រកាសថា «ផុតពូជ» នៅក្នុងប្រទេសកម្ពុជានៅឆ្នាំ ២០១៦។
ខ្លាឈ្មោលមួយក្បាលនិងញីបីក្បាលអាចមកដល់ប្រទេសកម្ពុជានៅចុងឆ្នាំ ២០២៤ នេះ។ នេះបើតាមការបញ្ជាក់របស់អ្នកនាំពាក្យក្រសួងបរិស្ថានលោក ខ្វៃ អាទិត្យា ប្រាប់ទីភ្នាក់ងារព័ត៌មាន AFP។
លោក ខ្វៃ អាទិត្យា បាននិយាយថា ខ្លាទាំងបួនក្បាលនេះនឹងត្រូវបញ្ជូនទៅក្នុងព្រៃទំហំ ៩០ ហិកតា ក្នុងដែនជម្រកសត្វព្រៃតាតៃនៅភាគខាងលិចខេត្តកោះកុង ដើម្បីឱ្យស៊ាំទៅនឹងបរិ ស្ថានថ្មីមុនពេលព្រលែងចូលទៅក្នុងព្រៃ។
លោកមិនបានបញ្ជាក់លម្អិតថាតើខ្លាទាំងបួនក្បាល ដែលនឹងនាំចូលពីប្រទេសឥណ្ឌានេះជាខ្លាប្រភេទអ្វីនោះទេ។
លោកបានបន្ថែមថា ខ្លា ១២ ក្បាលទៀត នឹងត្រូវនាំចូលនៅក្នុងរយៈពេលប្រាំឆ្នាំខាងមុខ ប្រសិន បើគម្រោងនេះដំណើរការទៅមុខដោយរលូន។
ការកាប់បំផ្លាញព្រៃឈើនិងការបរបាញ់ខុសច្បាប់បានបំផ្លិចបំផ្លាញចំនួនសត្វខ្លានៅទូទាំងទ្វីបអាស៊ី។
ប្រទេសកម្ពុជា ឡាវ និងវៀតណាមបា នបាត់បង់សត្វខ្លាក្នុងស្រុក ចំណែកឯប្រទេសមីយ៉ាន់ ម៉ាវិញត្រូវគេជឿថា នៅសល់សត្វខ្លាតែ ២៣ ក្បាលប៉ុណ្ណោះនៅក្នុងព្រៃ៕
វេទិកាបញ្ចេញមតិ